4 сьнежня ў Гомлі пачаўся разгляд гучнай справы былога старшыні Гомельскага райвыканкаму Аляксандра Сітніцы. Чыноўніка абвінавачваецца паводле двух артыкулаў Крымінальнага кодэксу — перавышэньне ўлады (ч.3 арт. 426) і атрыманьне хабару (ч. 3 арт. 430).
Сваякі Сітніцы (жонка, дзеці — сыну 22, дачцэ 9 гадоў) на суд не прыйшлі.
У красавіку кіраўніка выканкаму затрымалі праваахоўныя органы.
Папярэднічалі затрыманьню чыноўніка дэтэктыўныя падзеі. З сайту райвыканкаму зьнікае прозьвішча Сітніцы, а сам ён не зьяўляцца ані на працы, ані дома. Паводле неафіцыйнай інфармацыі, чыноўнік уцёк у Расею. Гомельскі аблвыканкам афіцыйна паведаміў: кіраўнік райвыканкаму вызвалены ад пасады за грубае парушэньне працоўных абавязкаў — прагулы.
Неўзабаве міністар унутраных спраў Ігар Шуневіч пацьвердзіў, што чыноўніка затрымалі. «Выяўлены шматлікія факты атрыманьня хабару і злоўжываньне службовымі паўнамоцтвамі старшынём Гомельскага райвыканкаму», — праінфармаваў міністар.
Паводле інфармацыі МУС, на працягу трох гадоў Сітніца браў хабар за неабгрунтаваныя льготы і перавагі розным камэрцыйным структурам, якія працуюць у сфэрах зямельных дачыненьняў, будаўнічых работ, камунальна-бытавых паслуг.
Паводле інфармацыі МУС, «нягледзячы на спробу схавацца ад праваахоўных органаў, экс-кіраўнік быў затрыманы супрацоўнікамі Галоўнага ўпраўленьня барацьбы з арганізаванай злачыннасьцю і карупцыяй і зьмешчаны ў сьледчы ізалятар».
Пазьней у Следчым камітэце дадалі, што Сітніцу прад’яўлена абвінавачваньне паводле артыкулу за хабар, але ніякіх падрабязнасьцяў справы не раскрылі да гэтага часу. Чакаецца, што ўсё высьветліцца падчас судовага працэсу.
Ёсьць вэрсія, што першапачаткова сваю крымінальную справу Сітніца справакаваў сам дзіўнымі паводзінамі пасьля ўдзелу ў нарадзе ў прэзыдэнта Аляксандра Лукашэнкі. Кіраўнік дзяржавы казаў пра карупцыю і папярэджваў, каб чыноўнікі не чакалі літасьці:
— Я ўжо праінфармаваны па дзесятку чыноўнікаў, што тут сядзяць <...> Справы няма, вынікаў няма, а ён пры людзях, пачынаючы ад лазьні і заканчваючы уласным, і для дзяцей, і для сябе жыльлём, загады раздае.
Так супала, што Сітніца якраз будаваў лазьню, пачаў нэрвавацца і ў выніку вырашыў уцякаць у Расею.
Калі суд палічыць віну Сітніцы даказанай, яму пагражае да 15 гадоў пазбаўленьня волі з канфіскацыяй маёмасьці і з пазбаўленьнем права займаць пэўныя пасады.
