Паводле зьвестак ЦАХАЛ, падчас спэцапэрацыі ў сэктары Газа загінулі тры прадстаўнікі ХАМАС. «ЦАХАЛ і Агульная служба бясьпекі Ізраілю правяраюць магчымасьць таго, што адным з тэрарыстаў быў Ях’я Сінвар. На цяперашнім этапе асобы тэрарыстаў ня могуць быць пацьверджаныя», — гаворыцца ў паведамленьні ізраільскай арміі.
Паводле заявы ізраільскіх вайскоўцаў, у будынку, дзе знаходзіліся забітыя, прыкметаў прысутнасьці закладнікаў не было.
Sky News Arabia піша, што іх крыніца пацьвердзіла гібель лідэра ХАМАС падчас апэрацыі ў Рафаху.
Чальцоў кабінэта бясьпекі Ізраіля праінфармавалі, што лідэр ХАМАС Ях’я Сінвар хутчэй за ўсё, мёртвы, піша Reuters са спасылкай на інфармацыю ад двух чыноўнікаў, абазнаных у пытаньні. Дзьве ізраільскія тэлекампаніі, KAN і N12 News, таксама спаслаліся на ізраільскіх чыноўнікаў, якія заявілі, што Сінвар мёртвы.
У ХАМАС магчымую гібель Ях’і Сінвара пакуль не камэнтавалі.
Ях’я Сінвар нарадзіўся ў 1962 годзе ў лягеры для ўцекачоў у горадзе Хан-Юніс на поўдні сэктара Газа. Больш за 20 гадоў ён правёў у ізраільскіх турмах і вызваліўся ў 2011 годзе. Паводле зьвестак Reuters, Сінвар хаваўся ў сэктары Газа. Пасаду лідэра ХАМАС ён заняў на пачатку жніўня 2024 году, пасьля таго як быў забіты Ісмаіл Ханія ў выніку ўдару па ягонай рэзыдэнцыі ў Тэгеране.
Ях’я Сінвар, меркаваны архітэктар крывавага нападу на Ізраіль 7 кастрычніка, быў нечакана прызначаны новым лідэрам тэрарыстычнай групоўкі ХАМАС 6 жніўня 2024 году пасьля забойства ягонага папярэдніка Ісмаіла Ханіі ў Тэгеране 31 ліпеня, у чым Іран і ХАМАС вінавацяць Ізраіль.
Сінвар далучыўся да ХАМАСу неўзабаве пасьля яго ўтварэньня ў 1987 годзе. Ён заснаваў службу ўнутранай бясьпекі Аль-Маджд, галоўнай мэтай якой было шукаць у шэрагах арганізацыі ізраільскіх шпіёнаў. Ён займеў рэпутацыю прыхільніка гвалту і атрымаў мянушку «Мясьнік Хан-Юнісу».
ГЛЯДЗІЦЕ ТАКСАМА: У «бязьлітасным» Сінвару, які ўзначаліў ХАМАС, Іран бачыць свайго чалавека — аналітыкі ГЛЯДЗІЦЕ ТАКСАМА: ЗША выставілі абвінавачаньні ў тэрарызьме лідэрам ХАМАС