Баявыя дзеяньні ва Ўкраіне цяпер адбываюцца ў сытуацыі, калі ні Ўкраіна, ні Расея ня могуць дасягнуць значных посьпехаў, заявіў у інтэрвію BBC кіраўнік украінскай вайсковай выведкі Кірыла Буданаў.
«Пакуль ні мы ня можам перамагчы іх аднадушна па ўсіх кірунках, ні яны ня могуць перамагчы нас. Таму гэтыя лякальныя дзеяньні зьяўляюцца падрыхтоўкай да вызваленьня нашых тэрыторый», — сьцьвярджае ён. Пры гэтым ён дадае, што ключавымі для Ўкраіны застаюцца пастаўкі зброі з Захаду.
Буданаў таксама ўпэўнена заяўляе, што сёньня няма ніякіх прыкметаў падрыхтоўкі да другога ўварваньня зь Беларусі, і аптымістычна прагназуе, што вайна скончыцца вяртаньнем Украіне межаў 1991 году.
Украінскія ўлады заявілі пра магчымасьць новага буйнога наступу Расейскай Фэдэрацыі ў пачатку наступнага года. Кірыла Буданаў мяркуе, што як плян, такі варыянт існуе.
«Яна заўсёды існавала і існуе цяпер і, на жаль, будзе існаваць яшчэ даволі доўга, нават калі скончыцца вайна. На гэты момант няма ніякай інфармацыі, ніякіх прыкметаў, рэальных прыкметаў падрыхтоўкі новага ўварваньня ў горад Кіеў, я маю на ўвазе сталіцу ці паўночны кірунак увогуле».
Пра магчымасьць уварваньня зь Беларусі Буданаў заявіў:
«Ніякіх прыкмет падрыхтоўкі ўварваньня ў Кіеў з Беларусі я ня бачу. На цяперашні момант і ў найбліжэйшай будучыні. Я дзейнічаю як тэхнакрат і ацэньваю рэаліі. Калі будзе інфармацыя, будзем яе ўлічваць. Калі інфармацыі няма, значыць, яе няма. Але яшчэ раз паўтаруся, гіпатэтычна, тэарэтычна Расея выношвае такія ідэі. Аднак у іх няма ні пэрыядаў, ні магчымасьці, як гэта ўвогуле зрабіць».
Пра расейскую вайсковую дзейнасьць у Беларусі, тое, што расейскія войскі трэнуюцца ў Беларусі, сюды перакідваецца вайсковая тэхніка, з Расеі ў Беларусь накіраваны палявыя шпіталі, Буданаў заявіў:
«Мы дакладна ведаем пра ўсе рухі расейцаў і пра ўсю іх дзейнасьць. І магу вам сказаць шчыра: тая групоўка, якую яны там стварылі, ніякім чынам не адпавядае ні наступальнай, ні групоўцы, якая магла б несьці нейкую рэальную пагрозу. Напрыклад, у дачыненьні да такога гучнага эпізоду, на які цяпер усе абапіраліся чатыры-пяць дзён таму. Падкрэсьліваю — гэта спэцыяльная інфармацыйная апэрацыя Расейскай Фэдэрацыі па ўвядзеньні нас у зман як Украіны.
Расея зрабіла так: пагрузіла некалькі эшалёнаў тэхнікі і асабістага саставу. Перакінулі гэтыя эшалёны ня ў сховішча каля мяжы, а проста бліжэй. Зрабілі гэта дэманстратыўна ўдзень. Проста каб усе запісалі, нават калі не хацелі бачыць. Яны самі праз падкантрольныя, перш за ўсё падкантрольныя СМІ, паказалі гэта, істотна павялічыўшы колькасьць тэхнікі і пэрсаналу ў гэтых СМІ, якія як бы ўжо выйшлі на штурм Украіны.
Без разгрузкі прастаялі паўдня. А ўвечары яны ўжо паехалі назад туды, адкуль пайшлі. Гэта называецца „карусэль“. Гэта паказальныя акцыі, якія паказваюць як бы маштабныя рухі, падрыхтоўку да чагосьці.
Таксама хачу адзначыць яшчэ адзін цікавы факт пра гэты эпізод. Пэрыяд, калі яны пачалі рабіць гэтыя „карусэлі“, як я сказаў, цалкам супадае з датай, калі наш прэзыдэнт павінен быў адправіцца ў свой першы афіцыйны візыт у ЗША пасьля ўварваньня. А Расея хацела гэтаму перашкодзіць. Аднак, як бачыце, на гэта ніхто не спадзяваўся і ня верыў, і ўсе пляны праціўніка былі загадзя выяўленыя».
«Такім чынам, вы адхіляеце магчымасьць наземнай апэрацыі зь Беларусі?»
«Пакуль так».
Пра сустрэчу Пуціна і Лукашэнкі, на якой нібыта прэзыдэнт Расеі спрабаваў пераканаць Беларусь уцягнуць беларускае войска ў вайну супраць Украіны, Буданаў адказаў:
«Беларускае войска пакуль ня будзе выкарыстоўвацца ў вайне супраць Украіны. Гэта абсалютна не ў інтарэсах Беларусі, і беларускае войска ня мае жаданьня ў гэтым удзельнічаць, само беларускае грамадзтва не вельмі добра ўспрымае такую ідэю, таму Лукашэнка робіць усё, каб не дапусьціць катастрофы, перш за ўсё, для сваёй краіны.
«Як вы думаеце, калі скончыцца вайна?»
«Што тычыцца бачаньня тэрмінаў і наступстваў заканчэньня вайны, то нічога не зьмянілася. Яшчэ раз магу паўтарыць, што ўсё гэта скончыцца вяртаньнем нашых межаў ад 1991 года. Гэта ўсё.
«Уключаючы Крым?»
«Крым зьяўляецца неад’емнай часткай тэрыторыі Ўкраіны».
