Ад каго Лукашэнка зьбіраецца бараніць незалежнасьць, калі адносіны з Расеяй паляпшаюцца?
Паляпшэньне адносін паміж Менскам і Масквою разбурае ўсю перадвыбарчую піяраўскую канструкцыю аб пагрозе незалежнасьці з боку Расеі і вобраз Лукашэнкі як абаронцы сувэрэнітэту, разважае аналітык Свабоды Валер Карбалевіч у новым блогу. Чытайце па спасылцы.
Суд не задаволіў скаргу на затрыманьне Бабарыкі
У судзе Цэнтральнага раёну Менску 24 чэрвеня на закрытым паседжаньні разглядалі скаргу адвакатаў на затрыманьне патэнцыйнага кандыдата ў прэзыдэнты Віктара Бабарыкі, піша Tut.by. Скаргу не задаволілі, адвакаты зьбіраюцца абскардзіць рашэньне ў Менскім гарадзкім судзе. Цалкам чытайце тут.
Ці магчыма вярнуць Канстытуцыю 1994 году? Разьбіраемся з экспэртамі
Празь дзень пасьля затрыманьня Віктара Бабарыкі ягоны штаб апублікаваў відэазварот. У ім патэнцыйны кандыдат у прэзыдэнты заклікаў ініцыяваць рэфэрэндум аб зьменах у Канстытуцыю. А за ўзор узяць Канстытуцыю 1994 году. Свабода запыталася ў экспэртаў, наколькі рэальна рэалізаваць заклік Віктара Бабарыкі. Чытайце па спасылцы.
З пачатку выбарчай кампаніі больш за 300 чалавек агулам асудзілі на 1568 сутак і 167 000 рублёў штрафаў
Паводле праваабаронцаў «Вясны», з пачатку цяперашняй выбарчай кампаніі 111 чалавек атрымалі агулам 1568 содняў арышту паводле адміністрацыйных артыкулаў, выкарыстаных у мэтах палітычнага перасьледу. 205 чалавек пакараныя штрафамі агульным памерам больш за 167000 рублёў.
Праваабаронцам вядома прынамсі пра 650 адвольных затрыманьняў у пэрыяд з 6 траўня па 23 чэрвеня.
Толькі на акцыях «Ланцуг салідарнасьці» (а таксама перад самімі акцыямі і пасьля), якія праходзілі па ўсёй Беларусі з 18 па 21 чэрвеня, агулам затрымалі больш за 360 чалавек у 19 гарадах Беларусі: Менск (больш за 260 чалавек), Гомель (13), Бабруйск (12), Наваполацак (10), Ганцавічы (10), Барысаў (10), Наваградак (9), Віцебск (7), Магілёў (6 ці болей), Берасьце (6), Рэчыца (3), Ваўкавыск (3), Маладэчна (3), Салігорск (2), Горадня (2), Ворша (2), Сьветлагорск (1), Ліда (1), Слуцак (мінімум 1).
Над часткай затрыманых на акцыях прайшлі 22 і 23 чэрвеня. 8 чалавек атрымалі агулам 90 дзён арышту і як мінімум 78 чалавекам агулам прысудзілі каля 50 500 рублёў штрафаў. На ўдзельнікаў акцыяў працягваюць складаць пратаколы і судзіць іх.
«Час Лукашэнкі скончыўся», — Сьвятлана Алексіевіч пра жорсткія затрыманьні і падтрымку Віктара Бабарыкі
«Мне падабаюцца людзі, якія сёньня выходзяць на вуліцы і якія кажуць уладам, што зь імі так абыходзіцца нельга», — нобэлеўская ляўрэатка Сьвятлана Алексіевіч перакананая, што народ прагне сумленных выбараў і падтрымлівае Віктара Бабарыку. Чытайце вялікае інтэрвію зь пісьменьніцай па спасылцы.
Францыя заклікала Беларусь захоўваць свабоду слова і дэманстрацыяў
Міністэрства замежных справаў Францыі заклікала Беларусь выконваць свае міжнародныя абавязаньні і забясьпечыць захаваньне свабоды слова і дэманстрацыяў.
«Турэмнае зьняволеньне двух кандыдатаў на будучых прэзыдэнцкіх выбарах у Беларусі, а таксама затрыманьне грамадзян і журналістаў на дэманстрацыях апошніх дзён у іх падтрымку супярэчаць міжнародным абавязаньням Беларусі як удзельніцы Арганізацыі бясьпекі і супрацоўніцтва ў Эўропе», — сказана ў заяве францускага замежнапалітычнага ведамства.
«Не ўкладаюцца ў галаве жорсткасьць і гвалт». Музыкі Naviband хочуць, каб беларусы «прачнуліся іншымі»
Удзельнікі папулярнага дуэту Naviband Ксенія Жук і Арцём Лук’яненка прэзэнтавалі ў Telegram песьню пад назвай «Іншымі». Яна прысьвечана апошнім падзеям у Беларусі.
«Мы любім нашу краіну, сьпяваем на роднай мове і шчыра верым у сьвятло, сілу і дабро нашых людзей, незалежна ад іх поглядаў! — напісалі музыкі ў сваім Інстаграме. —У нас не ўкладаецца ў галаве жорсткасьць і гвалт да звычайных людзей. Нам робіцца страшна. Маўчаць ўжо немагчыма! Мы прачнемся іншымі!». Цалкам чытайце тут.
Мікалай Казлоў: Лукашэнка рыхтуецца не да выбараў, а да вайны з народам
Старшыня Аб’яднанай грамадзянскай партыі Мікалай Казлоў, які ўдзельнічаў у прэзыдэнцкай кампаніі ў Беларусі, расказвае, чаму трэба прымусіць зьняцца кандыдатаў-спойлераў, заяўляе, што нягоднікаў у міліцыі абсалютная меншасьць, і раіць, як сябе паводзіць, калі вас затрымліваюць. Інтэрвію тыдня зь Мікалаем Казловым чытайце па спасылцы.
Дзяржаўны дэпартамэнт ЗША заклікаў Беларусь паважаць грамадзянскія правы
Улады Беларусі зазнаюць усё большы міжнародны ціск у сувязі з затрыманьнямі прынамсі 14 журналістаў, трох зь якіх абвінавацілі за рэпартажы з акцыяў пратэсту супраць кіраваньня Аляксандра Лукашэнкі на мінулым тыдні. Выказаўся і Дзяржаўны дэпартамэнт Злучаных Штатаў.
Мэдыякарпарацыя Радыё Свабодная Эўропа / Радыё Свабода атрымала электронны ліст Дзяржаўнага дэпартамэнту ЗША з заклікам да ўраду Беларусі паважаць правы чалавека, дэмакратычныя нормы і выконваць абавязаньні, узятыя на сябе дзяржавай у якасьці ўдзельніцы АБСЭ. Сярод гэтых абавязаньняў — забесьпячэньне свабодных і справядлівых выбараў.
«Свабодныя і справядлівыя выбары — гэта нешта большае, чым падзеі, што адбываюцца ўласна ў дзень галасаваньня. Мы заклікаем урад Беларусі забясьпечыць роўныя ўмовы для ўсіх, хто жадае ўзяць удзел у выбарах, уключна з рэгістрацыяй кандыдатаў, доступам да СМІ ды іншымі аспэктамі кампаніі, — гаворыцца ў лісьце Дзяржаўнага дэпартамэнту ЗША, адрасаваным уладам Беларусі. — Павага да фундамэнтальных свабодаў, у тым ліку свабоды мірных сходаў, свабоды слова і свабоды асацыяцыяў, мае вырашальнае значэньне для ўмацаваньня ўзаемадачыненьняў паміж ЗША і Беларусьсю».
Ціск на СМІ ў Беларусі адбываецца адначасова з наступам Лукашэнкі на лідэраў апазыцыі. Пад арыштам галоўныя патэнцыйныя кандыдаты, і гэта, як лічаць назіральнікі, стала найбольшым выклікам Аляксандру Лукашэнку за ўвесь пэрыяд яго кіраваньня.
Тэлевядоўца Кахно пра затрыманьні: «У краіне адбываюцца жахлівыя рэчы»
«Я ўбачыў, як чаргу ў краму symbal.by хапаюць байцы АМАПу і запіхваюць у аўтазак. Я жыву за два кварталы ад гэтага месца. На гэтым відэа ад вас, міліцыя, уцякае сівая бабулька. Вы што?! Вы павінны абараняць людзей, гарантаваць іх бясьпеку. У гэтай чарзе няма злачынцаў. Што вы робіце? Мне брыдка і агідна бачыць тое, што адбываецца.
Калі б мы гулялі там з сынам, нас бы таксама схапілі гэтыя людзі? Нас бы таксама запхнулі ў аўтазак? За намі беглі б гэтыя страшныя людзі ў чорным?»
Пасьля абвесткі пра закрыцьцё ля крамы Symbal.by утварылася чарга. АМАП затрымаў пакупнікоў
У чарзе стаялі каля 50 чалавек, затрымалі каля 20.
«Адчуваю сябе абражаным», — лідэр J:Морс падтрымаў прапанаваны Бабарыкам рэфэрэндум
Лідэр беларускага рок-гурту J:Морс Уладзімер Пугач на сваёй старонцы ў Фэйсбуку выказаўся ў падтрымку рэфэрэндуму за Канстытуцыю 1994 году, прапанаванага патэнцыйным кандыдатам на прэзыдэнта Віктарам Бабарыкам, які цяпер знаходзіцца ў зьняволеньні ў турме КДБ.
«Вызваляй!» У Кіеве каля беларускай амбасады заклікалі спыніць рэпрэсіі ў Беларусі
У Кіеве каля амбасады Беларусі ва Ўкраіне ўкраінскія і беларускія актывісты правялі акцыю салідарнасьці. Яны заклікалі беларускую ўладу вызваліць усіх палітвязьняў, затрыманых у часе збору подпісаў за альтэрнатыўных прэтэндэнтаў у кандыдаты на прэзыдэнта.
«Атмасфэра як у сэрыяле „Чарнобыль“» — беларускага студэнта Гарварду не ўзялі ў выбарчую камісію
Максім Багдановіч зь Менску, цяпер вучыцца ў Гарвардзкім унівэрсытэце ў ЗША. Яму амаль 19 гадоў, і ён стаў амаль знакаміты гісторыяй самастойнага паступленьня ў адзін з найлепшых унівэрсытэтаў сьвету.
Сёлета Максім сабраў подпісы жыхароў свайго дома ў Фрунзенскім раёне і вылучыў сваю кандыдатуру ва ўчастковую выбарчую камісію.
На паседжаньні камісіі Фрунзенскага раёну ў Менску забыліся выключыць гук. АЎДЫЁ
23 чэрвеня на паседжаньні камісіі Фрунзенскага раёну Менску, дзе меліся вызначаць склад выбарчых камісій, у перапынку забыліся выключыць гук. Размовы чыноўнікаў трапілі ў жывы эфір. Мяркуючы па іх выказваньнях, удзельнікі размовы дамаўляліся, каб галасаваньне не выглядала занадта аднадушным.
Каго Лукашэнка больш баіцца — Трампа ці Пуціна?
Наколькі жорсткая рэакцыя краінаў Захаду на цяперашнюю хвалю рэпрэсіяў у Беларусі? Наколькі для беларускіх уладаў мае значэньне пазыцыя Захаду? Якімі інструмэнтамі Захад можа дасягнуць дзьвюх мэтаў у Беларусі — недапушчэньня праліцьця крыві і стрымліваньня ўплыву Расеі?
Гэтыя пытаньні ў «Праскім акцэнце» абмяркоўваюць аглядальнікі Свабоды Юры Дракахруст і Сяргей Навумчык, а таксама экспэртка Беларускага інстытуту стратэгічных дасьледаваньняў Кацярына Шмаціна.
«На дзяўчыну напалі ззаду пяцёра ў цывільным». Як адбываліся жорсткія затрыманьні ў Наваградку
Удзельнікі «ланцугу салідарнасьці» ў Наваградку расказалі Свабодзе, як у горадзе адбываліся жорсткія затрыманьні 21 чэрвеня.