Экс-кіраўніцы страйкаму «Нафтана» Вользе Брыцікавай дадалі 3 гады да тэрміну па новым абвінавачаньні, агулам тэрмін яе зьняволеньня склаў 6 гадоў.
Пра гэта стала вядома з маніторынгу праваабарончага цэнтру «Вясна» за верасень 2024 году. Выніковы прысуд актывістцы — 6 гадоў калёніі.
Разгляд справы Вольгі Брыцікавай пачаўся ў сакавіку 2024 года, а 8 красавіка Віцебскі абласны суд пакараў яе на 3 гады калёніі паводле артыкулу аб распальваньні варожасьці (артыкул 130 КК).
20 жніўня актывістку зноў пачалі судзіць, у абвінавачаньні былі артыкулы аб закліках да захадаў супраць нацыянальнай бясьпекі (частка 3 артыкула 361 КК) і садзейнічаньні экстрэмісцкай дзейнасці (частка 1 артыкула 361-4 КК).
Суд праходзіў у закрытым рэжыме, Вользе дадалі тры гады калёніі да тэрміну.
Your browser doesn’t support HTML5
Хто такая Вольга Брыцікава, якую пакаралі трыма гадамі калёніі
- Вольга Брыцікава знаходзіцца пад вартай са жніўня 2023 году. Да таго прафсаюзную актывістку некалькі разоў каралі адміністрацыйнымі арыштамі, толькі ў 2022 годзе яна агулам адбыла за кратамі 105 дзён.
- У жніўні 2020 году Вольга Брыцікава, якая тады працавала на адказнай пасадзе ў ААТ «Нафтан», узначаліла страйкам работнікаў аб’яднаньня, якія выставілі шэраг патрабаваньняў да дзейнай улады краіны.
- Сярод патрабаваньняў былі адстаўка Аляксандра Лукашэнкі, правядзеньне новых прэзыдэнцкіх выбараў, пакараньне вінаватых у гвалце над пратэстоўцамі сілавікоў.
- Беларускія праваабаронцы прызналі Вольгу Брыцікаву палітзьняволенай.
- Брыцікаву таксама ўнесьлі ў «сьпіс экстрэмістаў».