«Як яна будзе цяпер у Беларусі жыць?» Што кажуць суседзі пра ўдзельніцу затрыманьня Ціханоўскага ў Горадні
Свабода пагутарыла ў Бабруйску з суседзямі жанчыны, якая 29 траўня ў Горадні за некалькі хвілін да затрыманьня відэаблогера Сяргея Ціханоўскага настойліва дамагалася ад яго адказу на свае пытаньні. Калі той адмовіўся, то зьявіліся двое міліцыянтаў, і ў штурханіне адзін зь іх апынуўся на асфальце.
Цяпер арыштаванаму блогеру, кіраўніку выбарчага штабу вылучэнкі на прэзыдэнцтва Сьвятланы Ціханоўскай, а таксама 8 ягоным паплечнікам інкрымінуюць «гвалт супраць супрацоўнікаў органаў унутраных спраў». Саму ж жанчыну шмат хто называе правакатаркай, якая ўсчала канфлікт, каб даць падставы міліцыі арыштаваць Ціханоўскага. Цалкам чытайце па спасылцы.
Лукашэнка прыгразіў «нагадаць», як ва Ўзбэкістане расстралялі дэманстрантаў. Што было ў Андыжане?
Аляксандар Лукашэнка 4 чэрвеня зьмяніў склад ураду. Даючы наказы новаму ўраду, пачаў абурацца заявамі сваіх патэнцыйных апанэнтаў на прэзыдэнцкіх выбарах.
Сярод іншага ён заявіў, што адно з найважнейшых дасягненьняў Беларусі — мір і стабільнасьць. Як перадае прэс-служба Лукашэнкі, пасьля гэтага ён прыгразіў «нагадаць», як адбываліся масавыя расстрэлы дэманстрантаў. Цалкам чытайце па спасылцы.
Ператрус на лецішчы маці Сяргея Ціханоўскага цягнуўся цэлыя суткі
Ператрус на лецішчы маці Сяргея Ціханоўскага Соф'і Ціханоўскай у садаводзкім таварыстве за 25 ад Гомля пачаўся а 16-й гадзіне 3 чэрвеня і скончыўся калі 16-й гадзіны сёньня.
Тры разы за ноч зьмяняліся сьледчыя групы, і каля 3-й ночы ў доме знайшлі 900 тысяч даляраў, прычым на бачных месцах — за шафкай на кухні і за ложкам на другім паверсе, паведаміла МУС. Цяпер маці блогера павезьлі на допыт у Сьледчы камітэт, пра гэта яна паведаміла Свабодзе. Пасьля допыту адбудзецца вобшук у яе кватэры. Каля лецішча было 7 аўтамабіляў, дзяжурылі супрацоўнікі міліцыі і Сьледчага камітэту.
«Тэрор быў страшны!» Як рабілі ператрус у мазырскага фэрмэра, сюжэт пра якога здымаў Ціханоўскі
У вёсцы Прудок пад Мазыром у прыватным доме фэрмэра Аляксандра Вянгуры адбыўся начны ператрус. Пра Вянгуру раней здымаў сюжэт Сяргей Ціханоўскі.
«Тэрор быў страшны! Наляцелі 18 міліцыянтаў, але ўсе ў цывільным, увесь дом — і мой, і маці паставілі дагары нагамі», — сказаў Аляксандар Вянгура Свабодзе. Далей чытайце па спасылцы.
Правяраем, ці прывозяць на пікеты людзей, як сказаў Лукашэнка. ВІДЭА
Прадстаўляючы новы ўрад, Аляксандар Лукашэнка назваў чэргі паставіць подпіс за альтэрнатыўных яму прэтэндэнтаў у прэзыдэнты «вялікай і малой карусэльлю». Карэспандэнты Свабоды выправіліся да Камароўскага рынку ў Менску ды пагутарылі зь людзьмі ў чэргах.
У Горадні затрымалі валянтэра і каардынатарку ініцыятыўнай групы Ціханоўскай
Валянтэра ініцыятыўнай групы па зборы подпісаў Сьвятланы Ціханоўскай Уладзімера Кнігу затрымалі на пікеце ў Горадні 4 чэрвеня. Пра гэта Свабодзе паведаміла каардынатарка ініцыятыўнай групы Вольга Каракіна. Падставы затрыманьня ёй невядомыя. Міліцыянты пасадзілі Кнігу ў шэры мікрааўтобус каля Савецкай плошчы.
Пазьней затрымалі і саму Вольгу Каракіну — яе міліцыя забрала зь мінірынку на вуліцы Паповіча ў Горадні. Яна там працавала. Вольга Каракіна — дзяўчына затрыманага 29 траўня ў Горадні Зьмітра Фурманава. Падрабязнасьці па спасылцы.
Чаго нельга рабіць падчас збору подпісаў за кандыдата ў прэзыдэнты. Тлумачым
Ужо за першыя некалькі дзён за Лукашэнку сабралі больш за 200 тысяч подпісаў, а на пікетах Ціханоўскай падпісваюцца тысячы людзей у розных гарадах. Сабралі для вас парады, як кандыдатам сабраць патрэбныя подпісы і не парушыць асноўных правілаў падчас перадвыбарчай кампаніі.
Лукашэнка заявіў пра «карусэлі» пры зборы подпісаў за вылучэньне кандыдатаў
Кіраўнік Беларусі Аляксандар Лукашэнка 4 траўня, абвясьціўшы новы склад ураду, заявіў пра адсутнасьць «новага пратэставага руху» ў Беларусі і пра тое, што подпісы за кандыдатаў зьбіраюць так званымі «карусэлямі», паведамляе БелТА.
«А гэтыя чэргі — гэта малая беларуская карусэль, як я яе называю, і вялікая беларуская карусэль. Сутнасьць малой у тым, што тут яны расьпісаліся, потым зноў сталі ў гэтую чаргу ў хвост, яшчэ расьпісаліся... Нават дастукаліся да таго (мэр Менску заўважыў), што на аўтамабілях падвозяць людзей. Расьпісаліся, пайшлі, селі, яны іх па квартале абвезьлі, зноў паставілі іх у чаргу», — заявіў Лукашэнка. Цалкам чытайце па спасылцы.
«Думаю, іх маглі падкінуць». Сьвятлана Ціханоўская патлумачыла знойдзеныя сьледчымі 900 тысяч даляраў
Прэтэндэнтка на вышэйшую пасаду Сьвятлана Ціханоўская ў размове з карэспандэнтам Свабоды назвала правакацыяй знойдзеныя 900 тысяч даляраў на лецішчы, якое належыць маці яе мужа, затрыманага блогера Сяргея Ціханоўскага.
«Я проста ў шоку! — плача Сьвятлана. — Мы з хлеба на ваду перабіваемся, а тут такія грошы! Маці Сяргея 71 год, яе ноч марнавалі, і яна перахвалявалася. Калі пачалі даставаць даляры, яна сказала, што „гэта мы з сынам зараблялі“, бо ня ведала і ня бачыла, колькі там. Маці Сяргея, калі хвалюецца, бянтэжыцца, усё забывае, тым больш да гэтага ноч ня спала».
У канцы Сьвятлана абурылася, як у «гэтых людзей (міліцыянтаў. — РС) хапае сумленьня так абыходзіцца» зь Сяргеем і ягонай сям’ёй.
Ярмошына зьвярнулася ў Сьледчы камітэт, пабачыла пагрозы сабе
Лідзія Ярмошына адзначыла, што на пікеце Сьвятланы Ціханоўскай пачула пагрозу сабе — слова «прыхлопнуць» ды іншыя эпітэты. Гэта можна ўспрыняць як «пагрозу забойства», дадала яна.
Таксама чыноўніца пабачыла пагрозу ў тым, што каля ейнага дому зьбіраліся зладзіць пікет у зборы подпісаў за Ціханоўскую і закліку «зайсьці ў госьці» да яе.
Ярмошына падрыхтавала зварот у Сьледчы камітэт з просьбай праверыць, ці не ўкладваюцца гэтыя дзеяньні ў «перашкоду ажыцьцяўленю выбарчых правоў» (арт. 191 КК РБ).
ЦВК адхіліла скаргі Бабарыкі, здымаць з выбараў Лукашэнку адмовілася
Цэнтральная выбарчая камісія Беларусі сабралася 4 чэрвеня на паседжаньне для разгляду «некаторых зваротаў», якія паступілі ў ЦВК. Гайдукевічу дазволілі зьняцца з выбараў, на ўсе скаргі Бабарыкі адказалі адмовай.
За тое, каб прызнаць скаргі Бабарыкі неабгрунтаванымі, чальцы камісіі прагаласавалі аднагалосна. Закон не прадугледжвае абскарджаньня пастановы.
Ярмошына адзначыла, што юрысты ЦВК цяпер працуюць амаль толькі на групу Бабарыкі. Заявы Бабарыкі Ярмошына яшчэ да прыняцьця рашэньня ЦВК назвала «ўкідамі».
«Пасьля пятага ператрусу знайшлі Зянона Пазьняка». Як сацсеткі адрэагавалі на знойдзеныя ў Ціханоўскага $900 тысяч
У гомельскім доме блогера Сяргея Ціханоўскага, кіраўніка ініцыятыўнай групы прэтэндэнткі на кандыдата ў прэзыдэнты Сьвятланы Ціханоўскай, сьледчыя выявілі 900 тысяч даляраў, паведаміў Свабодзе 4 чэрвеня паплечнік Ціханоўскіх Аляксандар Кабанаў. Пазьней інфармацыю пацьвердзілі ў Міністэрстве ўнутраных спраў Беларусі. У сацыяльных сетках гэтае паведамленьне ўспрынялі зь недаверам і сарказмам.
Бабарыка атрымаў скаргі на прымусовы збор подпісаў за яго
Патэнцыйны кандыдат у прэзыдэнты Віктар Бабарыка заявіў, што яму паведамілі аб загадзе здаваць подпісы за вылучэньне ягонай кандыдатуры. Дзе менавіта такое адбылося, ён не паведаміў, але заявіў, што будзе скардзіцца на такое ў пракуратуру. Раней Бабарыка падаваў у ЦВК скаргу на прымусовы збор подпісаў за Аляксандра Лукашэнку.
«У гомельскім доме Сяргея Ціханоўскага сьледчыя выявілі 900 тысяч даляраў», — каардынатар кампаніі Ціханоўскай
Пра гэта Свабодзе расказаў паплечнік Ціханоўскіх Аляксандар Кабанаў. Паводле яго інфармацыі, пералічваньне купюраў працягваецца дагэтуль.
«Я магу паведаміць толькі тое, што мне вядома на гэты момант, — кажа Аляксандар Кабанаў. — Інфармацыю маю ад людзей, якія знаходзяцца на месцы вобшуку. Перапіс купюр яшчэ працягваецца. Іх знайшлі ўначы, прыкладна паміж 1-й і 4-й гадзінамі.
Грошы знайшла ўжо трэцяя сьледчая брыгада, якая прыехала на месца. Яны зьмяняліся на працягу ўсяго пэрыяду вобшуку. Панятыя таксама зьмяняліся, у дом нікога не пускалі. Разам з маці Сяргея Ціханоўскага ў якасьці панятых на месцы вобшуку хацелі прысутнічаць яго знаёмыя і сябры, але ім адмовілі.
Трэцяя брыгада сьледчых знайшла частку грошай у адным месцы, яшчэ частку — у другім. Гэта не былі нейкія таемныя месцы. Там ужо праводзілі вобшук і раней нічога не знайшлі».
«Рэжым можа запанікаваць», — аўтар кнігі пра Беларусь як апошнюю дыктатуру Эўропы
На пытаньні Свабоды пра прэзыдэнцкія выбары адказвае Эндру Ўілсан, прафэсар украінскіх дасьледаваньняў ва Ўнівэрсытэцкім каледжы Лёндану, старшы аналітык Эўрапейскай рады міжнародных дачыненьняў, аўтар кнігі «Беларусь: Апошняя эўрапейская дыктатура».
Сьцісла:
- Нас чакаюць цікавыя выбары, незалежна ад таго, ці будзе ў іх цікавы вынік.
- Бабарыка і Цапкала ставяць пад сумнеў балянсаваньне, якое трымае гэты рэжым шмат гадоў, — расейскія субсыдыі ў абмен на паслугі ў замежнай палітыцы.
- Расея можа ў нейкай ступені падтрымліваць альтэрнатыўных кандыдатаў як папярэджаньне Лукашэнку.
- Трэба быць гатовымі да новых тыпаў фальсыфікацый і палітычных рэпрэсій.
- Лукашэнка наўрад ці дазволіць некаму быць большым папулістам і славянафілам, чым ён сам.
- Ціханоўскі падобны да Лукашэнкі ў 1994 годзе, але ў сучасных умовах. Ён трапляе ў настрой тых людзей, якія пратэставалі ў 2017-м.
- Байкот можа быць эфэктыўны, калі папулярныя кандыдаты выключаныя з выбараў, калі існуе расчараваньне ў эканамічных пэрспэктывах і калі эпідэмія каранавірусу працягне бушаваць і людзі ня змогуць бясьпечна галасаваць.
- Праблема байкоту ў тым, што ён пасіўны, а пратэст пасьля выбараў актыўны. Часам цяжка пераключыцца з аднаго на другое.
Бабарыка выказаўся пра затрыманьне Ціханоўскага і саюзную дзяржаву з Расеяй
Тое, што адбываецца зь відеаблогерам Сяргеем Ціханоўскім, незаконна і правакацыйна, заявіў прэтэндэнт на пасаду прэзыдэнта Віктар Бабарыка на сустрэчы з чальцамі сваёй ініцыятыўнай групы ў Гомлі.
«Я бачу, што тут фармуецца грамадзянская супольнасьць. Гомель нарадзіў стваральніка валянтэрскай ініцыятывы дапамогі лекарам ByCovid19 Андрэя Стрыжака. І змагара Сяргея Ціханоўскага», — адзначыў ён.
Два магілёўцы «адклікалі» подпісы за Лукашэнку — заявілі, што зьбіралі пад пагрозамі
Два жыхары магілёўскіх інтэрнатаў падалі 2 чэрвеня заявы ў выбарчую камісію аб адкліканьні сваіх подпісаў за вылучэньне кандыдатам у прэзыдэнты Аляксандра Лукашэнкі.
У заявах яны сьцьвярджаюць, што 26 траўня да іх дамоў прыйшлі працаўнікі інтэрнату з патрабаваньнем падпісаццца за вылучэньне Лукашэнкі.
Гарбузава (імя не называецца) ў заяве сьцьвярджае, што подпісы зьбіраў вахцёр і загадчыца інтэрнату. Яна падпісалася, бо яна жыве ў інтэрнаце з трыма дзецьмі, чакае пераезду ў новую кватэру, але там пакуль вядзецца рамонт. Яна патрабуе адклікаць свой подпіс, бо, піша, «уся мая сям’я хоча жыць у цывілізаванай і нармальнай краіне». Свой ліст яна завяршае словамі «Жыве Беларусь».
Нікіцёнак (імя таксама не называецца) сьцьвярджае, што ў яго падпісацца за Лукашэнку патрабаваў вахцёр інтэрнату. Ён піша, што быў вымушаны падпісацца, але «раскайваецца ў сваім учынку» і просіць адклікаць подпіс.
«Я хачу жыць годна, — завяршае Нікіцёнак свой ліст. — За Беларусь!»
Затрымалі аўтара каналу «Мозырь для жизни». Рабілі начны ператрус у фэрмэра, якога здымаў Ціханоўскі
У Мазыры затрымалі Аляксандра Цуканава — аўтара Youtube-каналу «Мозырь для жизни», які толькі 2 чэрвеня быў вызвалены пасьля 25 сутак арышту за сустрэчу з блогерам Сяргеем Ціханоўскім. Затрыманы таксама сябар Цуканава па імені Дзяніс (прозьвішча пакуль невядомае), які прыходзіў падтрымаць яго на судзе і сустракаў з ізалятару.
У вёсцы Прудок Мазырскага раёну сярод ночы праваахоўнікі пачалі ператрус у гаспадарцы фэрмэра Аляксандра Сіраша, які даваў камэнтары блогеру Сяргею Ціханоўскаму для каналу «Страна для жизни». Менавіта ў Сіраша Ціханоўскі здымаў «інтэрвію» са сьвіньнямі.
Бабарыка: Наша мэта — падняць тыя 40%, якія не зьбіраюцца ісьці на выбары
На сустрэчы з ініцыятыўнай групай патэнцыйны кандыдат у прэзыдэнты Віктар Бабарыка сказаў, што мэта яго і каманды — «падняць тыя 40%, якія сёньня адказваюць, што адназначна не ідуць на выбары або пакуль сумняваюцца».
Ці адмовіцца Масква ад Лукашэнкі
Якую пазыцыю зойме, ужо займае Расея падчас цяперашніх выбараў у Беларусі, ці будзе падтрымліваць нейкага пэўнага кандыдата? Якіх кандыдатаў на беларускіх выбарах Масква ўспрымае як сваіх ворагаў? Ці можа абвяшчэньне канстытуцыйнага рэфэрэндуму ў Расеі прывесьці да рэзкага абвастрэньня там палітычнай сытуацыі? Гэтыя тэмы ў Праскім акцэнце абмяркоўваюць дырэктар расейскай службы Радыё Свабода Андрэй Шары, Сяргей Навумчык і Юры Дракахруст.