Узнагарода адзначае адданасьць Сьвятланы Ціханоўскай барацьбе за дэмакратыю і правы чалавека ў Беларусі, а таксама яе намаганьні ў аб’яднаньні міжнароднай супольнасьці ў падтрымку беларускай грамадзянскай супольнасьці.
Падчас цырымоніі Ціханоўская падкрэсьліла, што гэта ўзнагарода беларусам, якія змагаюцца за дэмакратычную і эўрапейскую будучыню, а таксама беларускім палітвязьням, якія плацяць за свабоду вялікую цану.
У цырымоніі бралі ўдзел Рым Алабалі-Радаван, дзяржаўны сакратар Нямеччыны ў справах міграцыі, нямецкія палітыкі, дэпутаты, амбасадары эўрапейскіх дзяржаў.
Узнагароду ўручаюць з 2003 году. Яе першым ляўрэатам была швайцарская юрыстка і галоўная абвінаваўца ў Міжнародным трыбунале ў справах былой Югаславіі Карля дэль Понтэ.
Ціханоўская ня першая беларуска, якая атрымала гэтую прэмію. У 2007-м за публікацыю шэрагу артыкулаў і нарысаў пра эўрапейскую будучыню Беларусі цаной небясьпекі ўласнай свабодзе прэмію далі Алесю Лагвінцу. На наступны год прэмію прызначылі фінскаму палітыку Александру Стубу, а яшчэ праз год тагачаснаму кіраўніку Эўракамісіі Жану-Клёду Юнкеру.
У 2021 годзе ляўрэаткай стала прэзыдэнтка Славаччыны Зузана Чапутава, узнагароджаная за змаганьне з крыміналам і падтрымку меншасьцяў. У 2022-м — украінскі паэт Сяргей Жадан за ўнёсак у разьвіцьцё грамадзянскай супольнасьці ў сваёй дзяржаве.
Форум