Апублікаваны ў пятніцу артыкул афіцыйнага прадстаўніка Сьледчага камітэту Расеі Ўладзіміра Маркіна зьнік з сайту выданьня «Вячэрні Чэлябінск». Выпускаючы рэдактар газэты Марына Анціпава не змагла растлумачыць Slon Magazine прычыну зьнікненьня публікацыі.
Сам Маркін раней напісаў у Твітэры, што Чэлябінская газета — «адзінае выданьне, якое адважылася апублікаваць» яго калонку.
Артыкул пад назвай «Лёс Расіі ці Таемны Тысячагадовы Плян» таксама апублікаваны на афіцыйным сайце Сьледчага камітэту Расеі. Ён прысьвечаны «інфармацыйнай вайне» супраць Расеі. Маркін сьцьвярджае, што ў расейскіх уладаў ёсьць «Таемны Тысячагадовы Плян», які тлумачыць інфармацыйную палітыку Крамля. «Права, праўда і гатоўнасьць за іх змагацца — вось наша галоўная зброя ў вайне за давер ўсіх людзей добрай волі», — піша Маркін. Апазыцыю прадстаўнік Сьледчага камітэта называе «грантаедамі», забойства Барыса Нямцова «сакральнай ахвярай».
У артыкуле Маркін дапусьціў абмен асуджанай у Расеі ўкраінскай ваеннаслужачай Надзеі Саўчанкі. «Вядома, справядлівасьць патрабуе, каб адседзела ўсе 22 гады. Але калі гэта дапаможа выцягнуць з кіеўскіх засьценкаў добрых і сумленных людзей, то можна і пайсьці на абмен», — напісаў Маркін.
