Беларускі партал Tut.by сьцьвярджае, што атрымаў праект закону «Аб амністыі», якую маюць правесьці ў 2019 годзе. Пакуль праект праходзіць узгадненьні і не прыняты канчаткова.
Як сьцьвярджае Tut.by, у праекце прадугледжанае наступнае.
Могуць цалкам вызваліць ад крымінальнай адказнасьці, а таксама спыніць папярэднія расьсьледаваньні ў дачыненьні:
- непаўналетніх;
- цяжарных;
- жанчын і адзінокіх мужчын зь дзецьмі да 18 гадоў;
- пэнсіянэраў;
- інвалідаў I і II групы;
- хворых на актыўную форму сухотаў, на анкалягічныя хваробы 2-й, 3-й і 4-й групаў, ВІЧ-інфікаваных на 3-й і 4-й стадыі захворваньня;
- вэтэранаў баявых дзеяньняў у іншых дзяржавах;
- пацярпелых ад аварыі на Чарнобыльскай АЭС і іншых радыяцыйных аварыяў;
- траўмаваных і захварэлых падчас вайсковай службы, у тым ліку ва Ўзброеных сілах СССР і ў КДБ СССР, а таксама ў час службы ў сучасных беларускіх сілавых структурах, Дзяржкантролі і МНС.
- людзей, якія ўчынілі злачынствы безь вялікай грамадзкай небясьпекі і менш цяжкія злачынствы.
Да гэтага сьпісу ёсьць выключэньні. Ня будуць вызваляць тых, хто асуджаны паводле цэлага шэрагу артыкулаў, як то пэдафілія, уцягненьне ў прастытуцыю, распаўсюд наркотыкаў, супраціўленьне міліцыі або гвалт у дачыненьні міліцыянта ці службовай асобы ды іншых.
Асуджаным паводле «наркатычнага» артыкулу — ч.1, ч. 2 і ч. 3 арт. 328 КК — могуць скараціць тэрмін на 1 год. Непаўналетнім могуць скараціць тэрмін пакараньня на два гады.
Ад адбываньня пакараньня могуць вызваліць тых, хто адбыў ня менш за траціну тэрміну за наступныя злачынствы:
- крадзеж (ч. 3 і ч. 4 арт. 205 КК);
- махлярства (ч. 3 і ч. 4 арт. 209);
- прыўлашчваньне і растрата (ч. 3 і ч. 4 арт. 211);
- крадзеж праз кампутарную тэхніку (ч. 3 арт. 212);
- незаконная прадпрымальніцкая дзейнасьць (ч. 3 арт. 233);
- ілжэпрадпрымальніцтва (ч. 2 арт. 243).
Першыя тры артыкулы — акрамя выпадкаў злачынстваў у складзе арганізаванай групы.
Амністыя, паводле крыніц Tut.by, ня будзе тычыцца тых, хто асуджаны за забойства і бандытызм, вядзеньне вайны і акт тэрарызму, згвалтаваньне і пэдафілію, дарожнае здарэньне ў нецьвярозым стане, карупцыю і злоўжываньне ўладай ды іншае.
Таксама амністыя ня будзе ўжывацца да тых, хто зноў зрабіў злачынства пасьля амністыі ці памілаваньня за апошнія пяць гадоў; хто не кампэнсаваў шкоды, злосна парушаў парадак у час адбываньня пакараньня.
Апошні раз амністыя праводзілася 4 гады таму. Цяпер яна мае быць прымеркаваная да 75-годзьдзя вызваленьня БССР ад нацыстаў. Пад амністыю могуць трапіць каля 10–12 тысяч чалавек.
