Арганізатары фэстывалю дакумэнтальнага кіно аб правах чалавека Watch Docs Belarus распачалі онлайн-галасаваньне за «антыпрэмію».
«Мы хочам абараняць правы чалавека ня толькі з дапамогай паказу фільмаў і абмеркаваньняў, але і дзеяньнем, адзначаючы мэдалём „за выбітныя заслугі ў галіне правоў чалавека“ асобныя органы, структуры, ініцыятывы або іх прадстаўнікоў», — расказваюць арганізатары.
Яны сьцьвярджаюць, што хочуць толькі пазначыць моманты, якія можна палепшыць і на якія варта зьвярнуць увагу, таму запрашаюць намінантаў на цырымонію ўручэньня «антыпрэміі».
Галасаваць можна на сайце Watch Docs.
Намінаваныя:
- Спэцкамбінат КБА, які ладзіў «добраўпарадкаваньне» (частковы знос) Вайсковых могілак у Менску;
- «Менская спадчына», што правяла сумнеўную рэканструкцыю менскай вуліцы Камсамольскай (якая летам стала амаль «суднаходнай»);
- Беларуская праваслаўная царква, якая зьнесла будынак на вул. Вызваленьня, 6, што меў статус гісторыка-культурнай каштоўнасьці, каб збудаваць сабе новы духоўна-асьветніцкі цэнтар;
- Адміністрацыя Першамайскага раёну Менску за фразу намесьніка старшыні Васіля Косаўца: «Нікога не цікавіць, што вы думаеце! Вас сабралі, каб праінфармаваць аб спосабах выказаць сваю думку»;
- «Менскзеленбуд» за высяканьне соцень дрэваў;
- Дэпутат Ігар Марзалюк за крытыку законапраекту супраць хатняга гвалту, якая, паводле арганізатараў, супярэчыць Канстытуцыі, Кодэксу аб шлюбе і сям’і і Ўсеагульнай дэклярацыі правоў чалавека;
- Міністэрства працы за тое, што лічыць «дармаедамі» нават тых, хто сплаціў падаходны падатак;
- Сьледчы камітэт за «справу БелТА» і штрафы журналістам;
- Менскі райвыканкам за «горадабудаўнічыя маніпуляцыі» ў Бараўлянах;
- Камітэт архітэктуры Менгарвыканкаму за знос кінатэатру «Авангард».