Апазыцыянэр Аляксей Навальны знаходзіцца на борце самалёта авіякампаніі «Победа», які ляціць з Бэрліну ў Маскву.
Момант, калі Навальны зайшоў у самалёт, зьняў карэспандэнт Радыё Свабода.
Навальны адказаў на пытаньні журналістаў, якія разам зь ім ляцяць у Маскву. Ён сказаў, што не баіцца вяртацца ў Расею, нягледзячы на пагрозу арышту. З Навальным ляціць яго жонка Юлія.
Самалёт вылецеў прыблізна на паўгадзіны пазьней, чым было пазначана ў раскладзе. Камандзір карабля пацьвердзіў, што самалёт ляціць у аэрапорт Унукава, дзе зьбіраюцца прыхільнікі апазыцыянэра.
Тым часам у аэрапорце ў Маскве пачаліся затрыманьні тых, хто сабраўся прывітаць Навальнага. Сярод затрыманых аказалася апазыцыйная палітычная актывістка Любоў Собаль, юрыстка Фонду барацьбы з карупцыяй.
