Фінская авіякампанія Finnair будзе аблятаць Беларусь
Пра гэта яна заявіла 25 траўня, перадае Reuters. Прадстаўніца Finnair паведаміла, што гэтае рашэньне ім рэкамэндавала прыняць Фінскае агенцтва транспарту і сувязі.
«Белавія» забаранілі лятаць у Францыю. Air France будзе абмінаць Беларусь
Францыя прыпыніла дазвол на палёты «Белавія» і рэкамэндавала францускім авіякампаніям абмінаць Беларусь, паведаміў міністар транспарту Жан-Батыст Джэбары на сваёй старонцы ў твітэры.
«У мэтах бясьпекі пасажыраў я папрасіў авіякампаніі, якія працуюць у Францыі, больш не лятаць над паветранай прасторай Беларусі. Дазвол на палёты „Белавія“ таксама прыпынены», — напісаў францускі міністар.
24 траўня гэткія ж рашэньні прыняла Вялікая Брытанія.
Украіна з 00:00 26 траўня спыняе авіязлучэньне зь Беларусьсю
Як паведаміў у сваім тэлеграм-канале прэм’ер-міністар Украіны Дзяніс Шмыгаль, урад ухваліў адпаведнае рашэньне і даручыў Міністэрству інфраструктуры, Дзяржаўнай авіяцыйнай службе і дзяржаўнаму прадпрыемству «Украерорух» забясьпечыць ягонае выкананьне.
Дзяніс Шмыгаль удакладніў, што ўкраінскім авіякампаніям і самалётам забараняецца выконваць палёты ў паветранай прасторы Беларусі. Дзяржаўная памежная служба Ўкраіны атрымала загад у мытных пунктах аэрапортаў спыніць афармленьне пасажыраў, якія прыбываюць зь Беларусі або накіроўваюцца ў Беларусь.
Хто цяпер аблятае Беларусь?
Пра спыненьне палётаў па-над Беларусьсю і змушанае павелічэньне часу пералётаў заявіў шэраг міжнародных кампаній, у прыватнасьці, такія вядомыя як фінскі Finnair, францускі Air France, польскі LOT, швэдзкая SAS, кіпрская Avia Solutions, літоўская KlasJet, аўстрыйскі Austrian Airlines, вугорскі Wizz Air, латыская airBaltic, нідэрляндзкая KLM і нямецкая Lufthansa.
Ёсьць у сьпісе і азіяцкая кампанія Singapore Airlines.
У Літве ад сёньня ўступіла ў сілу забарона на прыём і вылет самалётаў, якія перасякаюць Беларусь
Па словах міністра камунікацый і транспарту Маруса Скуодзіса, на працягу сутак забарона закране каля 180 рэйсаў па 26 напрамках, у асноўным гэта адносіцца да маршрутаў паўднёвага напрамку, цытуе чыноўніка ТАСС.
«Белавія» адмяніла палёты ў Лёндан і Парыж з 25 траўня па 30 кастрычніка 2021 году
Гэта адбылося «у сувязі з рашэньнем урадаў Вялікай Брытаніі і Францыі аб забароне рэйсаў «Белавія» ў дадзеныя краіны, растлумачылі ў кампаніі.
«Мы засмучаны сытуацыяй, якая склалася, якую ня ў сілах зьмяніць», — адказалі ў «Белавія».
Пасажыры могуць вярнуць поўны кошт білетаў бяз штрафаў або зьмяніць дату вылету на працягу тэрміну дзеяньня авіябілету.
Як абмінаюць Беларусь
Хто быў у небе над Беларусьсю а 10-й гадзіне
- «Аэрафлот» з Калінінграду ў Маскву
- SmartAvia з Масквы ў Калінінград
- «Белавія» з Анталіі ў Магілёў
- «Белавія» з Анаталіі ў Менск
- Uzbekistan Airways з Ташкенту ў невядомым кірунку
- Нявызначаны самалёт маркі Gulfstream GVII-G500
- Нявызначаны самалёт маркі Hawker 750
- Грузавы борт з Сэулу ў Вену
