«Абвінавачаньне вытхнулася». Юрыст пра крымінальную справу супраць Ціханоўскага
Праваабаронца і юрыст незарэгістраванага цэнтра «Вясна» Валянцін Стэфановіч у размове са Свабодай пракамэнтаваў крымінальную справу супраць Сяргея Ціханоўскага і яоных паплечнікаў.
«Апошні раз гэты артыкул Крымінальнага кодэксу прымянялі ў 2010 годзе, — сказаў Стэфановіч. — Тады частку арыштаваных абвінавацілі ў арганізацыі масавых беспарадкаў, а частку паводле больш мяккага артыкулу, акурат 342-га. Групавыя дзеяньні ў арганізацыі масавых беспарадкаў, зьвязаныя зь непадпарадкаваньнем міліцыі, якія пацягнулі за сабой спыненьне працы транспарту і іншае. Праўда, тады не было зразумела, як яны падзялялі адказнасьць. Хто арганізоўваў масавыя беспарадкі, а хто групавыя дзеяньні, якія парушылі грамадзкі парадак. Так і засталося гэта незразумелым». Цалкам чытайце па спасылцы.
Лукашэнка сабраў сілавікоў з нагоды выбараў і расказаў, як адрэагуе на «Плошчу»
Аляксандар Лукашэнка падчас нарады ў пытаньнях дзейнасьці дзяржаўных органаў нацыянальнай бясьпекі паставіў ім задачу захаваць стабільнасьць у краіне, забясьпечыць законнасьць і правапарадак, паведамляе БелТА.
«Дэмакратыя дэмакратыяй, але сваволі быць не павінна, — казаў Лукашэнка. — І ня будзе. Вы бачылі, у ЗША, Заходняй Эўропе як супэрдэмакратычныя дзяржавы абышліся з пратэстоўцамі. Галоўная задача дзяржаўных органаў сыстэмы нацыянальнай бясьпекі — захаваць стабільнасьць у краіне, забясьпечыць законнасьць і правапарадак. Тое, чаго ад вас патрабуюць Канстытуцыя і закон». Цалкам чытайце па спасылцы.
Ціханоўскаму і яго паплечнікам выставілі абвінавачаньне ў «падрыхтоўцы парушэньня парадку». Пагражае да 3 гадоў турмы
Увечары 8 чэрвеня скончыўся 10-дзённы тэрмін знаходжаньня Сяргея Ціханоўскага пад вартай. 9 чэрвеня Сьледчы камітэт Беларусі паведаміў, што Сяргея Ціханоўскага абвінавацілі паводле часткі 1 артыкулу 342 КК (арганізацыя і падрыхтоўка дзеяньняў, якія груба парушаюць грамадзкі парадак).
Такое ж абвінавачаньне выставілі яшчэ сямі асобам, якія праходзяць у «справе Ціханоўскага». Яны ўсе ўзятыя пад варту з санкцыі пракурора. Паводле ч. 1 арт. 342 могуць прысудзіць штраф, арышт, абмежаваньне або пазбаўленьне волі на тэрмін да 3 гадоў. Артыкул цалкам чытайце па спасылцы.
Дзьмітрыеў прапанаваў іншым удзельнікам выбараў вылучэньне ў камісіі ад «Гавары праўду»
Прэтэндэнт на найвышэйшую пасаду Андрэй Дзьмітрыеў прапанаваў астатнім патэнцыйным кандыдатам аб’яднаць намаганьні дзеля вылучэньня як мага большай колькасьці сваіх прадстаўнікоў у склад участковых выбарчых камісій.
Лідэр «Гавары праўду» перакананы, што гэта дасьць шанец паўплываць на падлік галасоў. Першым крокам стаў сайт naziranne.by. Далей чытайце па спасылцы.
Сяргей Ціханоўскі прабудзе за кратамі да дня выбараў
Блогеру афіцыйна прад’явілі абвінавачваньне. Артыкул Крымінальнага кодэксу назавуць заўтра, 9 чэрвеня.
Увечары 8 чэрвеня скончыўся 10-суткавы тэрмін знаходжаньня Сяргея Ціханоўскага пад вартай. Каардынатар кампаніі Сьвятланы Ціханоўскай Аляксандар Кабанаў паведаміў Свабодзе, што дакладны артыкул Крымінальнага кодэксу, па якім абвінавачваецца Ціханоўскі, будзе агучаны СК 9 чэрвеня.
«Сёньня Сяргею прад’явілі абвінавачваньне, аб гэтым паінфармавалі адвакатаў і родных Сяргея, — расказаў Кабанаў у размове са Свабодай. — Тэрмін яго ўтрыманьня пад вартай працягнуты на два месяцы. Артыкул абвінавачваньня, як паведамілі сьледчыя, будзе афіцыйна агучаны 9 чэрвеня».
45 сутак арышту запар. Прыхільніка Ціханоўскага ня выпусьцілі пасьля месяца за кратамі
Юрыя Ўласава затрымалі 7 траўня пасьля акцыі падтрымкі Сяргея Ціханоўскага. Суд пакараў яго арыштам на 15 сутак за «несанкцыянаванае масавае мерапрыемства». На свабоду пасьля гэтага арышту Юры ня выйшаў — яму дадалі яшчэ 15 сутак.
Ня выйшаў ён і 6 траўня, калі скончыліся другія 15 сутак. Сёньня стала вядома, што над ім прайшоў чарговы суд — за дробнае хуліганства і непадпарадкаваньне міліцыі. У ІЧУ паведамілі, што Ўласаў будзе пад арыштам да 21 чэрвеня. Гэта значыць, што яго трэці раз асудзілі на 15 сутак.
«Ён адзін з найбольш спрактыкаваных палітыкаў сьвету». Маладыя прыхільнікі Лукашэнкі расказалі, за што цэняць кіраўніка краіны
Падчас відэастрыму зь пікету для збору подпісаў за вылучэньне Аляксандра Лукашэнкі ў кандыдаты на прэзыдэнта журналіст Свабоды цікавіўся, за што кіраўніка краіны паважаюць ягоныя прыхільнікі. Абсалютная большасьць апытаных адмаўляліся пра гэта гаварыць у нашым жывым эфіры.
Свабода знайшла тых, хто не пабаяўся пра гэта сказаць адкрыта. Чытайце матэрыял па спасылцы.
Збор подпісаў: Цапкала заявіў пра 119 тысяч, Чэрачань — 75, Кісель — 74, Канапацкая — 72, Дзьмітрыеў — 60
Ініцыятыўныя групы трох патэнцыйных кандыдатаў у прэзыдэнты па стане на 8 чэрвеня заявілі пра збор больш як 100 тысяч подпісаў, неабходных ля вылучэньня кандыдатам: Віктара Бабарыкі, Аляксандра Лукашэнкі і Валера Цапкалы.
- Віктар Бабарыка раней заявіў, што на вечар 7 чэрвеня ініцыятыўная група пацьвердзіла 167 тысяч подпісаў, працягвае падлік сабраных і збор новых подпісаў.
- У штабе ініцыятыўнай групы былога кіраўніка Парку высокіх тэхналёгіяў Валера Цапкалы паведамілі Onliner.by, што на 8 чэрвеня налічылі 119 тысяч подпісаў.
- Штаб старшыні БСДГ Сяргея Чэрачня паведаміў Naviny.by 8 чэрвеня пра 75 тысяч сабраных подпісаў.
- Штаб прадпрымальніцы Натальлі Кісель заявіў Tut.by 8 чэрвеня пра 74 тысячы подпісаў.
- Экс-дэпутатка Палаты прадстаўнікоў Ганна Канапацкая заявіла 8 чэрвеня на Facebook пра 72 тысячы сабраных подпісаў.
- Лідэр «Гавары праўду» Андрэй Дзьмітрыеў заявіў 8 чэрвеня на Facebook пра 60 тысяч сабраных подпісаў.
- За Аляксандра Лукашэнку, як заявіў кіраўнік ягонага штабу 6 чэрвеня, сабралі «каля мільёну» подпісаў.
Іншыя патэнцыйныя кандыдаты паведамлялі пра колькасьць сабраных подпісаў толькі ў сярэдзіне мінулага тыдня. Цалкам чытайце па спасылцы.
Севярынцу — 15 сутак. Жонку з малым сынам не пусьцілі на суд
Сустаршыню БХД Паўла Севярынца прысудзілі 15 сутак адміністрацыйнага арышту. Судзьдзя палічыў, што Севярынец 7 чэрвеня ўдзельнічаў у несанкцыянаванай вулічнай акцыі ў Менску, каля Камароўскага рынку. У гэты дзень прадстаўнікі 8 ініцыятыўных груп зьбіралі подпісы за сваіх прэтэндэнтаў у кандыдаты на прэзыдэнта. Цалкам чытайце па спасылцы.
Старшыню недзяржаўнай Беларускай асацыяцыі журналістаў уключылі ў раду па інфармацыйных спрэчках на выбарах-2020
Як піша БелаПАН, у раду пры Цэнтральнай выбарчай камісіі ўвайшоў адзін прадстаўнік недзяржаўных мэдыя: старшыня БАЖ Андрэй Бастунец.
У складзе рады таксама экс-міністарка інфармацыі і дэпутатка Лілія Ананіч, прадстаўнікі Белтэлерадыёкампаніі Антон Васюкевіч і Глеб Шульман, намесьнік дырэктара выдавецкага дому «Беларусь сегодня» Міхаіл Лябедзік. Старшыня рады — першы намесьнік міністра інфармацыі Павал Лёгкі, віцэ-старшыня — намесьнік кіраўніка праўладнага «Беларускага саюзу журналістаў» Сяргей Сьвяркуноў.
Рашэньні рады ня маюць абавязковага характару. Рада толькі можа «даваць рэкамэндацыі, заключэньні ў пытаньнях выкарыстаньня СМІ ў пэрыяд выбараў».
«Мне вельмі крыўдна». Звальняюць фэльчара «хуткай» зь Ліды, які адседзеў «суткі» за стрым Ціханоўскага
Павал Палейчык лічыць, што прычынай гэтага стала яго палітычная актыўнасьць. Пасьля вызваленьня з «сутак» Павал вярнуўся да працы і некалькі тыдняў не меў ніякіх праблем. Аднак на пачатку чэрвеня яго выклікалі ў аддзел кадраў і ўручылі паведамленьне аб непрацягненьні кантракту. Апошнім працоўным днём Паўла на лідзкай «хуткай» стане 9 ліпеня.
«Пакуль ня бачу сур'ёзных прыкмет, што сыстэма затрашчала», — сацыёляг Манаеў
Сацыёляг Алег Манаеў расказвае пра сваю эміграцыю ў ЗША, заяўляе, што лукашэнкаўская Беларусь пакуль нікуды не падзелася, разважае пра цяперашні рэйтынг Лукашэнкі і пра тое, хто і чаму будзе за яго галасаваць, а таксама тлумачыць, навошта ён купіў сабе зброю.
Сьцісла:
- Пакуль у Беларусі ня зьменіцца ўлада, я не магу вярнуцца.
- «Глыбінная» Амэрыка стала фармаваць «народнае апалчэньне» для абароны парадку і ўласнасьці.
- Я таксама нарэшце ўзброіўся: з 9-мілімэтровым Smith and Wesson і двума магазінамі на 35 патронаў сьпіш спакайней.
- «Беларусь Лукашэнкі» нікуды не падзелася.
- Раскол беларускага грамадзтва ня зьнік, за гады кіраваньня Лукашэнкі ён толькі ўзмацніўся.
- Паўстала новая кіроўная кляса, якая ўключае ў сябе дзяржаўную бюракратыю, сілавікоў і «прыдворны» бізнэс.
Праваабаронцы заявілі пра рост рэпрэсій і нагнятаньне страху падчас выбарчай кампаніі
Экспэрты кампаніі «Праваабаронцы за свабодныя выбары» апублікавалі чарговы тыднёвы маніторынг прэзыдэнцкай кампаніі. Ён тычыцца этапу збору подпісаў ініцыятыўнымі групамі ў вылучэньні кандыдатаў у прэзыдэнты Беларусі цягам 1—7 чэрвеня.
Назіральнікі адзначаюць, што найбольшую ўвагу выбарнікаў і СМІ прыцягваюць Віктар Бабарыка, Валер Цапкала і Сьвятлана Ціханоўская, пры гэтым асабліва нэгатыўную рэакцыю ўладаў, у тым ліку і кіраўніка дзяржавы, выклікалі пікеты ініцыятыўнай групы Ціханоўскай.
У розных гарадах Беларусі цягам тыдня адбываліся затрыманьні і арышты актывістаў. Іх абвінавачваюць ва ўдзеле ў «несанкцыянаваных масавых мерапрыемствах», а менавіта ў пікетах, якія адбываліся ў месцах, не забароненых рашэньнямі выканаўчых органаў улады.
Ад моманту затрыманьня ў Горадні 29 траўня блогер Сяргей Ціханоўскі і яшчэ сем чалавек (чацьвёра зь іх сябры ініцыятыўнай групы Сьвятланы Ціханоўскай) знаходзяцца ў СІЗА Менску ў якасьці падазраваных у крымінальнай справе аб гвалце ў дачыненьні да супрацоўніка міліцыі.
Пры гэтым збор подпісаў за вылучэньне кандыдатам у прэзыдэнты дзейнага кіраўніка дзяржавы суправаджаецца шматлікімі паведамленьнямі пра выкарыстаньне адміністрацыйнага рэсурсу.
«Ён мае права на звычайнае нармальнае жыцьцё», — Цапкала пра гарантыі першаму прэзыдэнту
У выпадку адстаўкі першага прэзыдэнта яму трэба забясьпечыць жыцьцё звычайнага чалавека і паклапаціцца пра яго бясьпеку, выказаўся прэтэндэнт у прэзыдэнты Валер Цапкала ў інтэрвію на Youtube-канале «Баренцева».
«Я б лічыў, што першы прэзыдэнт мае права на звычайнае нармальнае жыцьцё, дзе, магчыма, яму б варта было пакінуць адну зь яго рэзыдэнцый, дзе ён мог бы вырошчваць бульбу, кавуны, каровак — тое, што, у прынцыпе, яму падабаецца. Мог бы займацца выкладчыцкай дзейнасьцю, калі ён хацеў бы, мог бы кансультаваньнем займацца, — казаў Цапкала. — У прынцыпе, чалавек павінен весьці жыцьцё нармальнага грамадзяніна.
Але, вядома, напэўна, за дзяржаўны кошт, як гэта ў многіх краінах сьвету паступаюць. Магчыма, дзяржава магла б забясьпечыць яго аховай — адзін-два чалавекі. Таму што ня ўсім людзям падабалася, як ён дзяржавай кіруе».
Паводле Цапкалы, «мы павінны паспрабаваць рухацца нармальна, рабіцца нармальнай цывілізаванай краінай, ня помсьціць папярэдняму кіраўніку».
Бабарыка: пацьвердзілі 167 тысяч подпісаў, і «гэта яшчэ ня ўсё»
Патэнцыйны кандыдат у прэзыдэнты, банкір Віктар Бабарыка заявіў на Facebook вечарам 7 чэрвеня, што ягоная ініцыятыўная група пацьвердзіла 167 тысяч сабраных подпісаў за вылучэньне яго кандыдатам у прэзыдэнты.
Бабарыка адзначае, што гэтыя 167 тысяч — «гэта яшчэ ня ўсё». Значная частка падпісных лістоў пакуль не пацьверджаная, а наперадзе цэлы тыдзень, піша ён. Але ўжо заяўляе пра нагоду ганарыцца і адзначыць маленькую перамогу.
«Але памятайце аб захаваньні пальчатачна-масачнага рэжыму і аб неабходнасьці запаўняць зьвесткі толькі па прадстаўленьні пашпарту! — заклікаў патэнцыйны кандыдат. — Пачасьціліся выпадкі правакаваньня на запаўненьне лістоў па фатакопіі!»
Сьвятлана Ціханоўская дала першае тэлеінтэрвію
Вылучэнка ў кандыдаты ў прэзыдэнты Беларусі Сьвятлана Ціханоўская дала кароткае тэлевізійнае інтэрвію расейскаму каналу «Дождь».
У ім жонка арыштаванага блогера Сяргея Ціханоўскага ў чарговы раз выказала сумнеў, што 900 000 даляраў, якія, нібыта знайшлі сьледчыя падчас трэцяга вобшуку на лецішчы яе мужа пад Гомлем, належаць менавіта яму.
На пытаньне вядучага, ці падкінулі гэтыя грошы Сяргею Ціханоўскаму, Сьвятлана патлумачыла, што ня можа гэтага сьцьвердзіць, паколькі гэта можа быць расцэнена як абвінавачваньне праваахоўнікаў.
«Я вельмі сумняваюся ў тым, што ён мог зарабіць гэтыя грошы. (...) Калі б былі такія грошы — у сям’і ці ў Сяргея, — то напэўна ён бы не змагаўся за нейкія правы простага народа», — сказала Сьвятлана Ціханоўская.
Старшыня КДБ хадзіў да Лукашэнкі з дасье пэнсіянэркі, якая праславілася пасьля стрыму Ціханоўскага
КДБ зьбіраў для Лукашэнкі дасье на горадзенскую пэнсіянэрку, якая праславілася пасьля стрыму Сяргея Ціханоўскага.
Кіраўнік Камітэту дзяржбясьпекі Валеры Вакульчык паказаў журналістам дзяржаўнага тэлеканалу АНТ «справу бабулі» з Горадні, якая мае «два дамы на адной тэрыторыі».
«Бедалажка», — пакпіў з пажылой жанчыны генэрал-лейтэнант.
Паперы аказаліся ў адным партфэлі зь іншымі «гучнымі справамі», якія тычацца затрыманьня 29 траўня ў Горадні блогера Сяргея Ціханоўскага і ягоных прыхільнікаў. Неўзабаве пасьля дакладу пра горадзенку выказаўся і Аляксандар Лукашэнка.
Як пісала Свабода, 81-гадовая вэтэран працы Галіна Андрэйчык праславілася двойчы. Першы раз, калі 29 траўня ў Горадні дала інтэрвію Сяргею Ціханоўскаму. Назвала яго ў адказ «сынком» і выказалася крытычна ў дачыненьні да Аляксандра Лукашэнкі і ўладаў.
Другі раз слава знайшла яе ў эфіры БТ 4 чэрвеня, калі з дрона паказалі дом, дзе яна жыве, і агучылі сьпіс прыватнай маёмасьці: кватэра ў цэнтры Горадні, катэдж, «дзьве недабудаваныя фазэнды», мікрааўтобус мінімум за 25 тысяч даляраў. Сыноў назвалі беспрацоўнымі.
На Галіну Філіпаўну зьвярнуў увагу і кіраўнік краіны. Маўляў, 80-гадовая жанчына ў Горадні «крычала, гарлала», а сама жыве ў «палацы».
«Чаго табе не хапае?» — задаў ён рытарычнае пытаньне.
Галіна Філіпаўна не хавае сваю ўласнасьць. І не разумее, чаму мусіць за гэта апраўдвацца. У яе ёсьць катэдж, які яна пабудавала ў 1990-х гадах. Дом будавалі 38 гадоў, сваімі рукамі. Грашыма сям’і дапамагалі сваякі з Аўстраліі, якія эмігравалі туды пасьля вайны.
У Магілёве падпісвацца за альтэрнатыву Лукашэнку прыходзілі сем’ямі
7 чэрвеня ў Магілёве на пляцоўцы ля гандлёвага цэнтру «Атрыюм» за 200 мэтраў ад гарвыканкаму зьбіралі подпісы ў падтрымку альтэрнатыўных вылучэнцаў на прэзыдэнцтва: Віктара Бабарыку, Валера Цапкалу, Андрэя Дзьмітрыева, Сяргея Чэрачня, Сьвятлану Ціханоўскую.
Ахвотнікі падпісацца за прэтэндэнтаў на вышэйшую дзяржаўную пасаду выстройваюцца ў доўгія чэргі. Найбольшая з іх была за Ціханоўскую. Яна расьцягвалася да 70 мэтраў. Людзі выстойвалі ў ёй да 45 хвілінаў. Падпісаўшыся за Ціханоўскую, яны становяцца ў чаргу да іншых вылучэнцаў.
«Падзеі апошняга часу з затрыманьнямі, арыштамі і вобшукамі сьведчыць, што ў дзейнага прэзыдэнта ня вытрымалі нэрвы. Рэпрэсіі супраць тых хто яго не падтрымлівае — гэта тое адзінае, што ён можа прапанаваць людзям», — адзначалі суразмоўцы карэспандэнта Свабоды.
Праваабаронцы: На Камароўку прышлі паставіць подпісы больш за 700 чалавек
Праваабаронцы падлічылі, колькі чалавек прышлі 7 чэрвеня на Камароўку, каб паставіць подпісы за вылучэньне прэтэндэнтаў у прэзыдэнты.
Паводле стану на 12.30, каб здаць подпісы за патэнцыйных кандыдатаў, на пляцоўцы ля Камароўскага рынку адначасова стаяць больш за 700 чалавек.
Прыйшоў да Камароўскі і 83-гадовы мянчук Ян Грыб. Многія памятаюць, як падчас Дня Волі ў 2017 годзе, калі адбыўся жорсткі разгон, яго затрымлівала цэлая брыгада спэцназаўцаў.Тады ж Ян Грыб здолеў зьбегчы з аўтазака.
Ён сказаў, што пэрсанальна прынёс свае галасы Мікалаю Казлову, а таксама Віктару Бабарыку, Валерыю Цапкалу і ўсім тым, хто змагаецца з дыктатурай.
«Няхай усе ведаюць, што ў жылах зьнешне ціхіх, пакорлівых беларусаў цячэ кроў гордых ліцьвінаў», — нагадаў ён, выказаўшы перакананасьць, што гэтым разам беларусы мусяць абудзіцца.
Сустаршыня Беларускай хрысьціянскай дэмакратыі Вольга Кавалькова паведаміла, што быў затрыманы сябра яе ініцыятыўнай групы Валянцін Фралоў. Магчыма, гэта яго яшчэ да пачатку пікетаў у падтрымку прэтэндэнтаў гвалтам запхнулі ў міліцэйскі аўтобус.
На пікеце па зборы подпісаў за вылучэньне Андрэя Дзьмітрыева паведамілі, што за яго сабралі ўжо больш за 50 тысяч подпісаў. Раней Віктар Бабарыка заявіў, што ўжо сабраў 100 тысяч подпісаў за сваё вылучэньне.
Міліцыянты паспрабавалі спыніць імправізаваны мітынг, які арганізаваў вакол сябе Павал Севярынец. Але іх мякка адціснулі і тыя сышлі.