З 10 сьнежня ўводзіцца маршрут «Менск — Варшава» зь перасадкай у Берасьці. Пра гэта Свабодзе сказалі ў даведцы менскага чыгуначнага вакзалу.
Пасьля скасаваньня ў 2015 годзе маршруту «Менск — Варшава» пасажыры мусілі карыстацца расейскімі цягнікамі да Варшавы, квіткі на якія каштуюць ад 145 рублёў і вышэй.
Цяпер паездка зь Менску да Варшавы будзе каштаваць ад 41 да 62 рублёў. Праўда, давядзецца набываць два квіткі — зь перасадкай у Берасьці. Перасадка эканоміць паўтары гадзіны часу, які раней ішоў на зьмену шырыні каляі цягніка.
У выніку разам з гадзіннай стыкоўкай шлях да польскай сталіцы зойме 6 з паловай гадзін, у адваротным кірунку — 10 гадзін.
Рэйсы будуць дзённыя, цягнікі — сучасныя, але сядзячыя. Квіткі пакуль не прадаюцца.
Прэсавая служба Беларускай чыгункі апэратыўна даць дадатковую інфармацыю адмовіліся.