«Патрабаваньне пракурора МКС выдаць ордэры на арышт ізраільскіх лідэраў абуральнае. Скажу ясна: на што б ні намякаў пракурор Міжнароднага крымінальнага суду, нельга ставіць знак роўнасьці паміж Ізраілем і ХАМАС (групоўка, прызнаная ЗША і ЭЗ тэрарыстычнай. — Рэд.). Мы заўсёды будзем падтрымліваць Ізраіль і супрацьстаяць пагрозам яго бясьпецы», — сказаў Байдэн у заяве, апублікаванай Белым домам.
Дзяржсакратар ЗША Энтані Блінкен такесама заявіў, што Вашынгтон «катэгарычна адхіляе» запыт пракурора МКС, у якім, па словах Блінкена, ён «прыраўняў» Ізраіль і ХАМАС.
Блінкен адзначыў, што задоўга да цяперашняга канфлікту на Блізкім Усходзе ЗША «ясна далі зразумець, што МКС ня мае юрысдыкцыі ў гэтым пытаньні». Кіраўнік Дзярждэпартамэнту лічыць, што рашэньне пракуратуры можа таксама паставіць пад пагрозу намаганьні ў дасягненьні пагадненьня аб спыненьні агню, якое дазволіла б вызваліць закладнікаў і павялічыць абʼём гуманітарнай дапамогі.
Міжнародны крымінальны суд (МКС) у Гаазе разгледзіць пытаньне аб выдачы ордэра на арышт прэмʼер-міністра Ізраіля Біньяміна Нэтаньягу, міністра абароны краіны Яава Галянта, палітычнага лідэра радыкальнай групоўкі ХАМАС Ісмаіла Ганіі, камандуючага вайсковым крылом арганізацыі Мухамада Дыяба аль-Масры і лідэра групоўкі ў сэктары Газа Ях'я Санвара.
Арыштаваць іх запатрабаваў пракурор МКС Карым Хан, гаворыцца на сайце суду. Пра гэта ж Хан сказаў у інтэрвію CNN.
У паведамленьні на сайце суду ад імя пракурора сьцьвярджаецца, што ёсьць усе падставы меркаваць, што Нэтаньягу і Галянт, а таксама трое лідэраў ХАМАС, прызнанай тэрарыстычнай арганізацыяй у ЗША і ЭЗ, маюць дачыненьне да ваенных злачынстваў і злачынстваў супраць чалавечнасьці на тэрыторыі сэктара Газа і Ізраілю.
Гаворка ідзе пра напад ХАМАС на Ізраіль 7 кастрычніка, падчас якога былі забітыя каля 1200 чалавек і больш за 200 захопленыя ў закладнікі, і распачатай Ізраілем у адказ кампаніі ў падкантрольным ХАМАС сэктары Газа, якая працягваецца дагэтуль. Паводле дадзеных палестынскага боку, у Газе з кастрычніка мінулага году загінулі больш за 35 тысяч чалавек, галоўным чынам цывільныя жыхары.
Лідэраў ХАМАС пракурор МКС абвінавачвае ў масавых забойствах, узяцьці закладнікаў, актах сэксуалізаванага гвалту, катаваньнях і жорсткім абыходжаньні зь людзьмі. У прыватнасьці адзначаецца, што абвінавачаньне лічыць Санвара, аль-Масры і Ганію вінаватымі ў забойстве сотняў грамадзян Ізраілю падчас нападаў 7 кастрычніка. Карым Хан таксама заклікаў неадкладна вызваліць усіх закладнікаў, якіх утрымлівае ХАМАС.
ГЛЯДЗІЦЕ ТАКСАМА: Паліцыя затрымала некаторых удзельнікаў прапалестынскіх студэнцкіх дэманстрацый у ЗШАВайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетнага ўдару з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.