«Страчаны давер да права і законнасьці». Чаму падае беларускі рубель?
Паводле афіцыйнага курсу Нацыянальнага банку даляр цяпер каштуе 2,6 рубля, эўра — 3,07 рубля. У прыватных банках даляр каштуе яшчэ больш — да 2,63 рубля. Рубель падае пасьля прэзыдэнцкіх выбараў 9 жніўня. І гэта зьвязана «з дэвальвацыйнымі чаканьнямі людзей», лічыць фінансавы аналітык «Альпары Эўразія» Вадзім Іосуб.
«Падстава для росту вартасьці замежнай валюты — попыт на яе. Удзельнікі рынку актыўна скупаюць валюту. Такое адчуваньне, што валюту набывалі і людзі, і банкі, і прадпрыемствы. Для людзей асноўны рэсурс набыцьця валюты — рублёвыя ўклады. Людзі здымаюць свае ўклады і купляюць на іх замежную валюту. У нас каля 5 мільярдаў рублёў тэрміновых укладаў, траціну зь іх можна адклікаць. Значыць, 1,5 мільярда могуць пайсьці на куплю валюты. Можна прадбачыць, што валюту будуць набываць датуль, пакуль будзе на што, — мяркуе Вадзім Іосуб.
Як доўга будзе цягнуцца гэты працэс і наколькі вырастуць курсы даляра і эўра — сказаць пакуль немагчыма. На думку Вадзіма Іосуба, моцная нацыянальная валюта будзе тады, калі да яе «будзе давер». А апошнімі месяцамі адбылася «страта даверу да ўсіх дзяржаўных інстытутаў і даверу да права і законнасьці».
Што цяпер адбываецца з банкаўскімі ўкладамі, інвэстарамі і ІТ, зь беларускімі прадпрыемствамі, а таксама чаго далей чакаць у беларускай эканоміцы, чытайце па спасылцы.
Мітрапаліта Паўла вызвалілі ад пасады Патрыяршага экзарха ўсяе Беларусі
Мітрапаліт Павал вызвалены ад пасады Патрыяршага экзарха ўсяе Беларусі, — паведаміў кіраўнік прэс-службы РПЦ Уладзімір Лягойда. Яго прызначылі кіраўніком кубанскай мітраполіі.
Патрыяршым экзархам усяе Беларусі, мітрапалітам Менскім і Заслаўскім прызначаны япіскап Барысаўскі і Мар’інагорскі Веніямін з захаваньнем за ім часовага кіраваньня Барысаўскай япархіяй.
Пасьля прэзыдэнцкіх выбараў мітрапаліт Павал заявіў на сустрэчы зь вернікамі, што шкадуе пра заўчаснае віншаваньне Аляксандра Лукашэнкі з перамогай, а 17 жніўня ён наведаў зьбітых АМАПам пратэстоўцаў у лякарні хуткай мэдыцынскай дапамогі ў Менску.
«Паставілі сапраўднага лукашыста», — айцец Шрамко пра новага кіраўніца БПЦ
Вользе Кавальковай прысудзілі 10 сутак арышту
Даверанай асобе Сьвятланы Ціханоўскай і сябру прэзыдыюму Каардынацыйнай рады Вользе Кавальковай Заводзкі суд сталіцы прысудзіў 10 дзён арышту за «арганізацыю несанкцыянаванай акцыі» (ч. 2 арт. 23.34 КаАП).
Яе вінавацілі ў тым, што яна заклікала да страйку і парушыла закон аб правядзеньні масавых мерапрыемстваў.
Вяў працэс праз скайп судзьдзя суду Заводзкага раёну Дзьмітрый Астапенка. Сама Вольга Кавалькова знаходзілася ў ізалятары часовага ўтрыманьня на завулку Акрэсьціна.
У Віцебску абвясьцілі індывідуальны страйк двое супрацоўнікаў дзяржаўнай тэлевізіі
Рэдактарка і вядоўца праграмы «Время АРТ» Тацьцяна Іваноўская і галоўны інжынэр Уладзімер Зайцаў ужо другі дзень прыходзяць на працу, але не выконваюць сваю працу, паведамляе «Беларуская асацыяцыя журналістаў».
Яны пратэстуюць супраць фальсыфікацыі вынікаў выбараў і міліцэйскага гвалту, патрабуюць правядзеньня новых выбараў, вызваленьня палітвязьняў і пакараньня супрацоўнікаў МУС, якія нявечылі ўдзельнікаў мірных пратэстаў. Свае патрабаваньні пратэстоўцы даслалі дырэктару тэлерадыёкампаніі «Віцебск» Алене Панцюховай, старшыні «Белтэлерадыёкампаніі» Івану Эйсманту і старшыні Віцебскага аблвыканкаму Мікалаю Шарсьнёву.
Тацяна і Ўладзімер – муж і жонка, яны падкрэсьліваюць, што страйк – гэта іх прыватнае рашэньне, і што яны не асуджаюць калег, якія не адважваюцца далучыцца да пратэсту. Страйкоўцы кажуць, што ніякага ціску з боку кіраўніцтва на іх няма, але яны гатовыя да любых наступстваў, нават да звальненьня.
Вярхоўны суд адмовіў усім экс-кандыдатам у прэзыдэнты ў задавальненьні скаргаў па выніках выбараў
Вярхоўны суд адмовіў тром экс-кандыдатам у прэзыдэнты ў задавальненьні скаргаў па выніках выбараў. Скаргі ў Вярхоўны суд падавалі Ганна Канапацкая, Андрэй Дзьмітрыеў і Святлана Ціханоўская, паведамляе Tut.by.
Што тычыцца скаргі Сьвятланы Ціханоўскай, Вярхоўны суд устанавіў, што ў суд яна зьвярнулася са скаргай, у якой указала, што 14 жніўня рашэньнем ЦВК адмоўлена ў задавальненьні яе скаргі аб прызнаньні несапраўднымі выбараў прэзыдэнта Беларусі. Мяркуючы, што ў задавальненьні скаргі адмоўлена неабгрунтавана, прасіла рашэньне ЦВК адмяніць і прызнаць выбары несапраўднымі ў цэлым па краіне.
Вярхоўны суд адзначае, што рашэньне аб прызнаньні выбараў несапраўднымі прымае Цэнтральная камісія. «Паколькі рашэньне аб прызнаньні выбараў несапраўднымі ЦВК не прымала, скарга Ціханоўскай аб несапраўднасьці выбараў разгляду ў судзе не падлягае, бо падобныя патрабаваньні не адносяцца да кампэтэнцыі суда», — гаворыцца ў камэнтары Вярхоўнага суда.
Салдат наўмысна стрэліў у журналістку «Нашай нівы» зь 10 мэтраў. Справу яшчэ не завялі
Наша Ніва разьмясьціла відэазапіс, на якім відаць, як салдат наўмысна страляе ў журналістку выданьня Натальлю Лубнеўскую з адлегласьці 10 мэтраў. Натальля Лубнеўская атрымала раненьне 10 жніўня і з таго часу знаходзіцца ў шпіталі. Раненьне кваліфікавалі як агнястрэльнае.
«Я падавала заяву ў Сьледчы камітэт. У межах праверкі да мяне прыходзіў сьледчы 12 жніўня, і 21 жніўня прыходзіў сьледчы з Фрунзэнскага СК, — кажа Натальля. — Крымінальную справу дагэтуль не завялі».
Натальля дагэтуль ня можа хадзіць, бо нага ў лянгеце. «Дакладных прагнозаў я ня ведаю, — кажа дзяўчына. — Куля прайшла вельмі блізка ад каленнага сустава, ён не закрануты, але пасьля лячэньня спатрэбіцца час, каб распрацаваць яго і вярнуць ранейшую функцыянальнасьць».
Дактары расказалі Натальлі, што агнястрэльныя раненьні вельмі цяжка загойваюцца, бо вакол раны адміраюць тканкі і зашыць іх адразу нельга.
Гэта не адзіны выпадак наўмыснага стрэлу ў бяззбройных людзей. У той жа дзень 10 жніўня ў Берасьці стаматоляг Вольга Рыбакова атрымала агнястрэльнае раненьне ў жывот. Яна была на гаўбцы сваёй кватэры і бачыла, як людзі ў чорнай форме са шчыткамі цягнулі хлопца і білі дзяўчат. Вольга таксама ляжыць у шпіталі. Артыкул цалкам чытайце па спасылцы.
Менск: на плошчы Незалежнасьці пачалі зьбірацца людзі
На плошчы Незалежнасьці сабралася каля 100 чалавек. Перакрытыя выхады да плошчы Мясьнікова. На Берсана каля Менскпраекту стаяць міліцыянты ў форме і людзі ў цывільным, правяраюць заплечнікі, на плошчу прапускаюць.
На плошчы зьявіліся дэпутаты незалежнасьці – Лявон Баршчэўскі, Лявон Дзейка, Сяргей Папкоў, Пятро Садоўскі, Сяргей Антончык, Лявонці Зданевіч. Шмат бел-чырвона-белых сьцягоў.
Затрымалі 28 супрацоўнікаў «Гродна Азот»
Па дарозе ў цэнтар гораду затрымалі 28 супрацоўнікаў хімічнага гіганта «Гродна Азот». Яны ішлі з працы па горадзе, ня несьлі сьцягоў ці транспарантаў, не скандавалі лёзунгі. Каля Кургана славы да іх пад’ехаў аўтобус з амапаўцамі. Іх папрасілі сесьці ў аўтобус, патлумачылі, што яны ўдзельнічалі ў недазволеным масавым мерапрыемстве. Работнікаў завезьлі ў ізалятар на вуліцы Гая.
Пад ізалятар прыйшлі каля 500 гарадзенцаў, у тым ліку «азотаўцы», каб іх падтрымаць. Людзі скандавалі «Свабоду», «Выпускай», «Жыве Беларусь». Насупраць гарадзенцаў стаялі аўтазак зь міліцыянтамі, міліцэйскія мікрааўтобусы. Пад ізалятар прыехаў прадстаўнік «Гродна Азот» Віктар Міхневіч.
Каля 19.30 работнікаў «Гродна Азот» сталі па адным выпускаць з ізалятара. Амаль праз тры гадзіны ўсіх адпусьцілі. На людзей аформілі адміністрацыйныя пратаколы за ўдзел у несанкцыянаваным масавым мерапрыемстве.
Відавочцы паведамілі пра затрыманьні ў дварах каля ізалятара на вуліцы Гая, калі людзі пачалі разыходзіцца.
Жанчыны, якія былі побач, калі затрымлівалі на вуліцы Гая, паведамілі, што бачылі, як хлопца, нібыта непрытомнага пасьля зьбіцьця амапаўцамі, з заплюшчанымі вачыма, закінулі ў аўтазак.
«Маратон за незалежнасьць працягваецца», — дэпутат незалежнасьці Лявонці Зданевіч
«Гэты дзень заўжды быў сьвятам, а сёньня тым больш, — сказаў карэспандэнту Свабоды дэпутат Вярхоўнага Савету 12-13 скліканьня Лявонці Зданевіч.
Ён вельмі рады, што маратон за незалежнасьць працягваецца. «Наперадзе яшчэ вялікая барацьба», — кажа ён, але агулам настроены аптымістычна. Што да стаўленьня іншых краін да падзеяў Беларусі, ён лічыць, што «Амэрыка нас кінула, Эўропа яшчэ больш-менш, але блізка да таго».
Наконт пазыцыі Расеі Зданевіч лічыць, што добра, што ёй хапае розуму ня ўмешвацца сваім войскам у беларускія справы. «У нас няма людзей, якія варожа ставяцца да Расеі, але ў нас ёсьць свае інтарэсы, якія трэба абараняць», — кажа Зданевіч.
У «дэпутатаў незалежнасьці» Лявонція Зданевіча і Пятра Садоўскага праваахоўнікі праверылі рэчы, перш чым прапусьціць на плошчу Незалежнасьці.
«Бел-чырвона-белы сьцяг вярнуўся як сьцяг свабоды» — дэпутат незалежнасьці Лявон Баршчэўскі
Дэпутат ВС 12-13 скліканьня Лявон Баршчэўскі сказаў, што дзень 25 жніўня абавязкова вернецца як дзяржаўнае сьвята.
«Я чатыры гады таму даваў інтэрвію і сказаў, што як толькі беларусы адчуюць свабоду, то самі вернуць бел-чырвона-белы сьцяг, — кажа Баршчэўскі. — І мы цяпер бачым, што так і адбылося: бел-чырвона-белы сьцяг вяртаецца ў сьвядомасьць людзей як сьцяг свабоды. Гэтак жа будзе і з гэтым днём».
На плошчы Незалежнасьці каля 500 чалавек, шмат бел-чырвона-белых сьцягоў.
Мінабароны папярэдзіла, што армія гатовая абараняць Беларусь ад унутраных пагрозаў
Начальнік генштабу Ўзброеных сіл Беларусі Аляксандар Вальфовіч заявіў, што вайскоўцы не ўспрымаюць сытуацыю, якая склалася ў краіне, і «гатовыя абараніць грамадзтва».
«Мы бачым, што адбываецца ў краіне і вакол яе. У гэтай няпростай абстаноўцы армія гарантуе бясьпеку дзяржавы, грамадзтва і кожнага асобнага чалавека, які хоча мірна жыць і працаваць у Беларусі», — гаворыцца ў заяве Вальфовіча, распаўсюджанай абаронным ведамствам.
«Мы не дадзім апаганьваць нашы помнікі, разбурыць сыстэму адукацыі, запалохваць грамадзян, паралізаваць транспартныя камунікацыі, падмяніць маральныя каштоўнасьці беларускай моладзі. Армія катэгарычна гэтага не прымае і гатовая абараніць сваю краіну ад пагрозаў», — заявіў Вальфовіч.
На плошчы скандуюць «Мы — народ» і «Сыходзь»
На плошчы Незалежнасьці выступае старшыня руху «За свабоду» Юрась Губарэвіч. Ён кажа: «Будзем выходзіць да перамогі, нашы патрабаваньні нязьменныя. Галоўнае патрабаваньне: дыктатар павінен сысьці».
На плошчы скандуюць «Мы — народ» і «Сыходзь».
Ганна Сарокіна, студэнтка БДУІР, кажа, што ўпершыню адзначае гэты дзень, і для яе гэта вельмі важна, бо гэта сьвята незалежнасьці.
«Спадзяюся, што буду адзначаць гэта як дзяржаўнае сьвята, — кажа Ганна. — Пабачыла ў інтэрнэце заклік прыйсьці сюды. Паглядзела, што настаўнікі сабраліся сёньня каля Міністэрства адукацыі, і ім ня страшна. Падумала, раз ім ня страшна, то і я пайду».
Людзей на плошчы ўсё больш, нягледзячы на моцны дождж. Праз мэгафон міліцыя папярэджвае, што акцыя несанкцыянаваная. Людзі заглушаюць гэта воклічамі «Жыве Беларусь!».
Над плошчай з адміністрацыйных будынкаў уключылі вельмі гучную музыку, як гэта было ў іншыя дні. Людзі на гэта крычаць: «Гэта наша плошча».
Валянтэры расставілі сталы з вадой і печывам для прысутных. Людзі падыходзяць і частуюцца.
Каля 19-й гадзіны на плошчы сабралася каля 2 тысяч чалавек. Людзі працягваюць падыходзіць.
Сьвята Незалежнасьці ў Менску. УЖЫВУЮ
Менск: ля Камароўкі пачаўся праўладны мітынг за Лукашэнку
Тым часам ля Камароўскага рынку а 19-й гадзіне пачаўся праўладны мітынг у падтрымку Аляксандра Лукашэнкі. На яго сёньня заклікалі дзяржаўныя СМІ.
Расейскі прапагандысцкі тэлеканал RT вядзе стрым з праўладнага мітынгу, што праходзіць каля Камароўскага рынку. Камэра нерухома знаходзіцца ў адным месцы, відаць толькі парасоны. Выступаў амаль не чуваць. Адзін з прамоўцаў пачаў скандаваць «Беларусь — безь Ціханоўскай». Прысутныя падтрымалі крык некалькі разоў і сьціхлі.
Агулам сытуацыя на мітынгу спакойная, людзі размаўляюць у групах і мала цікавяцца прамоўцамі. Адзін з выступоўцаў кажа пра антырасейскую апазыцыю, згадвае лёзунгі «Чамадан, вакзал, Расея», «Хто ня скача – той м...ль» і крытыкуе Парашэнку.
На мітынгу за Аляксандра Лукашэнку каля Камароўскага рынку прысутныя скандуюць: «Беларусь – гэта Лукашэнка».
У Гомлі — шэсьце ў гонар Дня Незалежнасьці
У Гомлі распачалося шэсьце ў гонар Дня Незалежнасьці. Месцам збору пратэстоўцаў быў цырк. Але пляцоўку заставілі кірмашом, там было шмат міліцыі, таму людзі сабраліся стыхійна каля помніка Грамыку і рушылі ў бок плошчы Леніна. У калёне каля 200 чалавек. Яны скандуюць «Жыве Беларусь».
Каля аблвыканкаму дарогу пратэстоўцам перагарадзіла міліцыя, але людзі абыйшлі яе і пайшлі далей. Міліцыя здымае людзей на камэру.
Падчас шэсьця затрымалі былога прэтэндэнта ў кандыдаты на пасаду прэзыдэнта Беларусі Ўладзімера Няпомняшчых. Дзе ён цяпер — невядома, тэлефон недасяжны.
Людзей на плошчы Незалежнасьці папярэджваюць, што акцыя несанкцыянаваная
На плошчы Незалежнасьці ў Менску сабралася каля 3 тысяч чалавек. Міліцыя ня ўмешваецца, яе не відаць. Праз аўдыёзапіс людзей папярэджваюць, што акцыя несанкцыянаваная.
Лаўроў расказаў, пра што гаварыў з намесьнікам Пампэо наконт Беларусі
Сёньня ў Маскве адбыліся перамовы наконт сытуацыі ў Беларусі паміж міністрам замежных справаў Расеі Сяргеем Лаўровым і першым намесьнікам дзяржсакратара ЗША Стывэнам Бігэнам. Напярэдадні Бігэн сустрэўся ў Вільні са Сьвятланай Ціханоўскай.
Што сказаў Лаўроў у інтэрвію «Першаму каналу». Сьцісла:
- «Мы сказалі (Стывэну Бігэну — РС), што лічым важным даць самім беларусам магчымасьць вызначыцца, хто будзе ўдзельнікамі агульнанацыянальнага дыялёгу».
- «Заклік наш палягаў у тым, каб гэтыя краіны, перш за ўсё ЗША і лідэры ЭЗ, зьвярнулі ўвагу на тыя колы, якія, скажам, у Польшчы, Літве ўсяляк выказваюць незадаволенасьць тым, што сытуацыя ў Беларусі нармалізуецца, і спрабуюць справакаваць гвалтоўныя дзеяньні, каб выклікаць адпаведную рэакцыю сілавікоў. Мы лічым гэта вельмі небясьпечным».
- «Унутры Беларусі, уключаючы апазыцыйныя колы, нямала пытаньняў наконт таго, наколькі легітымна была гэтая Каардынацыйная рада сфармаваная. Многія яе чальцы постфактум даведаліся пра тое, што іх туды ўключылі. Зь імі ніхто ня раіўся».
- «Няма ніякіх абʼектыўных прычын для таго, каб антырасейскія настроі распальваліся ў Рэспубліцы Беларусь. Але ахвотных справакаваць чарговы віток гвалту ў Беларусі мы назіраем».
- «Нам бы вельмі хацелася зразумець, якія ўсё ж такі палітычныя крытэры, паводле якіх гэтая Каардынацыйная рада хоча функцыянаваць. Было шмат супярэчлівых зьвестак пра тое, якая праграма ў рады». Цалкам чытайце тут.
На мітынгу за Лукашэнку ля Камароўкі выступіў Дзьмітры Паўлічэнка
У Менску на мітынгу ля Камароўскага рынку ў падтрымку Аляксандра Лукашэнкі выступіў экс-камандзір вайсковай часткі 3214, экс-камандзір СОБРа Дзьмітры Паўлічэнка, паведамляе Tut.by. Ён сказаў, што выступае ад імя вэтэранаў МУС, якія ў «ліхія 90-я» «абаранілі горад ад бандытызму і экстрэмізму на вуліцах». Пасьля гэтага, як сказаў Паўлічэнка, «20 год мы жылі ў міры і спакоі».
«Што ж адбылося цяпер? Банды Ціханоўскай, гэтыя экстрэмісты, найміты, крымінальная сфэра... На жаль, моладзь, некаторая частка, „апоеная“, „абкураная“, пачала граміць наш горад, і зноў АМАП і спэцназ сталі на яго абарону.
Трое сутак мы стаялі, вэтэраны разам са спэцназам і АМАПам, і разграмілі іх ушчэнт. Не дамо ж далей прасоўваць гэтыя экстрэмісцкія ідэі і экстрэмісцкія мэты. За „бацьку“, за Беларусь!» — сказаў Паўлічэнка.
На сьвята Незалежнасьці ў Менску прыйшлі каля 5 тысяч чалавек
Сьвята Незалежнасьці пад парасонамі. Фотагалерэя
У 20.20 на плошчы Незалежнасьці было агулам каля 5 тысяч чалавек. Людзі запалілі ліхтарыкі, працягвалі слухаць выступоўцаў.
Пазьней людзі пачалі разыходзіцца. Па стане на 20.50 на плошчы застаецца каля 3 тысяч чалавек. Людзі крычаць «Караева пад суд», «Свабода палітвязьням», «Лукашэнку ў адстаўку». Уся плошча сьпявала «Тры чарапахі».
Выступаў дэпутат незалежнасьці Сяргей Антончык. Ён згадаў, што ў 1991 годзе быў старшынём рэспубліканскага страйкаму, тады на гэтую плошчу вышлі 100 тысяч рабочых. Антончык кажа, што гэта забіла апошні цьвік у труну Савецкага Саюзу. Ён мяркуе, што сучасныя падзеі заб’юць апошні цьвік у труну цяперашняга рэжыму.
Пасьля 21-й гадзіны ў раёне плошчы Незалежнасьці ў Менску затрымалі некалькі чалавек, пішуць Tut.by чытачы. Непадалёк ад прыпынку схапілі чалавека і закінулі ў мікрааўтобус. Затрымалі чалавека са сьцягам непадалёк ад касьцёла: хлопец проста ішоў зь дзяўчынай, яе адпусьцілі. Цяпер вакол плошчы езьдзяць мікрааўтобусы без нумароў. Падобна, што затрымліваюць людзей са сьцягамі.
ЭЗ плянуе ўвесьці санкцыі супраць 15-20 грамадзян Беларусі ў бліжэйшыя тыдні
Эўрапейскі Зьвяз можа ўвесьці санкцыі ў дачыненьні да 15-20 грамадзян Беларусі за фальсыфікацыю вынікаў прэзыдэнцкіх выбараў і прымяненьне гвалту да пратэстоўцаў, напісаў у твітэры карэспандэнт Радыё Свабода ў Брусэлі Рыкард Юзьвяк.
«Чыноўнік ЭЗ кажа, што 15-20 чалавек зь Беларусі трапяць пад санкцыі ЭЗ, я чуў пра „каля 10“. У любым з гэтых выпадкаў гэта невялікая колькасьць, але ідэя палягае ў тым, што гэтая колькасьць можа ўзрасьці ў бліжэйшыя тыдні/месяцы», — адзначыў Юзьвяк.