Дзесяць «Дзён цьвярозасьці» вызначыў сёлета Лельчыцкі райвыканкам. Гэта на тры болей, чым у папярэднія гады. У гэтыя дні ў крамах раёну ня будуць прадаваць алькагольныя напоі.
Сьпіртовыя напоі ў такія дні могуць прадавацца толькі на разьліў у барах, кавярнях ды рэстарацыях, тлумачыць кіраўніца спраў райвыканкаму Ала Мохарава.
«Абмежаваньняў вымагае прафіляктыка пʼянства й алькагалізму, папулярызацыя здаровага ладу жыцьця», — кажа яна.
«Дні без алькаголю — 2018» у Лельчыцкім раёне
- 27 красавіка (пятніца),
- 30 траўня (серада),
- 9 чэрвеня — выпускныя вечары (субота),
- 7 ліпеня — Усясьветны дзень прафіляктыкі алькагалізму (субота),
- 3 жніўня (пятніца),
- 16 жніўня (чацьвер),
- 10 верасьня — Усясьветны дзень прадухіленьня самагубстваў (панядзелак),
- 14 кастрычніка — Дзень маці (нядзеля),
- 17 лістапада — Міжнародны дзень неданошаных дзяцей (субота),
- 1 сьнежня — Усясьветны дзень барацьбы з СНІДам (субота).
Летась алькаголь не прадавалі і на Дзень моладзі 25 чэрвеня. Але агулам «Дзён цьвярозасьці» было на тры меней.
