Мастачку Лізу Ганчарову асудзілі на 15 сутак. У судзе яна заявіла, што супраць яе прымянялі ўдушальныя прыёмы

На 15 дзён арышту суд Цэнтральнага раёну Менску пакараў ілюстратарку Лізу Ганчарову, якую затрымалі 13 сакавіка. Працэс вёў судзьдзя Дзьмітры Карсюк.

У судзе яна паведаміла, што супрацоўнікі АМАПу затрымлівалі яе вельмі жорстка, цягнулі па зямлі, некалькі разоў кідалі на асфальт і прымянялі ўдушальныя прыёмы.

У гэты ж дзень затрымалі і яе бацьку, якога асудзілі таксама 15 сутак.
Сьведкам на працэсе быў Іваноў Іван Іванавіч, супрацоўнік Цэнтральнага РУУС гораду Менску са зьмененымі дадзенымі.

Падчас апытаньня сьведка адпускаў зьедлівыя камэнтары. На яго думку, затрыманыя ў той дзень сабраліся з мэтай стварэньня відэакантэнту для экстрэмісцкіх тэлеграм-каналаў.

Падчас суду.

Усе хадайніцтвы адваката Андрэя Мачалава суд адхіліў, нягледзячы на недакладнасьці ў пратаколе і адсутнасьць доказаў віны.

Як судзілі бацьку Лізаветы

Спачатку суд разгледзеў справу шматдзетнага бацькі Аляксандра Ганчарова, паведамляе «Вясна».

Па пратаколе, ён «у 8.15 на вул. Мельнікайце, 13 браў удзел у пікетаваньні ў групе пяці чалавек». Па словах Аляксандра, у тую раніцу ён праходзіў паўз адміністрацыю Цэнтральнага раёну, але ўдзелу ў акцыі не прымаў. Дачку Лізавету ён убачыў насупраць адміністрацыі. У нейкі момант усе пачалі бегчы, а Аляксандар пачуў, як супрацоўнікі пачалі крычаць, што будуць страляць па нагах. У выніку іх усіх затрымалі.

Суд над мастачкай Лізаветай Ганчаровай.

У матэрыялах справы ёсьць фатаздымак удзельнікаў акцыі насупраць адміністрацыі. Сьведка-міліцыянт на судзе сказаў, што службу нёс разам з супрацоўнікамі АМАПу, ён жа і падаў суду фатаграфію з удзельнікамі «масавага мерапрыемства». Ён растлумачыў, што назіраў, як удзельнікі сталі ў ланцужок, і затрыманьні пачаліся адразу, як толькі тыя пачалі крычаць «Жыве Беларусь».

Той жа сьведка сьцьвярджае, што Аляксандар браў удзел у акцыі разам са сваёй дачкой, «якая любіць гэтае дзеяньне здымаць на тэлефон». Сьведка расказаў і пра намеры ўдзельнікаў:

«У іх былі велізарныя сьцягі і расьцяжкі, зь якімі яны хацелі хутка зрабіць фатаграфіі для дэструктыўных і экстрэмісцкіх тэлеграм-каналаў».

Што сказала на судзе затрыманая мастачка

Паводле пратаколу, Лізавета Ганчарова, як і яе бацька, прымала ўдзел у пікетаваньні ў групе пяці чалавек.

Мастачка ж патлумачыла на судзе, што праходзіла міма і ўбачыла людзей каля будынку. Яна палічыла гэта цікавым і прыгожым і вырашыла сфатаграфаваць. Але не пасьпела, бо пачалося затрыманьне. Спалохаўшыся, яна пачала ўцякаць, але ўпала, таму невядомыя пачалі цягнуць яе па асфальце.

Дзяўчына заявіла, што падчас затрыманьня яе душылі і закрывалі ёй вочы. Сілавікі не прадставіліся, некалькі разоў кідалі яе на зямлю, пакуль цягнулі ў мікрааўтобус. Са словаў Лізаветы, затрымлівалі яе каля пяці чалавек у цёмным адзеньні без апазнавальных знакаў.

Што казаў сьведка «Іваноў»

Са словаў сьведкі-міліцыянта, затрымлівалі Ганчарову супрацоўнікі АМАПу. Ён сьцьвярджае, што людзі сталі ў ланцужок з расьцяжкамі і пачалі выкрыкваць лёзунгі, каб зьняць гэта на камэру. Сьведка «Іваноў» сьцьвярджаў, што Лізавета нібыта асабіста трымала сьцяг.

Па словах сьведкі, ён прадставіўся і паказаў пасьведчаньне, але «ўдзельнікі вырашылі паспаборнічаць у бегу і прайгралі». Сьведка параіў удзельнікам «не са сьцягамі фатаграфавацца, а бегаць раніцай».

Падчас допыту сьведка блытаўся ў сваіх паказаньнях, піша Праваабарончы цэнтар «Вясна». Ён сьцьвярджаў, што затрымліваў дзяўчыну толькі адзін супрацоўнік АМАПу і суправадзіў яе да мікрааўтобуса, хоць яна і не хацела ісьці за ім.

Судзьдзя Карсюк адхіліў усе хадайніцтвы і пытаньні адваката, якія тычыліся пісьмовых матэрыялаў справы і маглі ўказаць на памылкі ў справе. У выніку Лізавету, як і бацьку, прызналі вінаватай па арт. 24.23 КаАП і арыштавалі на 15 сутак.

Паводле праваахоўнікаў, 13 сакавіка на вуліцы Мірашнічэнкі затрымалі пяць жанчын 25–40 гадоў, якія нібыта раздавалі ўлёткі. Трох зь іх раней затрымлівалі за ўдзел у маршах.

Яшчэ пяць чалавек схапілі насупраць будынку адміністрацыі Цэнтральнага раёну Менску, які яны пікетавалі. Чацьвёра — з Маскоўскага раёну Менску , пяты прыехаў на акцыю з-пад Дзяржынску, раней яго затрымлівалі за ўдзел у пратэстах.