Літоўскія памежнікі за суботу выправадзілі з краіны двух мігрантаў, паведамляе Delfi са спасылкай на ўпраўленьне дзяржаўнай памежнай бясьпекі МУС Літвы.
Памежнікі за содні спынілі толькі адну спробу перасекчы мяжу ў абыход пунктаў пропуску.
Дазволілі трапіць у Літву тром мігрантам, падставай для гэтага сталі гуманітарныя прычыны.
ГЛЯДЗІЦЕ ТАКСАМА: Латвія і Літва прапускаюць транзытных мігрантаў зь Беларусі толькі з гуманітарных прычынаўПаблізу памежнай вёскі Горны Ўснар на польска-беларускім памежжы застаецца група з 32 мігрантаў з Афганістану. Gazeta Wyborcza апублікавала відэарэпартаж зь месца падзей. Польская памежная варта не пускала да мігрантаў лекара для праверкі здароўя, а таксама разгортвала калючы дрот на памежжы. Мігранты знаходзяцца там ужо больш за тыдзень.
Раней міністар абароны Польшчы Марыюш Блашчак паведаміў пра 100 км калючага дроту, разгорнутага на памежжы, а таксама заявіў пра падрыхтоўку яшчэ 50 км.
Праваабарончая арганізацыя «Ocalenie» заявіла пра тое, што кожны з 32 афганскіх уцекачоў папрасіў міжнароднай абароны ва ўладаў Польшчы, але нікога па-ранейшаму не пусьцілі. Прадстаўнік фонду заявіў прэсе, што афганцы вымушаныя выжываць у антысанітарных умовах і «польскія памежнікі робяцца падобнымі да беларускіх» з-за сваіх дзеяньняў.
Прэм’ер-міністар Польшчы Матэвуш Маравецкі патлумачыў узмацненьне аховы дзяржаўнай мяжы тым, што Лукашэнка працягвае карыстацца «мігрантамі, уцекачамі і наогул людзьмі як інструмэнтам».
ГЛЯДЗІЦЕ ТАКСАМА: «Праблему павінны вырашыць тыя, хто яе арганізаваў». На беларуска-польскай мяжы ўжо тыдзень заблякаваная група ўцекачоў. ФОТА