20 верасьня: Ролік пра курыцу
У інтэрнэце набірае папулярнасьць ролік, дзе жанчына расказвае, што цэлую курыцу ў краме набыць немагчыма — толькі разабраную, а каштуе яна даражэй.
Справа ў тым, што цэлая курыца — гэта сацыяльна значны тавар, цэны на які рэгулюе дзяржава. А разабраная — гэта ўжо не сацыяльна значны тавар, які можа каштаваць даражэй.
6 кастрычніка: Лукашэнку давяла «дохлая курыца»
6 кастрычніка Лукашэнка праводзіць нараду, дзе разносіць чыноўнікаў за «дохлую курыцу».
«Расчлянілі дохлую курыцу, увапхнулі ў поліэтыленавы пакет — новы тавар! Новы хлеб або разборка тушак на часткі, як вы называеце. А людзі вымушаны купляць тыя ж прадукты, але чамусьці па вышэйшай цане. Разумееце, да чаго дайшлі: цэлая тушка кураняці каштуе 2 рублі, а напалову расчлянёная — 5 рублёў, да прыкладу», — абураўся Лукашэнка.
7 кастрычніка: Пастанова пра «дохлую курыцу»
7 кастрычніка Міністэрства антыманапольнага рэгуляваньня і гандлю прыняло пастанову, якая рэгулюе цэны на курыцу і яе часткі.
Цана дзьвюх паўтушак не павінна перавышаць цаны самой тушкі, а цана іншых частак тушкі — цаны тушкі, павялічанай на 10%.
На курынае філе ўстаноўленая гранічная максымальная аптовая надбаўка, гандлёвая надбаўка (з улікам аптовай надбаўкі) у памеры 15%.
12 кастрычніка: Крымінальная справа за «дохлую курыцу»
Баранавіцкая пракуратура распачала крымінальную справу за беспадстаўнае павышэньне цаны на птушкафабрыцы «Дружба». Курыца гэтай вытворчасьці фігуравала ў роліку ў ТікТоку.
Гэта палічылі «перавышэньнем службовых паўнамоцтваў». Па гэтым артыкуле прадугледжана пакараньне ад 2 да 6 гадоў пазбаўленьня волі.
12 кастрычніка: Урад забараніў крамам разразаць курыцу
Пастановай забараняецца продаж у гандлёвых аб’ектах сьвежых, астуджаных або замарожаных частак тушкі птушкі. Выключэньне — гэта калі птушку разрэзалі мясаперапрацоўчыя ці птушкагадоўчыя прадпрыемствы.
Аднак забарона ня тычыцца часткова апрацаваных паўфабрыкатаў, напрыклад, калі курыцу замарынавалі, высушылі, завэндзілі ці інш.