Праз адзін з найбуйнейшых расейскіх прыватных інвэстыцыйных банкаў «Тройка Дыялёг» было адмыта каля $ 9 млрд. Аб гэтым гаворыцца ў новым расьсьледаваньні журналістаў міжнароднага Праекту па расьсьледаваньні арганізаванай злачыннасьці і карупцыі (OCCRP).
У матэрыяле «Тройка-Пральня» сьцьвярджаецца, што схема дазваляла людзям, зьвязаным з арганізаванай злачыннасьцю, і карупцыянэрам сыходзіць ад падаткаў і хаваць сваю маёмасьць за мяжой.
Сярод тых, хто згадваецца ў расьсьледаваньні і, як сьцьвярджаецца, выкарыстаў гэтую схему, — віялянчэліст Сяргей Ралдугін, якога называў сваім сябрам прэзыдэнт Расеі Ўладзімір Пуцін. Ралдугін таксама згадваўся ў іншым расьсьледаваньні OCCRP — так званым «Панамскім дасье». У ім сьцьвярджалася, што праз афшоры на імя Ралдугіна прайшлі каля $ 2 млрд.
Адна з кампаніяў на Брытанскіх Віргінскіх выспах, якія ўваходзяць у схему «Пральні», Quantus Division Ltd. таксама за тры гады перавяла каля $ 200 тыс. на рахункі дабрачыннай арганізацыі брытанскага прынца Чарльза Prince Wales’s Charity.
Расьсьледаваньне стала магчымым дзякуючы буйной уцечцы банкаўскіх дакумэнтаў. У расьсьледаваньні таксама ўдзельнічаў літоўскі сайт 15min.lt.
«Тройка Дыялёг», як сьцьвярджаецца ў расьсьледаваньні, у сярэдзіне 2000-х гадоў стварыла сетку ня менш як з 76 афшорных кампаніяў, якія адкрывалі рахункі, у прыватнасьці, у літоўскім Ukio Bankas, які закрыўся ў 2013 годзе. Паводле дадзеных журналістаў, рахункі адкрываліся на імёны падстаўных асобаў, частка зь якіх нават ня ведала пра колькасьць грошай, што праходзяць праз гэтыя рахункі.
Грошы з Расеі адмываліся праз рахункі ў гэтым банку. Фінансавыя апэрацыі, як сьцьвярджаецца, пераважна былі фальшывымі — грошы пералічваліся за пастаўку неіснуючых тавараў і паслуг. Зь літоўскага банку яны выводзіліся на рахункі ў заходніх банках.
Сьцьвярджаецца, што на рахункі, зьвязаныя з Ралдугіным, такім чынам было выведзена $ 69 млн.
Паводле дадзеных OCCRP, «Тройка-Пральня» выкарыстоўвалася, у тым ліку, для вываду з Расеі грошай, лёс якіх расьсьледаваў Сяргей Магніцкі, які загінуў у маскоўскім СІЗА ў 2009 годзе. Схемы дазвалялі таемна набываць долі ў дзяржаўных кампаніях і нерухомасьць за мяжой, гаворыцца ў расьсьледаваньні.
Галоўным акцыянэрам «Тройкі Дыялёг» быў інвэстыцыйны банкір Рубэн Варданян. У 2012 годзе «Тройка Дыялёг» была прададзеная Ашчадбанку, атрымаўшы назву Sberbank CIB.
Ашчадбанк на расьсьледаваньне журналістаў пакуль не адрэагаваў.
