Расейская кампанія «Яндекс» у 85-ты дзень народзінаў беларускага пісьменьніка Рыгора Барадуліна зьмяніла лягатып на галоўнай старонцы.
Для карыстальнікаў зь Беларусі кампанія пераставіла ў сваёй назьве літару «Я» на апошняе месца. Пад лягатыпам патлумачыла: «Той, хто якае зашмат, ставіць сам сябе назад». Гэта радок зь верша Рыгора Барадуліна «Азбука — вясёлы вулей», выдадзенага ў кнізе дзіцячых вершаў і казак «Ішоў коця па канапе» (1997).
У Расеі і іншых краінах лягатып у гонар Барадуліна не мянялі. Калі клікнуць на лягатып, «Яндекс» пакажа вынікі пошуку па запыце «Рыгор Бородулин» (на расейскай мове, нават калі карыстальнік выбраў беларускі інтэрфэйс).
Сёлета 24 студзеня Рыгору Барадуліну — апошняму народнаму паэту Беларусі — споўнілася б 85 гадоў. Ён нарадзіўся 24 лютага 1935 году на Вушаччыне. Дэбютаваў у 1953 годзе зь вершамі ў часопісе «Чырвоная зьмена».
Выдаў сем дзясяткаў зборнікаў паэзіі (і дарослай, і дзіцячай, і гумарыстычнай, і сатырычнай, і цалкам сур’ёзнай), а таксама шэраг эсэ і артыкулаў, шэраг перакладаў замежных паэтаў. 2006 годзе Рыгор Барадулін быў намінаваны на Нобэлеўскую прэмію па літаратуры за зборнік вершаў «Ксты».
