У ЗША Вялікае журы выставіла абвінавачаньні супраць 12 супрацоўнікаў расейскай вайсковай выведкі ГРУ ў справе аб ўмяшаньні ў выбары прэзыдэнта ЗША. Пра гэта абвясьціў намесьнік генэральнага пракурора ЗША Род Розэнстайн.
Паводле яго, абвінавачаным інкрымінуецца арганізацыя кібэратакі з мэтай крадзяжу дакумэнтаў і іх наступнай публікацыі. Імёны абвінавачаных пакуль не называюцца.
Паводле Розэнстайна, праваахоўныя органы кіраваліся вяршэнствам права, а не палітычнымі сымпатыямі.
Крэмль дагэтуль неаднаразова адмаўляў любыя цьверджаньні аб сваіх спробах ўмяшацца ў выбарчую кампанію ў ЗША. Прэзыдэнт ЗША Дональд Трамп ня раз выказваў сумневы ў высновах амэрыканскіх спэцслужбаў пра тое, што Масква спрабавала паўплываць на амэрыканскіх выбарнікаў.
Выступаючы перад журналістамі ў Вашынгтоне, Розэнстайн заявіў, што прэзыдэнт Трамп ў курсе вынікаў расьсьледаваньня і абвінавачаньняў у адрас 12 супрацоўнікаў ГРУ. Ён быў афіцыйна праінфармаваны аб гэтым перад пачаткам эўрапейскага турнэ.
Цяпер Трамп знаходзіцца ў Вялікай Брытаніі. 16 ліпеня ён сустрэнецца ў Хэльсынкі з прэзыдэнтам Расеі Ўладзімірам Пуціным.