«98% беларусаў супраць аб’яднаньня з Расеяй». Лукашэнка выступае, мы цытуем і камэнтуем. ЖЫВЫ БЛОГ

Мінулая «Вялікая размова…» прайшла два гады таму, 3 лютага 2017-га. Яна стала рэкордна доўгай для Лукашэнкі — 7 гадзінаў і 21 хвіліна.

На сустрэчы з Лукашэнкам прысутнічае карэспандэнт Свабоды. Як і мінулым разам, на яе запрасілі прадстаўнікоў незалежных СМІ — але той раз ім не далі нічога спытаць.

У Свабоды ёсьць шмат пытаньняў, якія хацелася б спытаць у Лукашэнкі. Тут сфармулявана 10 асноўных. У мінулым красавіку Лукашэнка размаўляў зь дзяржаўнымі СМІ — Свабоду туды не паклікалі, мы агучылі 12 пытаньняў, Лукашэнка даў адказы на палову зь іх.

Большую частку папярэдняй «размовы» Лукашэнка зьвяртаўся да Яраслава Раманчука — эканаміста з апазыцыйнай Аб’яднанай грамадзянскай партыі. За сем з паловай гадзінаў той не выходзіў з залі, як і сам Лукашэнка.

Раманчук запрошаны і на сёньняшнюю размову. Прысутнічаюць і прадстаўнікі апазыцыі: старшыня БНФ Рыгор Кастусёў, Алег Трусаў і дэпутатка, цяперашняя старшыня ТБМ Алена Анісім…

«Вялікая размова» адбываецца на фоне спрэчак Лукашэнкі з Крамлём, у якіх ён то бачыць, то ня бачыць пагрозы сувэрэнітэту. Неўзабаве маюць агучыць даты парлямэнцкіх і прэзыдэнцкіх выбараў — нейкія зь іх могуць прайсьці ўжо 1 сьнежня. Эканоміка тым часам ня падае і не асабліва расьце: «па пяцьсот» зноў не ўтрымаліся; ня ўсе паказьнікі вярнуліся на ўзровень да крызісу; Беларусь усё набірае крэдыты на выплату крэдытаў.

Пра фэйкавыя навіны

Аляксандар Лукашэнка пачаў прамову з «фэйкавых навінаў», «якія падвышаюць градус напружанасьці ў грамадзтве».

«Таму трэба, каб СМІ, якія пазыцыянуюць сябе як незалежныя (як і незалежныя экспэрты), адчувалі „мяжу дапушчальнага“, адказвалі за кожнае сказанае слова», — заявіў Лукашэнка.

Пра гонку ўзбраеньняў

У разгары «гонка ўзбраеньняў», заявіў Лукашэнка:

«Польшча да 2026 году затраціць на абарону 50 мільярдаў даляраў. І ўсе маўчаць. Але каб заўтра прайшла навіна, што Расея высунула дадатковы полк на захад ад Масквы, быў бы сусьветны гвалт. Дык давайце выпрацоўваць адзіныя крытэрыі падыходу да такіх падзеяў».

Тон — канфрантацыйны

З самага пачатку Лукашэнка ўзяў канфрантацыйны тон. Адразу кінуўся абвінавачваць незалежныя мэдыя за неаб’ектыўнасьць, «дэструктыўную крытыку», маўляў, яны вешаюць «локшыну на вушы». Чамусьці адразу пачаў абвінавачваць Польшчу.

Пра адкрытую хлусьню

Лукашэнка заявіў, што рэгулярна праглядае ўсю аналітыку — і афіцыйную, і незалежную. І яго зьдзіўляе, калі ідзе адкрытая хлусьня. Ён заклікаў да аб’ектыўнасьці «лідэраў меркаваньняў», адказных за фармаваньне грамадзкай думкі.

Пра саюзную дзяржаву з Расеяй

Першае слова далі прадстаўніку расейскага СМІ «Говорит Москва». Той пацікавіўся пэрспэктывамі так званай Саюзнай дзяржавы — маўляў, гэта вельмі хвалюе Расею.

«Дзякуй Богу, што ў Расеі нарэшце пачалі хвалявацца, з чаго раптам? — пажартаваў Лукашэнка. — Калі мы падпісалі дамову, там былі прадугледжаныя крокі па стварэньні Саюзнай дзяржавы? Былі. І галоўны — прыняцьце Канстытуцыі, дзе былі б прапісаныя ўсе пункты, ад агульнай валюты да органаў кіраваньня. Нічога не адбылося. І раптам успомнілі.

Я заўсёды гаварыў, што лёс наш такі — жыць разам. Як гісторык падводжу пад гэта ў тым ліку гістарычную базу. Да гэтага часу маглі б жыць калі не ў фэдэрацыі, дык у канфэдэрацыі. Але сама Расея была да гэтага не гатовая!»