Чатыры выпадкі за тры дні
18 сьнежня на праспэкце Чарняхоўскага ў Віцебску з даху ўпала глыба сьнегу і лёду, якая забіла 39-гадовую жанчыну. Распачатая крымінальная справа.
19 сьнежня ад сьнегавой масы з даху будынку пацярпела жыхарка Магілёва. Яе шпіталізавалі «з траўмамі рознай ступені цяжкасьці».
Камунальныя службы чысьцілі дах. Майстар камунальнікаў выйшла сачыць за працай. «У гэты час адбыўся сыход з даху дому сьнегавой масы зь лёдам. Жанчына атрымала траўмы, шпіталізаваная ў цяжкім стане», — паведамлялі ратавальнікі.
У той жа дзень глыба лёду ўпала з даху і на жыхарку Гомля. Гэта адбылося на праспэкце Леніна, у цэнтры гораду. Яна атрымала траўмы галавы, перанесла апэрацыю.
20 сьнежня ў Гомлі на вуліцы Валатоўскай ад падзеньня наледзі пацярпелі дзьве дзяўчынкі, 9 і 10 гадоў.
Гэта толькі тыя выпадкі, якія трапілі ў зводкі Міністэрства надзвычайных сытуацый і ў дзяржаўныя СМІ.
ГЛЯДЗІЦЕ ТАКСАМА: Два выпадкі падзеньня лёду з дахаў на людзей: сьмерць у Віцебску, траўма ў Гомлі«Справаздачы ў выканкамы аб сытуацыі са сьнегам»
Вуліца Валатоўская ў Гомлі, як і праспэкт Леніна, адносяцца да жыльлёва-камунальнага ўпраўленьня № 3.
«Але там ніхто з раніцы не бярэ слухаўку», — паведаміла Свабодзе жыхарка Гомля, якая спрабуе дазваніцца да камунальнікаў.
Паводле суразмоўцы, яна таксама патэлефанавала ў камунальнае ўпраўленьне «Цэнтральнае» ў Гомлі. Там адказалі, што ня ведаюць, ці прыбіраюць у цэнтры гораду сьнег з дахаў, параілі зьвяртацца ў ЖЭУ-3.
У Гомельскім гарадзкім ЖКГ жыхарам абласнога цэнтру гавораць, што ня ведаюць пра выпадак на Валатоўскай, але запэўнілі, што сьнег з дахаў чысьцяць, а «ўсе службы працуюць».
Жыхарка цэнтру Гомля Марыя (імя зьмененае. — РС) паведаміла Свабодзе, што ня бачыла, каб камунальнікі чысьцілі дахі.
«У Менску была, там бачыла, у нас неяк не заўважыла», — зазначыла яна.
Іншая жыхарка Гомля Алеся працуе ў адной з устаноў у цэнтры гораду. Яна расказала Свабодзе, што на прыбіраньні сьнегу як з дарогі, ходнікаў, так і з дахаў актыўна працуюць і камунальныя службы, і супрацоўнікі ўстановаў.
«Больш за тое, установы мусяць даваць некалькі разоў на дзень справаздачы ў выканкамы аб сытуацыі са сьнегам. Працуюць на прыбіраньні ўсе — як і камунальнікі, так і супрацоўнікі ўстаноў у цэнтры гораду. Камунальнікам, дарэчы, „прылятае“ ад мясцовай улады толькі так», — пераконвае Алеся.
ГЛЯДЗІЦЕ ТАКСАМА: «Зьмену сэзонаў мы адчулі». Загадчыца траўмапунтку расказала пра найбольш тыповыя зімовыя траўмы менчукоў«Не хадзіце пад дахамі»
Свае рэкамэндацыі, як пазьбегнуць магчымых траўмаў, апублікавала Міністэрства надзвычайных сытуацый. Там раяць быць асьцярожнымі і не хадзіць, па магчымасьці, пад дахамі.
«Не хадзіце пад дахамі, карнізамі будынкаў, не падыходзьце блізка да сьцен будынкаў і не ігнаруйце наяўнасьць загараджальнай стужкі», — гаворыцца ў паведамленьні.
Паводле ратавальнікаў, часьцей за ўсё ледзяшы ўтвараюцца над вадасьцёкамі, таму гэтыя месцы фасадаў будынкаў бываюць асабліва небясьпечныя, іх неабходна абыходзіць бокам, пажадана на адлегласьці, ня меншай за 3 мэтры.
«Калі падчас руху па тратуары вы пачулі наверсе падазроны шум, нельга спыняцца, паднімаць галаву і разглядаць, што там здарылася. Магчыма, гэта сход сьнегу ці ледзяной глыбы. Уцякаць ад будынка таксама нельга. Трэба як мага хутчэй прыціснуцца да сьцяны, і казырок даху паслужыць хованкай. Папярэдзіце аб ледзяной небясьпецы дзяцей, растлумачце, чаму нельга хадзіць і гуляць пад дахамі, карнізамі дамоў», — просяць у ведамстве.