У казарме трэцяй вучэбнай танкавай роты 72-га Аб’яднанага навучальнага цэнтру падрыхтоўкі прапаршчыкаў і малодшых спэцыялістаў пачала працаваць сыстэма відэаназіраньня, паведаміў журналістам у суботу міністар абароны Беларусі генэрал-лейтэнант Андрэй Раўкоў.
«Сыстэма відэаназіраньня пасьпяхова працуе ў казарме 3-ці гвардзейскай школы падрыхтоўкі спэцыялістаў танкавых і артылерыйскіх падразьдзяленьняў. Праца па аснашчэньню відэаназіраньнем іншых казармаў працягваецца. Гэта рабіць трэба, бо гэта запатрабавана», — цытуе Раўкова Белта.
У казарме ўсталяваныя 64 камэры, якія працуюць круглыя суткі. Відэа запісваецца з гукам і захоўваецца каля месяца. Міністар падкрэсьліў, што якасьць запісу дазваляе распазнаваць асобы.
Паводле яго, сыстэма відэаназіраньня дазволіць павысіць кантроль за арганізацыяй жыцьця ў падразьдзяленьні.
Салдат Аляксандар Коржыч, якога ў кастрычніку 2017 знайшлі павешаным у падвале, служыў у 3-й вучэбнай танкавай роце 72-га аб’яднанага вучэбнага цэнтру. Паводле вэрсіі Сьледчага камітэту, Аляксандра Коржыча «давялі да самагубства». Маці Аляксандра Коржыча перакананая, што сын стаў ахвярай забойства.
Па выніках расьсьледаваньня ў справе Коржыча былі ўзятыя пад варту 10 чалавек: два афіцэры — камандзір роты, старшы лейтэнант і ягоны намесьнік, капітан, сем сяржантаў і прапаршчык. За непрыняцьце захадаў прадухіленьня гібелі Коржыча з войска звольнілі пяць чалавек, яшчэ двое адхіленыя ад працы.
