Як адзначаюць ініцыятары глябальнай дасьледчай кампаніі, да супольнай справы далучыліся амаль 200 навукоўцаў з больш як 40 дзяржаваў. Ад беларускага боку ў праекце задзейнічаны псыхатэрапэўт Алег Айзбэрг.
Веды, атрыманыя ў выніку дасьледаваньня, дапамогуць больш эфэктыўна падтрымліваць людзей падчас эпідэмій, а таксама вызначыць, хто больш уразьлівы да праблемаў, зьвязаных зь фізычным і псыхічным здароўем.
Дасьледаваньне COH-FIT (Collaborative Outcomes Study on Health and Functioning during Infection Times) цяпер зьяўляецца найбуйнейшым з тых, якія ацэньваюць уплыў пандэміі COVID-19.
Галоўнай мэтай — збор інфармацыі ад жыхароў розных краінаў і яе выкарыстаньне для вывучэньня кароткатэрміновых і доўгатэрміновых наступстваў пандэміі. Навукоўцы разьлічваюць выпрацаваць мэханізм мэтанакіраванага аказаньня дапамогі тым, хто мае найбольшую рызыку.
Алег Айзбэрг, дацэнт Беларускай мэдычнай акадэміі пасьлядыплёмнай адукацыі, таксама бярэ ўдзел у гэтым дасьледаваньні, якое праводзіцца на міжнародным узроўні пад кіраўніцтвам прафэсара Крыстафа Корэла (ЗША/Нямеччына) і доктара Марка Солмі (Італія/Вялікая Брытанія).
«Гэты праект унікальны. І ня толькі таму, што арганізаваны за такі кароткі тэрмін, але і таму, што ў ім удзельнічае так шмат краінаў. Мы спадзяёмся, што атрыманыя зьвесткі дадуць нам зусім новае разуменьне таго, якія захады трэба рабіць пры ўзьнікненьні эпідэмій і пандэмій. Параўнаньне вынікаў з 40 краінаў дапаможа зразумець, як эфэктыўна падтрымліваць людзей з рознымі захворваньнямі ў такіх асаблівых умовах», — адзначыў Алег Айзбэрг.
COH-FIT ажыцьцяўляе збор інфармацыі ў тры этапы, цяпер рэалізуецца першы. Праз паўгода і год пасьля заканчэньня пандэміі паводле нарматываў Сусьветнай арганізацыі аховы здароўя будуць праведзеныя наступныя дасьледаваньні. Гэта дазволіць навукоўцам атрымаць інфармацыю як пра неадкладныя, так і адтэрмінаваныя наступствы COVID-19.
Усім ахвотным прапануецца ўзяць удзел у ананімным апытаньні на сайце coh-fit.com.
