Затрымалі адміністратара «РБ головного мозга» Ігара Лосіка. У яго правялі ператрус
Днём 25 чэрвеня папулярны беларускі Telegram-канал «РБ головного мозга» паведаміў аб ператрусе ў кватэры аднаго з адміністратараў — Ігара Лосіка. Праз гадзіну канал паведаміў, што ператрус завяршылі, Лосік затрыманы.
Паводле каналу, на ператрус прыйшлі 9 чалавек, 2 панятыя. Прычына ператрусу невядомая, але праваахоўнікі паказалі ордэр на ператрус, падпісаны пракурорам. На канале адзначаюць, што гэта можа значыць крымінальную справу.
На канал «РБ головного мозга» ў Telegram падпісаныя звыш 165 тысяч карыстальнікаў, у Twitter — больш за 173 тысячы.
Ігар Лосік таксама зьяўляецца фрылансэрам-кансультантам Радыё Свабода ў справах новых мэдыя, быў стыпэндыянтам Вацлава Гаўла.
Лукашэнка: і з Польшчы, і з Расеі ідзе ўмяшаньне ў нашыя выбары і ўнутраныя справы
Ва ўнутраныя справы Беларусі і перадвыбарчую гонку ідзе ўмяшаньне звонку, заявіў кіраўнік дзяржавы Аляксандар Лукашэнка 25 чэрвеня, прымаючы кадравыя рашэньні. На думку Лукашэнкі, апанэнты ўлады патрабуюць сумленных і прыстойных выбараў, аднак самі паводзяць сябе несумленна, паведамляе БелТА
«Яны што, нас штурхаюць на несумленнасьць такую, як яны сябе паводзяць? Ясна, што там за імі лялькаводы стаяць. Яны і з аднаго, і з другога боку. І ў Польшчы жывуць, і з Расеі падкідваюць. Мы пра гэта з прэзыдэнтам Пуціным пагаворым у бліжэйшы час пры сустрэчы, але гэтая сытуацыя вельмі складаная. Ужываюцца самыя сучасныя фальшывыя тэхналёгіі, ідзе ўмяшаньне з-за мяжы ў нашы выбары, унутраныя справы», — заявіў Лукашэнка. Усе заявы Лукашэнкі чытайце па спасылцы.
DDoS-атакі на незалежныя рэсурсы. Міністар анансаваў «абмежаваньні шкоднай інфармацыі»
24 чэрвеня не было доступу да сайту «Радыё Рацыя». Супрацоўнікі таксама ня мелі доступу і да яго сыстэмы адміністраваньня. Наступным днём аналягічная праблема напаткала рэдакцыю газэты «Наша ніва».
Раней новапрызначаны кіраўнік Міністэрства інфармацыі Беларусі Ігар Луцкі заяўляў, што стратэгія яго ведамства ў інтэрнэце будзе палягаць у тым ліку ў тым, каб «абмежаваць насельніцтва» ад зьвестак, якія наносяць шкоду дзяржаве. Цалкам чытайце па спасылцы.
«Лічыць галасы давяраюць выключна „вялікай пяцёрцы“ праўладных арганізацыяў», — праваабаронца
Кампанія незалежнага назіраньня «Праваабаронцы за свабодныя выбары» заклікае кантраляваць падлік галасоў падчас прэзыдэнцкай кампаніі.
«Шукаем назіральнікаў, якія змогуць сачыць за тым, што адбываецца на ўчастках краіны ў асноўны дзень выбараў 9 жніўня і, наколькі мага, на этапе датэрміновага галасаваньня», — гаворыцца ў Telegram-канале праваабарончага цэнтру «Вясна». Удакладняюць, што стаць назіральнікам можа кожны: і хто ўжо мае адпаведны досьвед, і для каго гэта будзе ўпершыню. Ахвотныя возьмуць удзел у навучаньні, пасьля чаго атрымаюць акрэдытацыю на ўчасткі. Падрабязнасьці чытайце па спасылцы.
Партыя БНФ: Склад участковых камісій не дазваляе правесьці сумленныя выбары
«Склад участковых камісіяў не дазваляе правесьці сумленныя выбары. Даверу гэтаму складу камісіяў няма. Таксама ня можа быць даверу з боку грамадзтва да вынікаў, якія гэтыя камісіі будуць агучваць», — сьцьвярджае ўправа Партыі БНФ у заяве, распаўсюджанай 24 чэрвеня.
«Фармаваньне ўчастковых камісіяў для выбараў прэзыдэнта прайшло антыдэмакратычна і несумленна. Улады беспадстаўна адхілілі кандыдатуры ад дэмакратычных партыяў і грамадзянскай супольнасьці, сфармаваўшы камісіі ў цалкам падкантрольным складзе», — адзначаецца ў заяве. Цалкам чытайце па спасылцы.
«Вірусу абыякава, што кажа Лукашэнка». Амэрыканскі аналітык пра выбары ў Беларусі
На пытаньні Радыё Свабода пра выбарчую кампанію ў Беларусі адказаў Браян Ўітмар, дырэктар праграмы Расеі вашынгтонскага Цэнтру аналізу эўрапейскай палітыкі.
Сьцісла:
- Сёлетнія выбары — нашмат менш прадказальная і зрэжысэраваная падзея, чым было ў мінулым.
- Пуцін хацеў бы памяняць Лукашэнку на больш паслухмяную фігуру. Але няма гарантый, што Масква здолее кантраляваць гэты працэс, калі ён пачнецца.
- Наступствы пандэміі COVID-19 нельга зьмяніць ніякай колькасьцю прапаганды. Гэта праблема, якую пачынаюць усьведамляць аўтарытарныя кіраўнікі і папулісты па ўсім сьвеце, а ня толькі Лукашэнка.
Гэльсынская камісія ЗША: Беларускія ўлады зрабілі свабодныя выбары немагчымымі
У сувязі зь перасьледам палітычных актывістаў і палітыкаў кіраўнік Гэльсынскай камісіі ЗША, кангрэсмэн Элсі Гастынгс зрабіў адмысловую заяву ад імя арганізацыі:
«Кожная дзяржава-удзельніца АБСЭ, уключаючы Беларусь, абавязваецца праводзіць свабодныя і сумленныя выбары. Беларускія ўлады зрабілі гэта немагчымым, арыштоўваючы і запалохваючы кандыдатаў у прэзыдэнты, журналістаў і актывістаў на раньніх этапах агітацыі. Не можа быць свабоднага выбару, калі сыстэма падстроеная пад дзейнага кіраўніка дзяржавы. Я заклікаю прэзыдэнта Лукашэнку загадаць вызваліць тых, хто затрыманы паводле палітычных матываў, і дазволіць рэальную палітычную канкурэнцыю ў Беларусі.
Чаму Пазьняк супраць Бабарыкі, а Алексіевіч — за
Ці працуе тэма фашызму ў цяперашнім палітычным канфлікце ў Беларусі? Як апошнім часам зьмянілася стаўленьне беларусаў да Расеі?
Гэтыя тэмы абмяркоўваюць палітычныя аглядальнікі Свабоды Юры Дракахруст, Валер Карбалевіч і Віталь Цыганкоў.
Сьцісла
Карбалевіч:
- Калі беларусы хочуць моцна абразіць нейкага чалавека ці палітычную сілу, то іх называюць «фашысты».
- Паляпшэньне адносін з Расеяй разбурае ўсю перадвыбарчую піяраўскую канструкцыю пра пагрозу незалежнасьці з боку РФ і вобраз Лукашэнкі як абаронцы сувэрэнітэту.
- З розных палітычных флянгаў робяцца вялікія намаганьні, каб штучна сканструяваць «руку Масквы».
- Абвінавачваньне Бабарыкі ў прарасейскасьці ў асяродзьдзі непалітызаваных абыватэляў не працуе. Яны думаюць, маўляў, ну і што, што прарасейскі? Што тут дрэннага?
Цыганкоў:
- Сёньняшні беларускі палітычны лад акурат мае вельмі шмат паралеляў і падабенстваў з клясычным фашызмам, напрыклад, з італьянскім 30-х гадоў.
- Выбарчая кампанія паказала, што Масква менш за ўсё жадае мяняць Лукашэнку, дапамагаць нават тым кандыдатам, якіх называюць прарасейскімі.
- Стаўленьне да Расеі за апошнія месяцы ня стала лепшым.
- Некаторыя аналітыкі кажуць пра пагрозу страты незалежнасьці, але людзі ўжо не рэагуюць. Масква ўжо не падаецца такой страшнай.
Цапкала падаў у ЦВК дакумэнты: «Ня бачым ніводнай прычыны, якая б магла паслужыць падставай для адмовы»
Былы кіраўнік Парку высокіх тэхналёгіяў, былы амбасадар у ЗША Валеры Цапкала 24 чэрвеня падаў у ЦВК дакумэнты на рэгістрацыю кандыдатам у прэзыдэнты.
«Сабралі 220 тысяч, аддалі ў выбаркамы 160 тысяч, — сказаў Цапкала журналістам. — Мы самі правялі рэвізію якасьці сабраных подпісаў... На сёньняшні момант мы ня бачым ніводнай прычыны, якая б магла паслужыць падставай для адмовы ў рэгістрацыі».
Шоўмэн і сьпявак Іван Вабішчэвіч: «Перамены патрэбныя!»
Сьпявак і шоўмэн Іван Вабішчэвіч, вядомы пад псэўданімам Дзядзя Ваня, выказаўся ў сваім інстаграме пра выбарчую кампанію і заклікаў да пераменаў.
«Вельмі цікавіцца тым, што адбываецца ў краіне». Адвакат убачыўся зь Віктарам Бабарыкам
Адзін з адвакатаў Віктара Бабарыкі Дзьмітры Лаеўскі праз чатыры дні змог убачыцца са сваім падабаронным у КДБ, куды яго выклікалі для працэсуальных дзеяньняў. Яму ўдалося крыху пагаварыць з Бабарыкам/
«Я буду насіць вашу цішотку кожны дзень». Акторка Купалаўскага з атачэньня Лукашэнкі адрэагавала на затрыманьні каля Symbal.by
Марта Голубева, акторка Купалаўскага тэатру і экс-салістка «Верасоў» пракамэнтавала ў Інстаграме затрыманьні людзей у чарзе каля крамы Symbal.by 23 чэрвеня.
«Людзей затрымалі за тое, што яны стаялі ў чарзе ў краму. Лю́быя Symbal.by, я буду насіць вашу цішотку кожны дзень. У мяне ёсьць і кубачак», — напісала яна ў сторыс Інстаграм. На фота ў сторыс Марта ў масцы стаіць каля крамы Symbal.by, пад фота падпіс: «страшэнна хочацца купляць беларускае».
Марту Голубеву раней ня раз бачылі ў атачэньні Аляксандра Лукашэнкі. Упершыню яе заўважылі ў кампаніі Лукашэнкі на сьвяточным канцэрце ў гонар Дня незалежнасьці ў 2008 годзе. На знакамітым фота, якое зьявілася ў многіх СМІ, 18-гадовая салістка «Верасоў» танчыла разам з прэзыдэнтам. З таго часу яна стала пэрыядычна зьяўляцца побач з Лукашэнкам на сьвецкіх раўтах і афіцыйных сустрэчах. Далей чытайце па спасылцы.
«Мы для іх проста «мяса» — опэрная сьпявачка Маргарыта Ляўчук адрэагавала на жорсткія затрыманьні
«У мяне праўда ўжо некалькі дзён баліць сэрца, я пастаянна плачу. Бо я ня ведаю, што рабіць у такой сытуацыі, калі ўлады, АМАП, міліцыя абараняюць не народ, а рэжым», — 24 чэрвеня опэрная сьпявачка Маргарыта Ляўчук апублікавала ў Фэйсбуку пост з рэакцыяй на затрыманьні каля крамы Symbal.by. Пост пачынаецца словамі «Не магу маўчаць!» і завяршаецца воклічам «Жыве Беларусь!».
У інтэрвію Свабодзе Маргарыта распавяла пра распавядае пра вясковых сваякоў, міліцэйскі гвалт і АМАП, для якога людзі — «проста мяса». Чытайце па спасылцы.
«Вельмі цікавіцца тым, што адбываецца ў краіне». Адвакат убачыўся зь Віктарам Бабарыкам
Адзін з адвакатаў Віктара Бабарыкі Дзьмітры Лаеўскі праз чатыры дні змог убачыцца са сваім падабаронным у КДБ, куды яго выклікалі для працэсуальных дзеяньняў і дзе яму ўдалося крыху пагаварыць з Бабарыкам, паведаміў Tut.by.
«Віктар Дзьмітрыевіч здаровы, вельмі цікавіцца тым, што адбываецца ў краіне. (...) З жыцьцёвага: Віктар Дзьмітрыевіч цяпер плянуе правесьці дэталёвы параўнальны аналіз усіх рэдакцый нашай Канстытуцыі, паколькі ўсё, што адбываецца зь ім, у яшчэ большай ступені ўмацавала яго перакананасьць у важнасьці таго, якая Канстытуцыя павінна быць у аснове заканадаўства.
Датычна лістоў, якія яму пішуць людзі — на жаль, на дадзены момант ён нічога не атрымаў. Мы спадзяемся, што ў гэтым пытаньні ўсё наладзіцца і яму будуць перадаваць лісты», — адзначыў Лаеўскі.
Ці ня стане парад у Маскве апошнім для Лукашэнкі на пасадзе кіраўніка краіны? Аналіз
Ці ня стане парад апошнім для Лукашэнкі на пасадзе кіраўніка краіны? Ці захаваецца Рэспубліка Беларусь як сувэрэнная дзяржава або Ўладзімір Пуцін даможацца яе «глыбокай інтэграцыі?
Палітычную сытуацыю ў Беларусі ў праграме Расейскай службы Радыё Свабода «Лицом к событию» абмяркоўваюць расейскі журналіст Дзьмітрый Навоша, каардынатар праекту «Эўрапейскі дыялёг» Анатоль Лябедзька, пісьменьнік Уладзімір Някляеў. Вядзе перадачу Міхаіл Сакалоў. Чытайце па спасылцы.
У Гомлі ўсё яшчэ штрафуюць за травеньскія акцыі ў падтрымку Ціханоўскага
Суд Цэнтральнага раёну Гомля разгледзеў пратакол, складзены міліцыяй на Алу Грэчку. Яе прызналі вінаватай ва ўдзеле ў несанкцыянаванай акцыі і пакаралі штрафам — 270 рублёў. Цалкам чытайце па спасылцы.
«Тое, што яны робяць, — дзіка». Віцябляніна аштрафавалі за «ланцуг салідарнасьці» і будуць судзіць за непадпарадкаваньне міліцыі
За ўдзел у «ланцугу салідарнасьці» Аляксандра Мацеюка аштрафавалі на 945 рублёў. На судзе ён даведаўся, што на яго склалі яшчэ адзін пратакол — за непадпарадкаваньне міліцыі. Пасьля вызваленьня Аляксандар зьвярнуўся ў судмэдэкспэртызу, каб зьняць пабоі, нанесеныя яму пры затрыманьні. Слуханьне другой справы перанесьлі на некалькі дзён.
Аляксандру 38. Раней ён цікавіўся палітыкай толькі ўскосна, а сёлета актыўна выказвае сваю грамадзянскую пазыцыю. Аляксандар, перадусім, за перамены. «Я ў любой групе, якая хоча годнага жыцьця», — кажа ён. Чытайце гісторыю Аляксандра па спасылцы.
Гімнастка Станюта: Дзе падзеўся закон, які нас ахоўвае?!
Гімнастка Меліціна Станюта ў сваім інстаграме абурылася затрыманьнямі каля крамы Symbal.by.
«У дэмакратычных краінах калі грамадзянін не парушае закон — ён пад аховай! А што гэта было ўчора?!?! Стаіш у чарзе ў краму — сядзіш у аўтазаку! Дзе падзеўся закон, які нас ахоўвае?!?!», — напісала Станюта.
«Калі жадаеш дабра свайму народу, сыдзі!». Экс-журналістка прэзыдэнцкага пулу пра схіл эпохі Лукашэнкі
«У гісторыі не было станоўчага прыкладу, каб празьмернае знаходжаньне ва ўладзе суправаджалася росквітам дзяржавы, прыходам дэмакратыі і ўсеагульным шчасьцем. Калі ты рэальна жадаеш дабра свайму народу і адчуваеш, што выпадаеш з кантэксту сусьветных працэсаў, зрабі, каб людзям стала лепей. Сыдзі!»
Інга Хрушчова, былая тэлепрапагандыстка, разважае пра страчаны беларусамі вотум даверу да Лукашэнкі. Чытайце ў інтэрвію па спасылцы.
Новыя арышты і штрафы. 24 чэрвеня працягнулі судзіць за «ланцугі салідарнасьці». Абнаўляецца
Ад 22 чэрвеня ў Беларусі трываюць суды за акцыі салідарнасьці са зьняволенымі Віктарам Бабарыкам і Сяргеем Ціханоўскім. Сьпіс выракаў 24 чэрвеня прыводзіць праваабарончы цэнтар «Вясна».
Ужо асудзілі:
- Уладізслаў Труханаў — 15 сутак арышту (суд Цэнтральнага раёну Гомля, судзьдзя Віктар Казачак);
- Мікалай Алейнік — 15 сутак арышту, ня быў затрыманы ў залі суду (суд Маладэчанскага раёну, судзьдзя Вольга Дубовік, суд адкладалі з панядзелка, калі падсуднаму выклікалі «хуткую дапамогу»);
- Ала Грэчка — штраф 270 рублёў (суд Цэнтральнага раёну Гомля);
- Дзьмітры Наўгародскі — штраф 135 рублёў (суд Слонімскага раёну, судзьдзя Аляксандар Ярмолік);
- Дзьмітры Дэйко — штраф 135 рублёў (суд Слонімскага раёну, судзьдзя Аляксандар Ярмолік);
- Кацярына Крывушына — штраф 135 рублёў (суд Слонімскага раёну, судзьдзя Аляксандар Ярмолік);
- Вольга Наўгародская — штраф 108 рублёў (суд Слонімскага раёну, судзьдзя Аляксандар Ярмолік);
- Аляксандра Вялічка — штраф 108 рублёў (суд Слонімскага раёну, судзьдзя Аляксандар Ярмолік);
- Ксенія Точаная — штраф 108 рублёў (суд Слонімскага раёну, судзьдзя Аляксандар Ярмолік).