У расейскім Уладзівастоку затрыманы адзін зь лідэраў гомельскай банды Марозава Сяргей Дзербянёў, які больш за 14 гадоў знаходзіўся ў міжнародным вышуку за забойствы на Гомельшчыне ў канцы 1990-х — пачатку 2000-х гадоў, паведамляе Міністэрства ўнутраных спраў Беларусі.
Дзербянёў працаваў ахоўнікам на адным з прадпрыемстваў, падчас затрыманьня ён прад’явіў расейскі пашпарт на чужое імя.
«Мяркуецца, дакумэнт сапраўдны. Трэба высьветліць, на якой падставе ён быў выдадзены затрыманаму», — сказалі ў Галоўнай управе барацьбы з арганізаванай злачыннасьцю і карупцыяй (ГУБАЗіК) МУС Беларусі, прадстаўнікі якой разам з супрацоўнікамі ФСБ Расеі затрымалі Дзербянёва.
Цяпер 52-гадовы гамяльчук знаходзіцца ў СІЗА, рыхтуецца працэдура ягонай экстрадыцыі ў Беларусь.
На волі застаюцца яшчэ два ўдзельнікі гомельскай «банды Марозава», іх пошук працягваецца.
Банда «Марозаўцы» дзейнічала ў Гомельскай вобласьці ў 1990-х. Групоўка займалася забойствамі, крадзяжамі, рабункамі і вымаганьнем. Маводле МУС, усяго сьледзтва даказала больш за 100 злачынстваў, учыненых «марозаўцамі», у тым ліку каля 20 забойстваў. Ахвяраў катавалі, пасьля расстрэльвалі, а целы з прывязанымі гірамі скідвалі ў раку Сож.
Лідэр групоўкі Сяргей Марозаў быў расстраляны на рашэньне суду ў 2006 годзе, як і два актыўныя яе ўдзельнікі — Валеры Гарбаты і Ігар Данчанка. Астатнія «марозаўцы» атрымалі ад 6 да 20 гадоў пазбаўленьня волі.
Начальнік крымінальнага вышуку УУС Мікалай Лосеў, які «крышаваў» бандытаў, атрымаў 18 гадоў пазбаўленьня волі. Некаторыя злачынцы і іхныя памагатыя, такія як супрацоўнік пракуратуры Анатоль Сусолкін, уцяклі за мяжу і дасюль знаходзяцца ў вышуку.
