Нікулінскі суд Масквы абраў меру стрыманьня для журналіста выданьня «Медуза» Івана Галунова, затрыманага 6 чэрвеня. Яго адправілі пад хатні арышт да 7 жніўня. Суд забараніў Галунову карыстацца сродкамі сувязі і зносіцца зь іншымі фігурантамі справы.
На думку сьледзтва, Галуноў можа схавацца ад сьледзтва — ён не жыве на месцы рэгістрацыі, мае пашпарт для выездаў за мяжу. Пракурор прасіў арыштаваць Галунова на 2 месяцы.
Да вынясеньня прысуду, падчас пратакольнага здыманьня, Галуноў падзякаваў усім за падтрымку. «Ня думаў, што буду прысутнічаць на сваёй сьмерці», — сказаў ён.
«Я ніколі ў жыцьці не ўжываў наркотыкаў», — сказаў Галуноў на пасяджэньні суду. «Пра тое, што справа тычыцца наркотыкаў, я даведаўся толькі з таблічкі ў кабінэце апэратыўнага ўпаўнаважанага», — дадаў Галуноў.
Паводле яго, крымінальны перасьлед зьвязаны з расьсьледаваньнямі ў галіне пахавальнай індустрыі. «Гэта з прычыны пахавальнага бізнэсу. Мне ішлі пагрозы», — заявіў ён.
Журналісту выставвілі абвінавачаньне ў замаху на збыт наркотыкаў у буйным памеры. Кіраўнік Міжнароднай праваабарончай групы «Агора» Павел Чыкаў апублікаваў тэкст пастановы аб прыцягненьні Галунова ў якасьці абвінавачанага. У пастанове гаворыцца, што Галуноў купіў два скруткі з 3,56 г мэфэдрону і тры скрутка з 5,42 г какаіну. Паводле вэрсіі паліцыі, какаін журналіст захоўваў дома, а мэфэдрон насіў з сабой у заплечніку, каб потым прадаць. З гэтымі скруткамі, сьцьвярджаюць паліцыянты, яго і затрымалі днём 6 чэрвеня.
Адпаведны артыкул Крымінальнага кодэксу Расеі прадугледжвае пазбаўленьне волі на тэрмін ад 10 да 20 гадоў.
Перад будынкам суду сабраўся натоўп людзей. Яны скандавалі «Свабоду!» і «Сёньня Галуноў, заўтра мы».
