Сьпікер Палаты прадстаўнікоў заявіў, што пад выглядам перадвыбарных мерапрыемстваў ладзяцца правакацыі
«На жаль, у Беларусі пэўныя сілы кожны раз спрабуюць выкарыстаць выбарчую кампанію не на карысьць краіны, а каб разгайдаць сацыяльна-палітычную сытуацыю. Цяперашнія выбары не выключэньне. Мы бачым спробы, якія падтрымліваюцца звонку, пасеяць раскол у грамадзтве, выклікаць народу недавер да ўлады, спэкулюючы на тэме пандэміі і зьвязаных зь ёй эканамічных цяжкасьцях», — сказаў старшыня Палаты прадстаўнікоў Уладзімер Андрэйчанка на закрыцьці другой сэсіі. Цалкам чытайце тут.
Прафсаюзы, праўладныя аб’яднаньні, камуністы. Хто будзе назіраць за выбарамі
ЦВК дала папярэднія зьвесткі пра назіральнікаў за прэзыдэнцкімі выбарамі, ужо акрэдытаваных выбарчымі камісіямі. Больш за ўсіх назіральнікаў вылучылі грамадзкія аб’яднаньні — 17 655 чалавек, большасьць зь іх акрэдытавалі ва ўчастковыя выбарчыя камісіі — 16 902.
Лідэры тут — сябры праўладных Фэдэрацыі прафсаюзаў Беларусі, грамадзкага аб’яднаньня «Белая Русь», БРСМ, Беларускага саюзу жанчын і Беларускага аб’яднаньня вэтэранаў. На другім месцы — грамадзяне, якія падалі заявы ў выбарчыя камісіі (такіх зарэгістравалі 2814). Далей ідуць прадстаўнікі працоўных калектываў (1312) і палітычных партый (612).
З партый больш за ўсіх назіральнікаў накіравалі Камуністычная партыя Беларусі (478), Рэспубліканская партыя працы і справядлівасьці (103), Сацыял-дэмакратычная партыя народнай згоды (21). Меней за ўсіх назіральнікаў накіравалі Лібэральна-дэмакратычная партыя (2) і Партыя БНФ (1).
Папярэджаньні і штрафы. 30 чэрвеня працягваюць судзіць за «ланцугі салідарнасьці». Абнаўляецца
За 29 чэрвеня ў Беларусі прысудзілі сумарна 65 сутак арышту і 2457 рублёў штрафаў удзельнікам «ланцуга салідарнасьці» 19 чэрвеня і іншых палітычных акцыяў. 23 падсудным вынесьлі папярэджаньні. 30 чэрвеня суды працягнуліся.
Раней над удзельнікамі «ланцугоў салідарнасьці» прайшло больш за 100 судоў, затрымлівалі людзей на акцыях у 19 розных гарадах. Толькі за гэтыя акцыі прысудзілі агулам больш за сотню сутак арышту і штрафы больш як на 50 тысяч рублёў. А агулам з пачатку выбарчай кампаніі арыштаў набралася больш як на чатыры гады, штрафаў — больш як на паўтары сотні тысяч рублёў. Усе прысуды за 30 чэрвеня глядзіце па спасылцы (абнаўляецца).
Подпісы за альтэрнатыўных кандыдатаў адхіляюць па ўсёй краіне. Мінус 6527 за Цапкалу ў Горадні. Абнаўляецца
На паседжаньнях у тэрытарыяльных камісіях па выбарах прэзыдэнта Беларусі 29 чэрвеня адхілілі дзясяткі тысяч подпісаў за Віктара Бабарыку і Валера Цапкалу. 30 чэрвеня паступаюць новыя зьвесткі пра адхіленьне подпісаў. Свабода сочыць за разьвіцьцём сытуацыі.
На паседжаньнях выбаркамаў у Горадні, піша кампанія «Праваабаронцы за свабодныя выбары», адхілілі подпісы за Цапкалу, Дзьмітрыева і Бабарыку.
У Ленінскім раёне паведамілі пра выяўленьне больш як 15% несапраўдных подпісаў за Валера Цапкалу і Андрэя Дзьмітрыева. Адхілілі адпаведна ўсе 6527 за Цапкалу і 208 за Дзьмітрыева. Прынялі подпісы за Аляксандра Лукашэнку (32 584), Сяргея Чэрачня (4890), Віктара Бабарыку (4670), Сьвятлану Ціханоўскую (2420) і Ганну Канапацкую (208).
Раней было вядома, што ў Кастрычніцкім раёне Горадні прызналі недакладнымі 7268 подпісаў за Бабарыку і 346 за Дзьмітрыева. Прынялі подпісы за Лукашэнкку (51 712), Цапкалу (9399), Ціханоўскую (3382), Чэрачня (1751), Канапацкую (145). Несапраўдныя подпісы выяўлялі ва ўсіх іх, у тым ліку за Лукашэнку не прынялі 79 подпісаў, пасьля праверылі яшчэ 23% з 52 тысяч і прызналі 4,3% з таго несапраўднымі.
Беларускія праваабаронцы прызналі блогера Ігара Лосіка палітвязьнем
У сувязі з затрыманьнем блогера і адміністратара Telegram-каналу «Беларусь головного мозга», фрылансэра-кансультанта Радыё Свабода Ігара Лосіка праз падазрэньне ў «арганізацыі групавых дзеяньняў, якія груба парушаюць грамадзкі парадак» (арт. 342 КК) і выбарам меры стрыманьня ў выглядзе ўтрыманьня пад вартай прадстаўнікі праваабарончай супольнасьці Беларусі прызналі Ігара Лосіка палітычным зьняволеным.
Ігара Лосіка патрабуюць неадкладна вызваліць, а крымінальны перасьлед спыніць. Справу супраць яго назвалі палітычна матываванай на наступны дзень пасьля затрыманьня.
Беларускія праваабаронцы раней прызнавалі палітычнымі зьняволенымі Сяргея Ціханоўскага і ягоных паплечнікаў, Віктара Бабарыку і фігурантаў «справы Белгазпрамбанку».
Amnesty International патрабавала вызваліць арыштаваных у Беларусі блогераў і актывістаў, у тым ліку Лосіка. Арыштаваных раней Бабарыку, Ціханоўскага і іхных паплечнікаў ужо прызналі вязьнямі сумленьня.
Цапкала параўнаў уплыў Расеі і ЗША на законнасьць выбараў у Беларусі
Адзін з патэнцыйных супернікаў Аляксандра Лукашэнкі на прэзыдэнцкіх выбарах Валер Цапкала заявіў, што Расея можа адыграць больш важную ролю ў забесьпячэньні законнасьці выбараў у Беларусі, чым ЗША ці Эўразьвяз.
Цапкала адзначыў, што невялікія дзяржавы, як Беларусь, вельмі залежаць ад уплыву суседзяў, а інвэстыцыйны клімат наўпрост залежыць ад рэпутацыі найвышэйшага кіраўніцтва.
«Справа нават не ў Эўропе і Амэрыцы, — растлумачыў Цапкала. — Мы спадзяёмся, што будзе і пазыцыя расейскага кіраўніцтва, якое выступіць за закон, за тое, каб гэтыя законы выконваліся ў „саюзнай дзяржаве“. Мне здаецца, ад пазыцыі Расеі будзе вельмі шмат што залежаць, я думаю, у меншай ступені гэта будзе залежаць ад пазыцыі Злучаных Штатаў ці Эўропы.
Вядома, пры любой гульні трэба рабіць больш-менш нармальную міну, каб сьвет цябе ўспрымаў. Трэба паказваць бачнасьць хаця б законных дзеяньняў для сваіх грамадзян».
Калінкіна: Для Лукашэнкі ўлада — галоўная каштоўнасьць, галоўная мэта, галоўнае каханьне
Публіцыстка Сьвятлана Калінкіна разважае пра галоўную каштоўнасьць і галоўны страх Лукашэнкі, заяўляе, што ў кіраўніка дзяржавы няма ніводнага пераканаўчага аргумэнту, чаму ён павінен застацца ва ўладзе, і сьцьвярджае, што Лукашэнка цяпер можа мяняцца толькі ў горшы бок.
Сьцісла:
- Страхі Лукашэнкі наконт адстаўкі даўно зьяўляюцца тым, з дапамогай чаго ім маніпулююць
- Генэралы яго палохаюць — «вас заб’юць, павесяць дагары нагамі, будуць судзіць» — і, можа, ён у гэта нават верыць
- Лукашэнка па-ранейшаму ходзіць па фэрмах і глядзіць на кароваў, а сьвет распрацоўвае штучны інтэлект
- За гэтыя гады ён столькі надаваў абяцаньняў, што валасоў у яго на галаве, напэўна, менш
- Выбары стануць дэтанатарам, зь якога пачнецца хваля незадаволенасьці і патрабаваньня зьменаў
Amnesty International прызнала вязьнямі сумленьня Бабарыкаў, Ціханоўскага і іх арыштаваных паплечнікаў
Беларускія ўлады груба праігнаравалі абавязаньні ў правах чалавека, у тым ліку свабоду думкі. Апазыцыйныя кандыдаты і іх прыхільнікі перасьледуюцца і запалохваюцца, гаворыцца ў заяве Amnesty International.
«Кіраўніцтва Беларусі павінна спыніць крымінальны перасьлед, запалохваньне і рэпрэсіі супраць апанэнтаў Аляксандра Лукашэнкі, актывістаў грамадзянскай супольнасьці і незалежных СМІ», — заявілі ў міжнароднай праваабарончай арганізацыі.
Адзначаецца, што сытуацыя з правамі чалавека ў Беларусі пагаршаецца. Падчас выбарчай кампаніі патэнцыйныя кандыдаты, чальцы іх камандаў і прыхільнікі зазналі рэпрэсіі — ад затрыманьняў да крымінальнага перасьледу і закрыцьця бізнэсу.
Amnesty International заяўляе, што лічыць Сяргея Ціханоўскага і восем чалавек, арыштаваных разам зь ім (Яўгена Рэзьнічэнку, Дзьмітрыя Фурманава, Уладзімера Навуміка, Вяргілія Ўшакова, Аляксандра Арановіча, Сяргея Калмыкова, Васіля Баброўскага і Арцёма Сакава), вязьнямі сумленьня. Праваабаронцы заклікаюць вызваліць зьняволеных.
Адміністратару чату «Браслаў для жыцьця» прысудзілі пяць сутак арышту
Суд над Канстанцінам Далецкім адбыўся 29 чэрвеня. На яго склалі пратакол паводле артыкулу 23.34 — за парушэньне заканадаўства аб масавых мерапрыемствах.
Браслаўчаніна пакаралі пяцьцю суткамі арышту. Паводле жонкі затрыманага Алёны Далецкай, на судзе выступіў сьведка, які сьцьвярджаў нібыта Канстанцін хадзіў па вуліцы і заклікаў людзей зьбірацца каля «Эўраопту» 21 чэрвеня. Што гэта за мужчына, Алёна ня ведае.
Канстанціна Далецкага затрымалі 26 чэрвеня. Трое сутак ён ужо правёў за кратамі.
«Зь першага дня Косьця абвясьціў галадоўку — у знак пратэсту, — кажа Алёна. — Цяпер да яго два разы на дзень стала прыяжджаць хуткая».
Фігуранты «справы Ціханоўскага». Сяргей Калмыкоў
20-гадовы гарадзенец Сяргей Калмыкоў — адзіны абвінавачаны ў «справе Ціханоўскага», які пасьля затрыманьня апынуўся на волі. Разам са сваёй дзяўчынай Ірынай ён 29 траўня прыйшоў на Савецкую плошчу падпісацца за Сьвятлану Ціханоўскую. Пачалася мітусьня, Калмыкова затрымалі. Яму прад’явілі абвінавачваньне: гвалт у дачыненьні да міліцыянта.
«Псіхо3%». Кіроўцу аштрафавалі за налепкі на аўтамабілі і за непадпарадкаваньне
Першамайскі суд Менску пакараў штрафам кіроўцу Андрэя Ляўшыцкага за непадпарадкаваньне супрацоўнікам міліцыі на 10 базавых, і на 2 базавых — за налепкі на аўтамабілі: герб «Пагоня» і «Псіхо3%». Яго машыну паставілі на штрафстаянку. Кіроўцу суткі пратрымалі ў пастарунку.
У Бабарыкі ў Фрунзенскім раёне Менску забракавалі паўсотні тысяч подпісаў
У Віктара Бабарыкі ў гэтым раёне было 47 тысяч подпісаў, у Валерыя Цапкалы – 17,8 тысяч подпісаў, іх таксама забракавалі. Ва ўсіх іншых прэтэндэнтаў подпісы прызнаныя сапраўднымі.
Кругавая абарона Лукашэнкі: Ад Пуціна да Ціханоўскага
Ці працуе вобраз Лукашэнкі як абаронцы сувэрэнітэту ад замежнай навалы? Ці ўдалося яму спыніць «спакойнае расхістваньне сытуацыі»? Ці варта заклікаць людзей на Плошчу без гарантыяў посьпеху?
Гэтыя тэмы ў «Праскім акцэнце» абмяркоўваюць кіраўнік аналітычных праектаў БелаПАН Аляксандар Класкоўскі і аглядальнікі Свабоды Валер Карбалевіч і Юры Дракахруст.
Сьцісла:
Карбалевіч
- Мы пачулі, што ва ўсім сьвеце адбываюцца суцэльныя катаклізмы і адусюль паходзяць пагрозы, Беларусь у атачэньні ворагаў
- Галоўнае пасланьне Лукашэнкі грамадзтву палягае ня ў тым, што я вам прапаную нейкую цудоўную будучыню, вялікія пляны ці пэрспэктывы. Галоўнае, я ўсіх заткну
- Пакуль я бачу, што большасьць пратэстоўцаў не гатовыя да сілавога супрацьстаяньня зь міліцыяй, да рэвалюцыі
- Якая цана свабоды? Якія ахвяры можна прынесьці на алтар свабоды? Гэта ня толькі беларуская, а агульначалавечая праблема
Класкоўскі
- Можна зразумець, чаму Лукашэнка асядлаў гэтага канька абароны незалежнасьці ад Расеі. Няма больш пра што гаварыць, па вялікім рахунку
- Калі Лукашэнка паўтарае, што мы саюзьнікі не разьлі вада — гэта ў значнай ступені разбурае наратыў, які ён зараз спрабуе накінуць разам са сваёй прапагандай, што «рука Масквы» хоча паваліць краіну
- Мой прагноз: Лукашэнка на 99% утрымае ўладу падчас выбарчай кампаніі
- У Салігорску Лукашэнка казаў, што не выключае, што апанэнты паклічуць на дапамогу суседнюю дзяржаву. Намёк на Расею. Маўляў, калі будзеце тут ладзіць Майданы, то ў выніку прыедзе Пуцін на танку
У Таліне прайшоў пікет салідарнасьці зь Беларусьсю. ВІДЭА, ФОТА
29 чэрвеня каля амбасады Беларусі ў Таліне прайшоў пікет беларускай дыяспары Эстоніі і неабыякавых грамадзян Эстоніі на знак падтрымкі сумленных і празрыстых прэзыдэнцкіх выбараў у Беларусі.
Удзельнікі пікету таксама паставілі мэтай прыцягнуць увагу да праблем краіны і прадэманстраваць салідарнасьць з палітвязьнямі, якія знаходзяцца ў беларускіх турмах. Пікетоўцы патрабавалі вызваліць кандыдатаў на пасаду прэзыдэнта, спыніць рэпрэсіі, і правесьці сумленныя і празрыстыя выбары. Яны заклікалі да сыходу кіраўніцы Цэнтральнай выбарчай камісіі Беларусі Лідзіі Ярмошынай са сваёй пасады. Глядзіце фота і відэа з акцыі па спасылцы.
Блогераў Цыгановіча і Кабанава прызналі палітвязьнямі
У сувязі з затрыманьнем і ўтрыманьнем пад вартай у якасьці падазраваных па крымінальнай справе па ч. 1 арт. 342 Крымінальнага кодэксу Беларусі праваабарончая супольнасьць Беларусі прызнала блогера ютуб-каналу MozgON Уладзімера Цыгановіча і берасьцейскага блогера Аляксандра Кабанава палітычнымі зьняволенымі, паведамляе праваабарончы сайт «Вясна». Праваабаронцы патрабуюць ад беларускіх уладаў неадкладна вызваліць Цыгановіча і Кабанава і спыніць іх крымінальны перасьлед.
Разам з Цыгановічам і Кабанавым на цяперашні момант беларускія праваабаронцы прызналі палітвязьнямі ўжо 19 чалавек.
Што сказалі ў штабе Бабарыкі пра забракаваныя подпісы
«У штабе мы зьдзіўленыя тым, што адбылося. Мы пададзім скаргі, бо мы ўпэўненыя, што з подпісамі ўсё ў парадку. У нас пакуль у Савецкім раёне Гомля больш за 4 тысячы подпісаў пад пагрозай, але гэта менш за 1% здадзеных подпісаў. Мы таксама бачым, што дзесьці подпісы былі прынятыя цалкам, дзесьці былі адбракаваныя адзінкі», — сказаў юрыст з каманды Віктара Бабарыкі Максім Знак.
Аштрафавалі хлопца, які цікавіўся ў міліцыі, што рабіць, каб яго не затрымалі
24 чэрвеня Іван Прус патэлефанаваў у Маскоўскі РУУС з пытаньнем, як яму даехаць да працы без затрыманьняў. Праз 2 дні яго затрымалі.
Паводле міліцыі і суду, Іван Прус праявіў «непавагу да грамадзтва, бо адцягнуў міліцыю ад справаў». Гэта значыць, учыніў дробнае хуліганства, піша Tut.by.
Івана судзілі па відэасувязі, ён прызнаў сваю віну і паведаміў, што зьведаў стрэс у ізалятары, бо раней яго ніколі не затрымлівалі. Судовы працэс доўжыўся 15 хвілін, адвакатка Івана настойвала на ягонай невінаватасьці, бо міліцыя не паказала ніякіх доказаў таго, што званок Івана замінаў ім працаваць.
У выніку судзьдзя Лідзія Цепліца пакарала Івана штрафам у 20 базавых велічыняў (540 рублёў).
На Міколу Статкевіча завялі крымінальную справу
Палітык Мікола Статкевіч, які 30 чэрвеня павінен быў выйсьці на волю, «затрыманы па падазрэньні ў ажыцьцяўленьні злачынства па ч. 1 арт. 342 Крымінальнага кодэксу Беларусі («Падрыхтоўка дзеяньняў, якія груба парушаюць грамадзкі парадак»).
Пра гэта паведаміла ў Фэйсбуку жонка Статкевіча Марына Адамовіч.
Паводле яе, Статкевіч будзе знаходзіцца ў ізалятары часовага ўтрыманьня.
Міколу Статкевіча затрымалі 31 траўня па дарозе на Камароўскі рынак у Менску, дзе ён зьбіраўся наведаць выбарчы пікет Сьвятланы Ціханоўскай. Пазьней ягонай жонцы Марыне Адамовіч паведамілі, што Статкевіч знаходзіцца ў ізалятары на Акрэсьціна, яму прысудзілі «суткі». 15 чэрвеня прайшоў яшчэ адзін суд, які дадаў палітыку яшчэ 15 сутак. На Акрэсьціна палітык знаходзіцца дагэтуль.
У Горадні асудзілі фігуранта «справы Ціханоўскага»
Затрыманага ў «справе Ціханоўскага» Васіля Баброўскага асудзілі ў Горадзенскім абласным судзе 29 чэрвеня. Ён удзельнічаў у адміністрацыйным працэсе праз Skype.
45-гадовага Васіля Баброўскага затрымалі 29 траўня ў Горадні падчас пікету для збору подпісаў за Сьвятлану Ціханоўскую. Яму прад’явілі абвінавачаньне паводле часткі 1 артыкулу 342 Крымінальнага кодэксу («Арганізацыя і падрыхтоўка дзеяньняў, якія груба парушаюць грамадзкі парадак, або актыўны ўдзел у іх»). Цяпер ён знаходзіцца пад вартай у СІЗА № 1 на Валадарскага ў Менску. У яго трое дзяцей, у тым ліку непаўналетняя дачка. Нядаўна стала вядома, што на Баброўскага склалі адміністрацыйныя пратаколы за дробнае хуліганства і непадпарадкаваньне міліцыі.
Як зачытаў судзьдзя Руслан Гурын, Баброўскі 29 траўня на Савецкай плошчы ў Горадні непрыстойна лаяўся, махаў рукамі, хапаў людзей за адзеньне; да таго ж адмовіўся падпарадкоўвацца міліцыянтам Шыманіцу і Навіцкаму, калі тыя папрасілі яго прайсьці ў машыну: супраціўляўся, вырываўся, упіраўся нагамі, спрабаваў уцячы.
Сьведкамі выступілі супрацоўнікі АМАПу Шыманіца і Навіцкі.
Баброўскі сваёй віны цалкам не прызнаў.
Суд прызначыў Баброўскаму за абодва артыкулы адміністрацыйны арышт агулам на 10 сутак. Тэрмін адбываньня пачаўся з моманту зьмяшчэньня Баброўскага ў ізалятар.
Суду па крымінальным артыкуле супраць Баброўскага яшчэ не было.
У Лідзе затрымалі ўдзельнікаў «аўтапрабегу салідарнасьці»
Вечарам 28 чэрвеня жыхары Ліды зладзілі «аўтапрабег салідарнасьці» з палітычнымі зьняволенымі — некалькі машынаў зь бел-чырвона-белымі сьцягамі кружлялі па горадзе, паведамляе Праваабарончы цэнтар «Вясна».
29 чэрвеня супрацоўнікі ДАІ спынілі аднаго з удзельнікаў прабегу Аляксандра Захватовіча — сказалі, што ён нібыта парушыў правілы і мае паехаць зь імі ў ДАІ. Але замест аўтаінспэкцыі яго павезьлі ў РАУС.
Затрымалі таксама яшчэ аднаго ўдзельніка прабегу — Паўла Шыдлоўскага. Яго даставілі ў РАУС Лідзкага раёну.
Абодвум выставілі абвінавачаньне ў «несанкцыянаваным мерапрыемстве» паводле артыкулу 23.34 КаАП РБ. Суды над імі маюць адбыцца 30 чэрвеня.