Аляксандар Лукашэнка пасьля галасаваньня 9 жніўня адказаў на пытаньні журналістаў. Вось што ён сказаў.
ГЛЯДЗІЦЕ ТАКСАМА: Выбары-2020. Пратэсты, затрыманьні і салідарнасьць. Што адбываецца ў БеларусіПра апанэнтаў
Аляксандар Лукашэнка сказаў, што «гатовы да дыялёгу з апанэнтамі ўлады». Але не абмінуў тэмы «правакацыяў». Ягоныя словы цытуе БелТА.
«Калі вы проста выказваеце сваю пазыцыю ці пазыцыю кагосьці, і там відаць, што гэта Пятроў, Сідараў, Іваноў, я гэта вітаю. Я гатовы з вамі асабіста весьці дыялёг. Калі вы тэндэнцыйна пачынаеце сябе паводзіць, я таксама гэта бачу, і стаўленьне адпаведнае.
А калі вы правакуеце, атрымаеце ў адказ тое ж самае. Вы што, хочаце спрабаваць скінуць уладу, зламаць нешта, укалоць, абразіць (як гэта вы рабілі спачатку больш, а цяпер менш) і чакаеце, што я ці хтосьці перад вамі стане на калені і будзе цалаваць пясок, па якім вы блукалі?
Ня будзе гэтага. Паводзьце сябе паводле закону, і ў нас прэтэнзій да вас ня будзе», — падкрэсьліў Аляксандар Лукашэнка.
Таксама Лукашэнка заявіў, што «абстаноўка на выбарах ня выйдзе з-пад кантролю». Як падкрэсьліў кіраўнік Беларусі, з раніцы ён заслухаў даклад Дзяржаўнага памежнага камітэту: за апошні час ва ўезьдзе адмовілі 170 грамадзянам, бо яны «ці фальшывыя візы паказвалі, ці ўвогуле не маглі патлумачыць, навошта едуць».
ГЛЯДЗІЦЕ ТАКСАМА: Штаб Ціханоўскай: восем чалавек з каманды затрымаліПра рэпрэсіі
Аляксандар Лукашэнка паведаміў журналістам пасьля галасаваньня, што «ніхто ніякіх рэпрэсіяў не прадпрымаў».
«Ніхто ніякіх рэпрэсіяў у парушэньне закону не прадпрымаў і рабіць не будзе. Выконвайце закон. Закон і толькі закон!», — падкрэсьліў кіраўнік дзяржавы.
Сёлетняя выбарчая кампанія ў Беларусі ператварылася ў хроніку рэпрэсіяў. Праваабаронцы налічылі больш за 1360 адвольных затрыманьняў з 6 траўня па 5 жніўня.
Арыштаваныя ў межах Крымінальнага кодэксу патэнцыйны кандыдат Віктар Бабарыка, два кіраўнікі ініцыятыўных групаў — Эдуард Бабарыка і Сяргей Ціханоўскі. На 8 жніўня праваабаронцы прызналі палітычнымі вязьнямі 26 чалавек.
Праваабаронцы паведамлялі пра шматлікія парушэньні падчас галасаваньня: завышэньне яўкі (на пэўных участках у 5–10 разоў), выдаленьні і затрыманьні незалежных назіральнікаў.
Пра каранавірус
Адказваючы на пытаньні журналістаў, Лукашэнка прыгадаў, як перахварэў на каранавірус. Пра каранавірус Лукашэнка, зь ягоных словаў, гаварыў падчас апошняй тэлефоннай размовы з Уладзімірам Пуціным.
«Я Пуціну даў параду: беражы сябе, бо хвароба вылечная (нашы лекары — малайцы, навучыліся), але такая прыкрая, што далей няма куды», — сказаў Лукашэнка.
ГЛЯДЗІЦЕ ТАКСАМА: Вахтарка менскай школы расказала пра фальсыфікацыі на датэрміновым галасаваньні
Пра адносіны з Расеяй
Аляксандар Лукашэнка сказаў, што «расейска-беларускія адносіны будуць складвацца ў нармальным рэчышчы».
«Што тычыцца пэрспэктывы (беларуска-расейскіх адносін), калі хтосьці чакае, што ў нас абсалютна сапсаваліся адносіны з Расеяй, — памыляецеся!» — падкрэсьліў Лукашэнка.
Ён сказаў, што падчас размовы Ўладзімір Пуцін паабяцаў дэталёва разабрацца з усім, што адбываецца. Гаворка пра затрыманьне ў Беларусі 33 вайскоўцаў з прыватнай вайсковай арганізацыі «Вагнэр».
Потым Лукашэнка заяўляў пра перакідваньне ў Беларусь і іншых груповак.
Пра назіральнікаў
Пасьля галасаваньня Лукашэнка, згадваючы назіральнікаў, паведаміў, што «ня хоча, каб пра Беларусь гаварылі дрэнна».
«Ня трэба чакаць, што перад намі расшаркаюцца і скажуць: «Малайцы беларусы!». Палітыка — гэта барацьба, а для нас — мастацтва магчымага. Мы не хочам, каб пра нас казалі дрэнна, але зыходзіць будзем з інтарэсаў беларускага народу», — заявіў Лукашэнка.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.