Як прадухіліць крывавы «Андыжан» у Беларусі?
Ці прывядуць цяперашнія пратэсты і іх здушэньне да праліцьця крыві? Хто зацікаўлены ў радыкалізацыі пратэстаў? Хто павінен рабіць крок назад ад мяжы, за якой — кроў?
Гэтыя тэмы ў «Праскім акцэнце» абмяркоўваюць палітычны аналітык Ян Аўсеюшкін і палітоляг, каардынатар праграмы «Замежная палітыка Беларусі» Рады міжнародных адносінаў «Менскі дыялёг» Дзяніс Мельянцоў.
Сьцісла
Аўсеюшкін
- Мы цяпер маем справу зь некіраваным пратэстам, асабліва ў рэгіёнах
- Калі ацэньваць арганізаванасьць і спантаннасьць цяперашніх пратэстаў у лічбах, то арганізаванасьці там ня больш за 10%
- Людзі відавочна не гатовыя да сілавога пратэсту, яны пакуль што прагнуць мірнага шляху
- Калі ўлада карыстаецца сілавым мэтадам, нават калі карыстаецца стрымана, гэта падвышае градус грамадзкага кіпеньня
Мельянцоў
- Улады сваю мяжу ведаюць і наўрад ці будуць яе пераходзіць, калі толькі пратэстоўцы не радыкалізуюцца настолькі, што ім трэба будзе супрацьстаяць са зброяй
- Штабы розных кандыдатаў — «затравачныя крышталі», як кажуць хімікі, для пратэсту
- Цяпер прэзыдэнцкая кампанія, і тут усё на кантролі на самым высокім узроўні, а там выдатна разумеюць усе кошты магчымага сілавога ці нават крывавага разгону
- Калі напал дойдзе да ўзброенага супрацьстаяньня, то ў такім выпадку трэба арганізоўваць нейкія фарматы пасярэдніцтва, каб не дапусьціць праліцьця крыві
«Траўма галавы і гематома пад вокам». Пасьля затрыманьня АМАПам хлопец у свой дзень народзінаў трапіў у шпіталь
19 чэрвеня менчуку Паўлу Стэльмаху споўніўся 31 год. Разам з двума сябрамі ён зьбіраўся адзначыць сьвята на Зыбіцкай. Але замест тусовачнай вуліцы апынуўся ў міліцыі, а потым і ў бальніцы.
Відэа ягонага затрыманьня шырока разышлося ў сацсетках. Пра абставіны хлопец расказаў Свабодзе.
Каго зарэгіструюць улады? Палітычны расклад пасьля збору подпісаў
Упершыню за ўсю гісторыю кіраваньня Лукашэнкі электаральны расклад — хто за каго з кандыдатаў прагаласуе — можа мець значэньне, піша палітычны аглядальнік Валер Карбалевіч, аналізуючы першы этап выбарчай кампаніі.
Сьцісла:
- Вялікая цікавасьць да выбараў паспрыяла таму, што адразу сем прэтэндэнтаў здалі ў выбарчыя камісіі больш за 100 тысяч подпісаў.
- Пытаньне, каго зарэгіструюць, улады будуць вырашаць не на прававым грунце, а з гледзішча палітычнай мэтазгоднасьці.
- Здаецца, самае лягічнае з гледзішча ўладаў рашэньне — зарэгістраваць усіх, каб галасы пратэставага электарату расьцерушыліся паміж апанэнтамі Лукашэнкі.
- Аднак, калі кандыдатаў будзе шмат, яны могуць забраць галасы ня толькі ў Бабарыкі, але і ў Лукашэнкі.
Магілёўскага будаўніка асудзілі як арганізатара «ланцуга салідарнасьці» за допіс у Telegram’е
39-гадовага муляра Аляксандра Сьпірыдонава асудзілі як арганізатара ланцуга салідарнасьці. Падставай стаў допіс у тэлеграм-канале «Могилёв для жизни».
На Сьпірыдонава склалі пратакол паводле 2-й часткі артыкула 23.34 «Парушэньне парадку арганізацыі ці правядзеньня масавых мерапрыемстваў». Паводле пратаколу, Сьпірыдонаў хацеў арганізаваць акцыю, аналягічную той, якая прайшла ў Менску 18 чэрвеня.
«Ланцуг салідарнасьці» адбыўся 19 чэрвеня на Першамайскай вуліцы ў цэнтры Магілёва. На яго прыйшлі больш за сто чалавек. Акцыя працягвалася больш за гадзіну, пакуль яе не разагналі амапаўцы. Аляксандра Сьпірыдонава затрымалі і да суду трое сутак трымалі ў ізалятары.
Каго зарэгіструюць улады? Палітычны расклад пасьля збору подпісаў
Упершыню за ўсю гісторыю кіраваньня Лукашэнкі электаральны расклад — хто за каго з кандыдатаў прагаласуе — можа мець значэньне, піша палітычны аглядальнік Валер Карбалевіч, аналізуючы першы этап выбарчай кампаніі. Чытайце па спасылцы.
«Выкінулі на ўскраіне, і зноў накінуліся трое ў цывільным». Як адбыў 45 сутак у ізалятары паплечнік Ціханоўскага
З 7 траўня па 21 чэрвеня праседзеў у гомельскім ізалятары часовага ўтрыманьня (ІЧУ) Юры Ўласаў, паплечнік Сяргея Ціханоўскага. У 45 сутак умясьціліся адзіночная камэра, адсутнасьць камунікацый, галадоўка, мэдытацыя, страта 12 кіляграмаў вагі. Пасьля месяца арышту Юрыя вызвалілі. На волі ён прабыў хвіліны паўтары.
«З ізалятара канваіры мяне завезьлі ў бязьлюднае месца, дзе на мяне накінуліся трое, і зноў паводле ілжывага абвінавачаньня я апынуўся ў ізалятары», — кажа Юры. Чытайце інтэрвію цалкам па спасылцы.
Зоаабаронцы прапанавалі дагляд жывёлаў затрыманых на пратэстах у Беларусі, шукаюць валянтэраў
Цэнтар па абароне жывёл «Анімалекс» падрыхтаваў памятку для гаспадароў хатніх жывёлаў, якія зьбіраюцца ўдзельнічаць у пратэстах у Беларусі, і шукае валянтэраў, гатовых даглядаць жывёлаў затрыманых.
Як адзначаюць у цэнтры, тыя, хто хоча выказаць сваю грамадзянскую пазыцыю падчас цяперашніх падзей у Беларусі, павінен быць гатовы да таго, што яго могуць затрымаць. «Калі ў вас пры гэтым ёсьць хатняя жывёла, яна можа застацца ізаляванай ад вас на нейкі час», дадаюць зоаабаронцы і прапануюць кароткую памятку, пра што варта паклапаціцца загадзя, а таксама дапамогу валянтэраў у выпадку затрыманьня. Падрабязнасьці па спасылцы.
Адвакат, якога не пускаюць да Віктара Бабарыкі, падаў скаргу ў Генэральную пракуратуру
Раніцай 22 чэрвеня адвакат Дзьмітры Лаеўскі спрабаваў трапіць у СІЗА КДБ да Віктара Бабарыкі. Яго не пусьцілі ў сувязі з каранавірусам.
«Сёньня я спрабаваў наведаць Віктара Дзьмітрыевіча. Мне ж трэба з чалавекам кантактаваць, каб працаваць. Мае дакумэнты, патрэбныя, каб атрымаць пропуск, не прынялі ў сувязі з эпідэмічнай сытуацыяй», — расказаў Лаеўскі Свабодзе.
Адвакат падаў у Генэральную пракуратуру скаргу на нядопуск да падабароннага. Паводле Лаеўскага, гэта адбываецца не ўпершыню і ня толькі ў справе Бабарыкі: «Зьвязваць такое толькі з гэтай справай ня варта», — сказаў адвакат.
Менскі бізнэсовец прапануе бясплатную адукацыю рэпрэсаваным і тым, хто адмовіўся чыніць рэпрэсіі
Генэральны дырэктар кампаніі Humathèq і дырэктар па разьвіцьці міжнароднай групы кампаніяў Apply Logistic Дзьмітры Чарнаморац прапануе рэпрэсаваным падчас выбарчай кампаніі і асобам, якія адмовіліся выконваць загады, скіраваныя супраць мірных грамадзянаў, атрымаць бясплатную адукацыю ў дзьвюх бізнэс-школах.
Чарнаморац хоча падтрымаць суайчыньнікаў, якія пацярпелі ад рэалізацыі сваіх законных канстытуцыйных правоў, а таксама парушэньняў правоў чалавека. Далей чытайце па спасылцы.
Суды за «ланцугі салідарнасьці» 22 чэрвеня. Абнаўляецца
У Беларусі 22 чэрвеня праходзяць дзясяткі судоў над удзельнікамі стыхійных «ланцугоў салідарнасьці». Толькі ў Менску вядома пра амаль чатыры дзясяткі працэсаў.
Паводле «Вясны», ужо вядома пра такія выракі паводле артыкулаў за «несанкцыянаванае мерапрыемства» або «непадпарадкаваньне міліцыі»:
- М. Арцюхоў — штраф 1350 рублёў (суд Савецкага раёну Менску, судзьдзя Марына Фёдарава);
- Леанід Чыркоў — штраф 1080 рублёў (суд Савецкага раёну Менску, судзьдзя Вера Галаўкова);
- Мікіта Аніскевіч — штраф 864 рублі (суд Савецкага раёну Менску, судзьдзя Сяргей Шаціла);
- Дзьмітры Мартыненка — штраф 810 рублёў (суд Партызанскага раёну Менску, судзьдзя Вольга Паўлоўская);
- Мікіта Старавойтаў — штраф 810 рублёў (суд Савецкага раёну Менску, судзьдзя Вера Галаўкова);
- В. Лукашэвіч — штраф 810 рублёў (суд Маскоўскага раёну Менску, судзьдзя Вольга Малашэнка);
- Сяргей Дробышаў — штраф 810 рублёў (суд Маскоўскага раёну Менску, судзьдзя Лідзія Целіца);
- Г. Юр’еў — штраф 540 рублёў (суд Партызанскага раёну Менску, судзьдзя Натальля Дзядкова).
У Сан-Францыска 150 беларусаў сталі ў ланцуг салідарнасьці
150 беларусаў Сан Францыска і Бэй Эрыі прыйшлі ў нядзелю на пікет салідарнасьці, стаўшы ў ланцуг уздоўж будынка галоўнага порту Сан Францыска (San Francisco Ferry Building).
Ланцуг расьцягнуўся на 180 мэтраў. Людзі пляскалі ў далоні, скандавалі «Адпусьці», «Жыве Беларусь», тлумачылі мінакам, чаму прысьвечана акцыя. Шмат фота глядзіце па спасылцы.
У Маладэчне пачалі крымінальную справу за сутычку зь міліцыяй на «ланцугу салідарнасьці» 19 чэрвеня
Сьледчы камітэт пацьвердзіў парталу Tut.by, што адносна ўдзельнікаў сутычкі зь міліцыяй у Маладэчне 19 чэрвеня распачалі справу паводле артыкулу 363 КК РБ.
Іншых камэнтароў наконт здарэньня СК ня даў. Паводле артыкулу 363, за «супраціў супрацоўніку ўнутраных справаў» пагражаюць папраўчыя працы на тэрмін да двух гадоў, арышт, абмежаваньне волі на тэрмін да трох гадоў або пазбаўленьне волі на тэрмін да двух гадоў.
19 чэрвеня ў Маладэчне, як і ў многіх іншых гарадах Беларусі, людзі выйшлі на стыхійны «ланцуг салідарнасьці» з затрыманымі падчас перадвыбарчай кампаніі ў Беларусі. Цалкам чытайце па спасылцы.
Ярмошына: У выбарах працягваюць удзел 7 чалавек, у тым ліку Бабарыка
У выбарах прэзыдэнта Беларусі пасьля этапу збору подпісаў за вылучэньне ў кандыдаты працягваюць удзел сем чалавек, паведаміла агенцтву «Інтэрфакс-Захад» старшыня ЦВК Лідзія Ярмошына 22 чэрвеня.
Яна адзначыла, што дакладную колькасьць здадзеных подпісаў ад кожнага прэтэндэнта вызначаць у выніку праверкі, якую завершаць 30 чэрвеня.
Паводле Ярмошынай, здалі сабраныя подпісы
- Аляксандар Лукашэнка, дзейны кіраўнік Беларусі,
- Віктар Бабарыка, зьняволены экс-кіраўнік «Белгазпрамбанку»,
- Валер Цапкала, экс-кіраўнік Парку высокіх тэхналёгіяў,
- Сьвятлана Ціханоўская, жонка зьняволенага блогера Сяргея Ціханоўскага,
- Ганна Канапацкая, экс-дэпутатка Палаты прадстаўнікоў,
- Андрэй Дзьмітрыеў, сустаршыня грамадзкага абʼяднаньня «Гавары праўду»,
- Сяргей Чэрачань, старшыня Беларускай сацыял-дэмакратычнай партыі «Грамада».
«З горыччу і болем гляджу за тым, што адбываецца на тэлевізіі». Былая прэс-сакратарка ОНТ падтрымала Бабарыку
Былая прэс-сакратарка ОНТ Тацяна Курбат рэзка выказалася пра сытуацыю ў Беларусі. Пра гэта яна расказала ў сваім акаўнце ў Instagram.
Тацяна Курбат прыгадала, як у 2010 годзе з ОНТ звольнілі Сяргея Дарафеева, якія дазволіў сабе задаваць нязручныя пытаньні Лідзіі Ярмошынай увечары 19 сьнежня. Тады Ярмошына пакінула студыю. Яна прыгадвае, што пасьля тых падзеяў звольнілася не адразу, бо было страшна страціць «працу, чаргу на ільготнае жыльлё», але пасьля звальненьня ёй «адразу стала лягчэй», а жыцьцё «не пагоршылася». Цалкам чытайце па спасылцы.
«Проста ляжу на асфальце, вакол ходзяць хлопцы з АМАП». Як у Менску затрымалі гітарыста гурту Intelligency
19 чэрвеня гітарыст менскага электроннага гурту Intelligency Яўген Мурашка вяртаўся дадому пасьля адзначэньня абароны магістарскай дысэртацыі. У раёне плошчы Якуба Коласа яго затрымаў АМАП.
19 чэрвеня, калі ў Менску праходзіў пікет у апошні дзень збору подпісаў, а на плошчы Якуба Коласа пашыхтаваўся «ланцуг салідарнасьці», гітарыст электроннага гурта «Intelligency» Яўген Мурашка адзначаў у кавярні паблізу плошчы абарону магістэрскай дысэртацыі.
Каля 21-й гадзіны Яўген Мурашка быў ужо на плошчы і хацеў узяць шэрынгавы ровар, каб дабрацца дадому.
«У мяне не адчыняўся замок ровара, я вырашыў адвесьці яго ў бок, каб не перашкаджаць, і там ужо разблякаваць. Міліцыянты далей пайшлі за мной, яшчэ раз удакладнілі, чаму я тут стаю. А ў выніку раптоўна ўзялі мяне за рукі і пасадзілі ў аўтазак», — расказаў Яўген.
АМАП не патлумачыў хлопцу, за што яго затрымліваюць, ніхто зь іх не назваўся і не паказаў дакумэнтаў. Пасьля Яўгену стала кепска і ён страціў прытомнасьць.
«Мы доўга езьдзілі па горадзе, было вельмі душна, на нас увесь час ціснулі. Адзінае — памятаю, што там, куды нас завезьлі, быў плот з калючым дротам. Калі мяне пачалі выводзіць з аўтазаку, я адключыўся», — прыгадвае Яўген.
У прытомнасьць хлопец прыйшоў толькі ў «хуткай», якую выклікаў нехта з АМАПу.
Лукашэнка пра каранавірус: «Самае страшнае, каб пад гэты шумок нас не прыбралі»
Аляксандар Лукашэнка 22 чэрвеня ўзяў удзел у цырымоніі, прысьвечанай гадавіне пачатку Вялікай айчыннай вайны — нападу Нямеччыны на Савецкі Саюз у 1941 годзе ў працяг Другой усясьветнай вайны. Урачыстасьць пачалася ў Берасьцейскай крэпасьці ў 4 раніцы.
У прамове Лукашэнка, як перадае ягоная прэс-служба, сярод іншага заявіў:
- «Катастрофы ніякай, але абараніць мы павінны тое, што маем. Расслабляцца ні ў якім разе нельга. Я вас папярэджваў два-тры месяцы таму, што гэтая так званая пандэмія гэтым ня скончыцца. Камусьці яна вельмі на руку. Хутка ўбачыце, каму. Хоць ужо і цяпер гэта бачым (каму, усё ж не сказаў. — РС). Будзе ціск сур’ёзны, перш за ўсё эканамічны. Бо ваяваць з намі ўжо небясьпечна, а нахіліць трэба. Занадта незалежнымі сталі...»
- «Я заўсёды вам казаў: я нікому не дазволю гвалтоўным чынам вырашаць праблемы, якія трэба вырашаць мірна, палітычным шляхам, на падставе нашых законаў. Так будзе заўсёды».
- Заклікаў не зьвяртаць увагі на тое, што «нам там падпяваюць»: «„Штосьці ня тое робім ... А калі накраў, дык нічога страшнага“. Калі б мы гэтым зладзюгам (якім, не ўдакладніў. — РС) за гады сваёй незалежнасьці крылы не падрэзалі, мы б сёньня пабудавалі алігархічную дзяржаву і стаялі б на каленях».
- «Не напружвайцеся. Нас і так напружылі з гэтым каронапсыхозам. Але самае страшнае для нас, каб пад гэты шумок нас не прыбралі. Вось гэта для нас галоўнае».
У сярэднім — на 23 рублі. Стала вядома, як менавіта падымуць пэнсіі ў Беларусі
Сярэдні памер пэнсіяў па ўзросьце за ліпень складзе 470,6 рубля, сьцьвярджае Міністэрства працы. Гэта больш за сярэднія пэнсіі па ўзросьце ў чэрвені на 5,2% або 23,1 рубля; больш за ліпень 2019 году на 12,5% або на 52,2 рубля.
Цяперашняе падвышэньне ў параўнаньні зь мінулым месяцам, калі пералічваць з курсам на момант публікацыі, складае 9,72 даляра.
«Гэта не папулізм, ня дзеля нейкіх выбараў, я ніколі гэтага не рабіў... Але калі вэтэраны, пэнсіянэры ўздымаюць пытаньне, хоць 10-20 даляраў, але трэба дадаць зараз», — казаў Лукашэнка.
Баксёр Кірыл Рэліх: «Затрыманьні, зьбіцьцё — гэта проста ганьба. Мне сорамна за такія дзеяньні ўладаў!»
Беларускі баксёр Кірыл Рэліх спэцыяльна для Tribuna.com выказаў сваё меркаваньне аб палітычнай сытуацыі ў краіне.
Адзінае, што мяне вельмі напружвае, гэта тое, што адбываецца на вуліцах краіны. Затрыманьні, зьбіцьцё — гэта проста ганьба. Мне сорамна за такія дзеяньні ўладаў!» — заявіў Рэліх.
Як прайшла акцыя салідарнасьці ў Гомлі 19 чэрвеня
Літва выказала занепакоенасьць разгонам мірных акцый і затрыманьнямі ў Беларусі
Пра гэта міністар замежных спраўа Літвы Лінас Лінкявічус напісаў у Твітары:
«Мы занепакоеныя затрыманьнямі актывістаў апазыцыі, кандыдатаў у прэзыдэнты, мірных дэманстрантаў і журналістаў у Менску. Калі Беларусь сапраўды хоча ўпарадкаваць адносіны з Эўразьвязам, яна не можа вяртацца да сытуацыі з палітвязьнямі. Права на свабоду выказваньня меркаваньняў і сходаў павінна датрымлівацца», — напісаў Лінас Лінкявічус.
Раней за заклікам вызваліць Віктара Бабарыку і ўсіх затрыманых удзельнікаў пратэстаў выступіла кіраўніцтва Эўразьвязу.
Таксама амбасады ЗША і Вялікай Брытаніі выступілі з пратэстам супраць затрыманьняў журналістаў у Менску і іншых гарадах Беларусі.