Яна заявіла, што падтрымлівае збор доказаў пра катаваньні і рэпрэсіі для прыцягненьня вінаватых да адказнасьці, перадае БелаПАН.
«У той час як у працы Сталай рады [АБСЭ] быў перапынак, на жаль, у Беларусі не было перапынку ва ўжываньні рэпрэсій», — заявіла выканальніца абавязкаў намесьніка кіраўніка місіі ЗША ў арганізацыі Элізабэт Разэнсток-Сілер 16 красавіка на пасяджэньні Сталай рады АБСЭ ў Вене.
«Мы асабліва занепакоеныя правакацыйнымі, палітычна матываванымі арыштамі ўладамі членаў беларуска-польскай супольнасьці, — сказала яна. — Гэтыя арышты суправаджаліся яшчэ больш лютай антыпольскай прапагандай па беларускім дзяржаўным тэлебачаньні, а таксама ціскам на школы польскай мовы з мэтай атрыманьня падрабязнай інфармацыі пра іх настаўнікаў і вучняў (у тым ліку непаўналетніх)».
ГЛЯДЗІЦЕ ТАКСАМА: Анджэй Пачобут: «Стаўлюся да зьняволеньня як да камандзіроўкі»Разэнсток-Сілер таксама адзначыла: «Мы нагадваем нашым беларускім калегам, што іх грамадзяне, у тым ліку і польскага паходжаньня, ня ёсьць іх ворагамі. Мы заклікаем беларускія ўлады ня ставіцца да сваіх грамадзян як да праціўнікаў, а замест гэтага паважаць іх правы чалавека і асноўныя свабоды».
Прадстаўнік ЗША падкрэсьліла, што рэпрэсіі, якія падтрымліваюцца беларускай дзяржавай у дачыненьні да членаў польскай супольнасьці, суправаджаюцца ўшчамленьнем правоў на свабоду выказваньня думак, мірных сходаў і аб’яднаньняў.
«Мы падтрымліваем намаганьні Міжнароднай плятформы падсправаздачнасьці па Беларусі па зборы доказаў катаваньняў і рэпрэсій для прыцягненьня вінаватых да адказнасьці», — заявіла Разэнсток-Сілер.
ГЛЯДЗІЦЕ ТАКСАМА: Колькасьць беларускіх уцекачоў у Польшчы летась вырасла на 1000 працэнтаў у параўнаньні з 2019 годам ГЛЯДЗІЦЕ ТАКСАМА: Анджэй Пісальнік: «Выцягнулі з ложка і ўвесь час падганялі. Па нас прыйшлі 10 сілавікоў»