У Маскоўскім судзе закончыўся працэс над былым генэральным дырэктарам Менскага заводу шасьцерняў Сяргеем Пацкевічам.
Акрамя Пацкевіча, на лаве падсудных знаходзіўся таксама ягоны знаёмы, былы прадстаўнік Чарапавецкага ліцейнага мэталюргічнага заводу Ўладзімер Пашкевіч.
Абодва прызнаныя вінаватымі ў атрыманьні хабару ў асабліва буйным памеры і асуджаныя на зьняволеньне без канфіскацыі маёмасьці. Сяргей Пацкевіч — на 7,5 года калёніі ўзмоцненага рэжыму, Уладзімер Пашкевіч — на 5 гадоў калёніі ўзмоцненага рэжыму. Падчас судовых спрэчак пракурор папрасіў пакараць Пацкевіча васьмю гадамі зьняволеньня, Пашкевіча — пяцьцю.
Тры хабары за паўгода
Паводле сьледзтва, з жніўня 2018-га і да лютага 2019 году Сяргей Пацкевіч за тры разы атрымаў агулам больш як 30 тысяч эўра хабару. Спачатку 6100 даляраў, праз два месяцы — 5 тысяч эўра, і сёлета ў лютым — яшчэ 20 тысяч эўра. Таксама яму інкрымінаваны намер атрымаць яшчэ 5 тысяч эўра, але ўгода сарвалася «зь незалежных ад яго прычын».
Яшчэ ў пачатку працэсу экс-гендырэктар МЗШ цалкам прызнаў віну. Паводле Пашкевіча, грошы свайму даўняму знаёмаму Сяргею Пацкевічу ён перадаваў банальна, у звычайных канвэртах. І самы вялікі хабар аддаў проста ў службовым кабінэце.
ГЛЯДЗІЦЕ ТАКСАМА: Хто прапанаваў хабар? На судзе экс-кіраўніка менскага завода ключавы сьведка абверг падсуднагаАле за што ішлі грошы?
Паводле сьледзтва, хабар перадаваўся ад грамадзяніна Дзёміна, прадстаўніка польскай фірмы Remix S. A., якая займаецца вытворчасьцю і пастаўкамі абсталяваньня для апрацоўкі мэталаў.
Фірма заключыла з МЗШ кантракт на пастаўку лініі печаў на суму больш як мільён эўра. Печы былі патрэбны для мадэрнізацыі вытворчасьці шасьцерняў.
Летась кантракт пачаў дзейнічаць, пастаўкі выконваліся, а вось авансавыя выплаты затрымлівалася.
«Гэта агульная хвароба беларускай прамысловасьці — несвоечасовыя плацяжы», — паскардзіўся ў судзе падсудны Ўладзімер Пашкевіч, які ў жыцьці працаваў шмат на якіх прадпрыемствах і фірмах і сьцьвярджае, што ведае, пра што гаворыць.
А далей Пашкевіч расказаў, як летась знаёмы яму бізнэсовец Дзёмін «выйшаў на яго» ды папрасіў перадаць гендырэктару МЗШ умовы асабістай дамовы: за 3% ад сумы кантракту той мае забясьпечыць «своечасовую аплату». І гендырэктар пагадзіўся.
Першы авансавы плацеж прайшоў у жніўні, тады ж для Пацкевіча, паводле Пашкевіча, былі перададзеныя 6 тысяч 100 даляраў. Другі плацеж быў пералічаны праз два месяцы, і неўзабаве Пацкевіч атрымаў 5 тысяч эўра. Апошняму хабару, на 20 тысяч эўра, нібыта таксама папярэднічаў плацеж згодна з кантрактам з польскай фірмай.
Адметна, што ў гаспадарлівага Ўладзімера Пашкевіча пры вобшуку знайшлі запісы ўсіх сум перададзеных грошай.
ГЛЯДЗІЦЕ ТАКСАМА: Сябры і сваякі ня вераць, падсудныя прызнаюцца, опэры даказваюць. У Менску судзяць экс-гендырэктара МЗШ
Размовы дырэктара МЗШ праслухоўвалі
У матэрыялах справы прагучала, што размовы «перадатчыка» грошай Пашкевіча і прадстаўніка польскай фірмы Дзёміна апэратыўнікамі праслухоўваліся. У тых размовах гучалі лічбы, рабіліся пэўныя намёкі, зь якіх можна было здагадацца, што рыхтуецца перадача грошай. Вытрымкі з праслухоўваньня зачытаў пракурор.
Пра дзіўны выпадак напярэдадні перадачы першага хабару расказаў і сам падсудны Пашкевіч. Летась у жніўні ён ехаў з Жодзіна ў Менск на ранішняй электрычцы, вёз у кішэні атрыманыя напярэдадні ад Дзёміна «6 тысяч даляраў для Сьцяпанавіча» (гэтак, па бацьку, называў на допытах Сяргея Пацкевіча ягоны знаёмы Ўладзімер Пашкевіч). Але без прыгод у сталіцу дабрацца не ўдалося: з часткай пасажыраў Пашкевіча нібыта для праверкі дакумэнтаў ссадзілі з электрычкі міліцыянты і прывезьлі да сябе ва ўпраўленьне.
ГЛЯДЗІЦЕ ТАКСАМА: Затрымалі гендырэктара Менскага заводу шасьцераньПаводле матэрыялаў справы, 6100 даляраў, якія знайшлі ў Пашкевіча, зачынілі ў адмысловым сэйфе, а ключ перадалі ўласьніку грошай. Але з тых жа матэрыялаў вынікае, што, пакуль у пасажыраў электрычкі правяралі дакумэнты, Пашкевічавы купюры агледзелі і сфатаграфавалі. І толькі пасьля гэтага грошы Ўладзімеру Пашкевічу вярнулі, за дастаўленыя нязручнасьці папрасілі прабачэньня і зь міліцыі адпусьцілі.
«Потым я перадаў іх Сьцяпанавічу. Пазваніў на завод, каб заказаў мне пропуск, выйшаў зь ім на тэрыторыю і перадаў канвэрт. Сьцяпанавіч дастаў зь яго 100 даляраў і падзякаваў. Я таксама яму падзякаваў. На гэтым разышліся», — апісваў на судовым сьледзтве перадачу першага хабару Ўладзімер Пашкевіч.
Пасьля абвяшчэньня прысуду Пацкевіч заявіў, што будзе яго абскарджваць. Пазыцыя Пашкевіча невядомая. У канцы прысуду прагучала, што арыштаваныя ў Пашкевіча 2 тысячы эўра пойдуць у даход дзяржавы.
Дачка і жонка асуджанага Пацкевіча былі вельмі незадаволеныя прысудам, але ад камэнтару адмовіліся.
Супрацоўніца МЗШ, якая прадставілася Ларысай, гэтак пракамэнтавала справу Сяргея Пацкевіча і вынесены яму прысуд:
«Ведаю яго 30 гадоў, выдатны чалавек і найлепшы кіраўнік, якіх сустракала, — сказала жанчына. — Так, гэта адбылося, з кожным можа адбыцца. Але ён прызнаў віну, сказаў, што гатовы загладзіць. Чаму пракурор заявіў у спрэчках, што Пацкевіч толькі часткова прызнаў віну? Незразумела. Адправіць за краты на такі вялікі тэрмін — гэта зашмат. Завод ад яго ніяк не пацярпеў, толькі выйграў. Вельмі шкада, што такі жорсткі прысуд».
Даючы паказаньні ў судзе, Сяргей Пацкевіч прызнаў сябе вінаватым, але пры гэтым заявіў, што злачынцам сябе ня лічыць. «Мне прапанавалі, я ня змог адмовіцца, але сам не дамагаўся хабару», — казаў экс-гендырэктар МЗШ.