Інцыдэнт адбыўся пасьля матчу Казахстану са зборнай Славеніі ў Лізе нацый 13 кастрычніка. Журналіст у майцы парыскага футбольнага клюбу ПСЖ задаў трэнэру пытаньне па-казаску. Чарчэсаў у адказ спытаўся ў журналіста, ці той зьвяртаецца да яго на францускай мове.
Трэнэра абвінавацілі ў непавазе да мовы. Міністэрства турызму і спорту Казахстану заклікала спартовыя фэдэрацыі «паставіцца з павагай да дзяржаўных сымбалеў і нацыянальных каштоўнасьцяў, выключыўшы любыя недарэчныя выказваньні на іх адрас», паведамляла Казаская служба Радыё Свабода.
У чэрвені Чарчэсаў ужо апынуўся ў падобнай сітуацыі. Тады на прэс-канфэрэнцыі, прысьвечанай яго прызначэньню, яму не спадабалася пытаньне на казаскай мове. Чарчэсаў прапанаваў адказаць журналісту на сваёй роднай асецінскай.
Пасьля гэтага фэдэрацыя футболу Казахстану заявіла, што Чарчэсаў пачаў вучыць казаскую мову. У заяве, прысьвечанай інцыдэнту пасьля матчу са Славеніяй, фэдэрацыя запэўніла, што Чарчэсаў ставіцца да дзяржаўнай мовы Казахстану з павагай.
- 61-гадовы Чарчэсаў — былы брамнік зборных СССР, СНД і Расеі, большую частку кар’еры ён правёў у маскоўскім «Спартаку» і «Тыролі» з аўстрыйскага Інсбруку. Раней ён трэніраваў каманды з Аўстрыі, Расеі, Польшчы і Вугоршчыне.
Форум