Міністэрства інфармацыі закрыла доступ да сайту кампаніі за дэкрыміналізацыю марыхуаны і кантраляваных рэчываў legalize.by.
Пра гэта Свабодзе паведаміў уладальнік сайту Пятро Маркелаў, якому на электронную пошту Мінінфарм даслаў копію загаду аб блякіроўцы доступу, падпісанага кіраўніком ведамства Аляксандрам Карлюкевічам.
Паводле Міністэрства інфармацыі, на сайце разьмешчаны матэрыялы, якія прапагандуюць «небясьпечны наркатычны сродак марыхуана», ужываньне якога на тэрыторыі Беларусі забаронена. Прапаганда наркатычных сродкаў у СМІ і інтэрнэце забаронена артыкулам 38 Закону аб СМІ, тлумачаць у міністэрстве.
Пятро Маркелаў кажа, што сайт будзе напаўняцца і далей. Таксама рэдактары сайту будуць абскарджваць загад Міністэрства інфармацыі, «бо там няма ніякай прапаганды».
Заблякаваны сайт напаўняўся англамоўнымі матэрыяламі пра дзейнасьць удзельнікаў кампаніі Legalize Belarus. На падтрымку кампаніі рэдактары сайту прапаноўвалі ахвяраваць біткойны.
Пад пэтыцыяй за дэкрыміналізацыю марыхуаны і іншых кантраляваных рэчываў падпісаліся больш за 2000 чалавек, у тым ліку 1600 — у інтэрнэце. Яны заклікаюць увесьці вызначэньне малой колькасьці для кожнага кантраляванага рэчыва і адмяніць крымінальную адказнасьць за іх абарот у памерах, якія не перавышаюць вызначаныя.
19 красавіка міністар унутраных спраў Ігар Шуневіч заявіў, што яго ведамства не вітае паслабленьня адказнасьці паводле «наркатычных» артыкулаў, у тым ліку для спажыўцоў наркотыкаў.
27 красавіка прадстаўнікі руху «Маці 328» абвясьцілі галадоўку, патрабуючы зьмякчэньня «антынаркатычнага» заканадаўства ў дачыненьні да тых, хто ўжываў забароненыя рэчывы. 16 траўня на партале pravo.by апублікавалі праект зьменаў у «наркатычныя артыкулы» Крымінальнага кодэксу.
Што важна ведаць пра галадоўку «Маці 328»:
- Акцыя доўжылася 15 дзён. 11 траўня актывісткі пачалі выхад з галадоўкі.
- Удзельнікі галадоўкі патрабуюць перагляду жорсткіх прысудаў, якія выносіліся ад 2013 году паводле 328 артыкула (ад 5 да 25 гадоў пазбаўленьня волі), а таксама зьменаў у заканадаўства.
- Людміла Лапко зь Ліды, якая пачала галадоўку 10 траўня, і Алена Мікалюк, якая далучылася да яе на выходныя дні, працягваюць галадаць.
- Саўмін накіраваў у Палату прадстаўнікоў законапраект аб зьмене наркатычнага артыкула. У законапраекце прапануюць скараціць тэрмін зьняволеньня за асобныя злачынствы зьвязаныя з наркотыкамі, а канфіскацыю маёмасьці замяніць штрафам.
- Лукашэнка дапусьціў магчымасьць паслабленьняў адказнасьці спажыўцоў наркотыкаў.
