Улады Расеі заявілі пра другую спробу атакі на бізнэс-цэнтар у Маскве. Ва Ўкраіне пасьля расейскіх атак бесьпілётнікамі ёсьць ахвяры.
У Маскве бесьпілётнікі даляцелі да ўрадавага комплексу
Мэр Масквы Сяргей Сабянін 1 жніўня паведаміў пра другую пасьля 30 ліпеня атаку дронамі на міжнародны бінэс-цэнтар «Масква-сіці». Паводле яго, некалькі бесьпілётнікаў нібыта зьбілі сродкамі супрацьпаветранай абароны, а адзін даляцеў да той жа вежы, што і два дні таму.
ГЛЯДЗІЦЕ ТАКСАМА: Маскву зноў атакавалі дроны, два зь іх патрапілі ў вежы «Масква-Сіці»«Пашкоджаны фасад на ўзроўні 21 паверху. На плошчы 150 квадратных мэтраў выбітыя шыбы. Інфармацыі пра пацярпелых няма», — напісаў Сяргей Сабянін у сваім тэлеграм-канале.
Паводле расейскага агенцтва РБК, пацярпелы будынак месьціцца ў «IQ-квартале», дзе знаходзіцца ўрадавы комплекс і некалькі міністэрстваў — лічбавага разьвіцьця, эканамічнага разьвіцьця, прамысловасьці і гандлю. З спасылкай на крыніцы ў міністэрстве эканамічнага разьвіцьця Расеі агенцтва паведаміла, што супрацоўнікам міністэрстваў рэкамэндавалі заставацца дома і ня ехаць на працу.
ГЛЯДЗІЦЕ ТАКСАМА: Зяленскі пра атаку на Маскву: «Вайна вяртаецца на тэрыторыю Расеі»У Харкаве зьбілі 7 з 10 дронаў, але адзін чалавек пацярпеў
У ноч на 1 жніўня расейскія войскі запусьцілі на Харкаў 10 іранскіх дронаў.
«Вельмі цяжкая ноч была ў Харкаве. Было тры пацэльваньні. Адно — у інтэрнат, які, на шчасьце, не выкарыстоўваўся. Таксама было пацэльваньне ў цэнтральнай частцы горада. Ёсьць адзін пацярпелы, які цяпер у лякарні», — паведаміў у эфіры ўсеўкраінскага тэлемаратону #UAРазом мэр Харкава Ігар Церахаў.
Паводле яго, паветраныя сілы Ўкраіны зьбілі 7 дронаў, але спатрэбіцца два дні аднавіць пашкоджаныя аб’екты і разабраць рэшткі.
На поўначы ўкраінскія памежнікі спынілі расейскую дывэрсійную групу
У памежнай службе Ўкраіны паведамілі аб спробе расейскай дывэрсійнай групы прарвацца церазь мяжу на поўначы ў ноч на 1 жніўня. З украінскага боку мяжы разьмешчана Сямёнаўская грамада Чарнігаўскай вобласьці.
Памежнікі заўважылі чатырох асобаў, якія рухаліся з тэрыторыі Расеі, адкрылі па іх агонь і спынілі.
На фронце адбылося больш за 40 баявых сутыкненьняў
У Генэральным штабе Ўзброеных сіл Украіны паведамілі, што за апошнія содні на лініях фронту адбылося больш за 40 баявых сутыкненьняў.
Украінскія войскі трымаюць абарону на купянскім кірунку (Харкаўская вобласьць) і наступаюць у паўднёвым кірунку ад Бахмуту.
Расейскія сілы намагаюцца спыніць прасоўваньне ўкраінцаў на запароскім кірунку, але, як паведаміла вайсковая выведка Вялікай Брытаніі, расейскім войскам там бракуе артылерыйскіх боепрыпасаў і рэзэрваў.
ГЛЯДЗІЦЕ ТАКСАМА: FT: сваякі сырыйскага прэзыдэнта Асада купілі 19 кватэр у Маскве за $40 мільёнаўВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.