Увечары 4 лютага прэзыдэнт ЗША Дональд Трамп выступіў на сумесным пасяджэньні абедзьвюх палат Кангрэсу са штогадовым дакладам аб становішчы краіны.
Даклад, зроблены за 9 месяцаў да прэзыдэнцкіх выбараў, прагучаў як перадвыбарчы выступ прэзыдэнта, са справаздачай аб дасягненьнях і прамай крытыкай у адрас апанэнтаў. На думку Трампа, тры гады ягонага прэзыдэнцтва вярнулі Злучаным Штатам росквіт: памяншэньне рэгуляваньня эканомікі, зьніжэньне падаткаў і новыя гандлёвыя дамовы сталі галоўнымі прычынамі ўстойлівага эканамічнага росту апошніх гадоў.
Паводле Трампа,
- за тры гады было створана 7 мільёнаў новых працоўных месцаў,
- беспрацоўе зьнізілася да найніжэйшага за 50 гадоў узроўню,
- рэкордна нізкае беспрацоўе і рэкордна высокая занятасьць зафіксавана сярод афраамэрыканцаў,
- рэзка зьнізіўся ўзровень беднасьці, ЗША ператварыліся ў найбуйнейшага ў сьвеце самадастатковага вытворцу энэргарэсурсаў.
Трамп зрабіў акцэнт на тым, што ўсяго гэтага ўдалося дамагчыся дзякуючы таму, што ён перакрэсьліў палітыку адміністрацыі свайго папярэдніка дэмакрата Барака Абамы. Падчас прамовы ён уступіў у амаль адкрытую палеміку з апанэнтамі з Дэмакратычнай партыі па розных пытаньнях. Сярод іншага,
- Апаніруючы дэмакратам, якія патрабуюць дадатковых грошай на дзяржаўныя школы, Трамп заклікаў Кангрэс выдзяліць грошы на праграму дапамогі бацькам, якія хочуць адправіць дзяцей у прыватныя школы, а не «ў недзеяздольныя дзяржаўныя».
- Абвясьціўшы пра посьпех спробаў перапыніць плынь нелегальнай міграцыі ў ЗША, Трамп абвінаваціў дэмакратаў у падтрымцы нелегалаў, якіх некаторыя штаты і гарады не выдаюць на патрабаваньне фэдэральнай іміграцыйнай службы і даюць ім бясплатнае мэдыцынскае абслугоўваньне.
- Заявіўшы, што ён згарнуў палітыку пашырэньня сувязяў з Кубай, Трамп абвясьціў, што ЗША аднавілі падтрымку дэмакратычных сілаў у Лацінскай Амэрыцы.
Трамп падкрэсьліў стаўку на ўмацаваньне абараназдольнасьці ЗША, значнае павелічэньне абароннага бюджэту, заявіў пра неабходнасьць скончыць амэрыканскую вайсковую прысутнасьць у Аўганістане.
Гаворачы пра пляны, Трамп заявіў пра намер кінуць значныя сродкі на абнаўленьне інфраструктуры краіны, на арганізацыю палётаў на Месяц і Марс і на канчатковую перамогу над эпідэміяй СНІДу, якая, паводле яго, можа быць дасягнутая да канца дзесяцігодзьдзя.
Заканадаўцы-дэмакраты амаль не пляскалі прэзыдэнту, а некаторыя зь яго заяваў былі сустрэтыя гулам абурэньня зь іх боку. Дзесяць заканадаўцаў-дэмакратаў байкатавалі зварот прэзыдэнта да Кангрэсу.
Падчас выступу Трамп нічога не сказаў аб працэсе імпічмэнту, які павінен завяршыцца 5 лютага галасаваньнем у Сэнаце ЗША. Перад пачаткам выступу ён не падаў рукі сьпікеру Палаты прадстаўнікоў Нэнсі Пэлосі, якая ініцыявала працэс імпічмэнту.
Адразу пасьля завяршэньня выступу Пэлосі, якая займала разам зь віцэ-прэзыдэнтам ЗША Майкам Пэнсам адно з двух старшынскіх крэслаў, разарвала тэкст выступу прэзыдэнта Трампа.