Сьледчы камітэт паведаміў, што скончыліся неадкладныя дзеяньні ў «справе БелТа». Увечары 9 жніўня на волю выйшлі галоўная рэдактарка tut. by Марына Золатава, а таксама Ганна Калтыгіна (tut. by), Ганна Ермачонак (tut. by) і рэдактар сайту газэты «Беларусы і рынак» Аляксей Жукаў.
Па-ранейшаму пакуль невядома пра лёс галоўнай рэдактаркі БелаПАН Ірыны Леўшынай, журналісткі агенцтва Тацяны Каравянковай, а таксама карэспандэнта Deutsche Welle Паўлюка Быкоўскага.
Затрыманьні незалежных журналістаў. Што важна ведаць
- Сьледчы камітэт завёў крымінальную справу за несанкцыянаваны доступ да кампутарнай інфармацыі. Максымальнае пакараньне паводле ч. 2 арт. 349 — абмежаваньне ці пазбаўленьне волі на тэрмін да 2 гадоў.
- 7–8 жніўня прайшлі ператрусы ў офісах Tut.by, БелаПАН, Realt.by, газэты «Культура» і ТАА «Айціві». Таксама па справе праходзіць выдавецкі дом «Беларуская навука».
- Вядома, што цягам 7–9 жніўня затрымалі 17 журналістаў. Іх вызвалялі пасьля допыту ў СК.
- 9 жніўня СК заявіў, што галоўная рэдактарка Tut.by Марына Золатава прызнала віну.
- Падставай для завядзеньня крымінальнай справы паслужыла паведамленьне БелТА пра збоі ў кліентаў пры доступе да платнай падпіскі на паслугі.
- Платная падпіска БелТА каштуе 612 рублёў на месяц.
- Хто асудзіў затрыманьні журналістаў і ператрусы ў рэдакцыях. Сьпіс
- У чэрвені 2018 году супраць кіраўніка БелаПАН Алеся Ліпая завялі крымінальную справу за ўхіленьне ад сплаты падаходнага падатку.
