Старшыня ЦВК заявіла, што калі зьмены ў Выбарчы кодэкс і будуць сёлета ўхваленыя, то пачнуць дзейнічаць не раней 2020 году.
«Правілы, паводле якіх 7 і 17 лістапада пройдуць выбары ў Нацыянальны сход, больш ня будуць зьмяняцца да завяршэньня гэтай выбарчай кампаніі. Усе магчымыя навэлы, калі і будуць скарыстаныя, то ўжо толькі на выбарах прэзыдэнта», — сказала Свабодзе старшыня Цэнтральнай выбарчай камісіі.
Праект зьменаў Выбарчы кодэкс падрыхтавала апазыцыйная дэпутатка Палаты прадстаўнікоў Ганна Канапацкая, цяпер яго рыхтуюць да разгляду на восеньскую сэсію, якая мае пачацца 2 кастрычніка.
«Нічога не пасьпеем зрабіць. Нават калі дапусьціць, што Палата прадстаўнікоў прыме гэты дакумэнт адразу ў двух чытаньнях. Але ж ён яшчэ павінны прайсьці Савет Рэспублікі і быць падпісаны кіраўніком дзяржавы. Таксама пэўны тэрмін даецца на тое, каб увесьці закон у жыцьцё. Так што ў прынцыпе гэта немагчыма».
Ярмошына кажа, што, паводле рэкамэндацыяў Вэнэцыянскай камісіі, заканадаўства наагул не павінна мяняцца у год правядзеньня выбарчай кампаніі:
«Гэта толькі рэкамэндацыя. Я яшчэ дапускаю зьмены за паўгода да выбараў. Але падчас выбарчай кампаніі гэта немагчыма».
ЦВК мяняць інструкцыі ня будзе
Старшыня ЦВК кажа, што праз парлямэнт уносіць прынцыповыя зьмены ў Выбарчы кодэкс. Некаторыя менш значныя навэлы мае права прымаць ЦВК у выглядзе рэкамэндацыяў выбарчым камісіям. Так, сёлета зьнятая забарона для назіральнікаў рабіць здымкі на выбарчых участках, а пры фармаваньні выбарчых камісій цяпер будзе ўлічвацца толькі асабісты жыцьцёвы досьвед прэтэндэнтаў, а не яшчэ і палітычны, як было тры гады таму. «Больш мы нічога зьмяняць ня будзем», — кажа Ярмошына.
Тры прапановы Канапацкай
Ганна Канапацкая расказала Свабодзе, што яна істотна перапрацавала першапачатковы варыянт свайго законапраекту ў бок скарачэньня.
«Зрабіла гэта наўмысна, каб мае калегі прагаласавалі „за“. Фактычна застаюцца тры зьмены. Першая — галоснасьць падліку галасоў, калі старшыня камісіі паказвае бюлетэні ўсім і раскладае іх пад таблічкамі з прозьвішчамі прэтэндэнтаў. Другая — кожны кандыдат мае права ўключаць сваіх прадстаўнікоў у выбарчыя камісіі ўсіх узроўняў. Трэцяя — датэрміновае галасаваньне застаецца, але ягоныя ўдзельнікі мусяць патлумачыць, чаму яны галасуюць датэрмінова. У кожнай акрузе для гэтага вылучаецца толькі адзін спэцыяльны ўчастак», — патлумачыла дэпутатка сутнасьць сваіх навацый.
Парлямэнцкія выбары-2019 у Беларусі. Што варта ведаць
Асноўны дзень галасаваньня на выбарах у Палату прадстаўнікоў сёмага скліканьня — ніжнюю палату Нацыянальнага сходу — 17 лістапада. Датэрміновае галасаваньне праходзіла ад 12 да 16 лістапада. Папярэднія вынікі сталі вядомыя 18 лістапада, ніводзін апазыцыянэр ня трапіў у Нацыянальны сход.
- За 5 дзён датэрміновага галасаваньня на парлямэнцкіх выбарах у Беларусі, паводле ЦВК, прагаласавала 35,77% выбарнікаў. Незалежныя назіральнікі заяўляюць пра завышэньне яўкі больш чым у 2 разы.
- Агулам у Палату прадстаўнікоў трапляе 110 дэпутатаў. Дэпутаты ніжняй палаты выбіраюцца паводле выбарчых акругаў, а не партыйных сьпісаў. Праўладная «Белая Русь» прапаноўвала выбіраць прынамсі палову дэпутатаў паводле партыйных сьпісаў (як, напрыклад, ва Ўкраіне), але ўлады гэтую ідэю адхілілі.
- Галасаваць на выбарах у Палату маюць права усе паўналетнія грамадзяне Беларусі. Галасаваньне добраахвотнае і ня можа быць прымусовым. Скардзіцца на прымус да галасаваньня можна ў пракуратуру ці ў райвыканкамы.
- Цяперашнія выбары адбыліся датэрмінова, хоць фармальна датэрміновымі ня лічацца. Тэрмін паўнамоцтваў дэпутатаў Палаты прадстаўнікоў — 4 гады. Але калі паміж выбарамі 2012 і 2016 гадоў прайшло 1449 дзён (3 гады, 11 месяцаў і 19 дзён), то паміж выбарамі 2016 і 2019-га пройдзе ўсяго 1162 дні (3 гады, 2 месяцы і 6 дзён).
- Лукашэнка першапачаткова прапаноўваў правесьці выбары ў Палату на 7 лістапада — Дзень Кастрычніцкай рэвалюцыі. Старшыня ЦВК Лідзія Ярмошына тлумачыла, што гэтак ня варта рабіць. Урэшце на гэты дзень прызначылі выбары ў Савет Рэспублікі.
- Выбары ў Савет Рэспублікі — верхнюю палату Нацыянальнага сходу — прайшлі 7 лістапада без удзелу звычайных беларусаў. Па 8 дэпутатаў ад вобласьці і яшчэ 8 ад Менску выбралі на абласных сходах дэпутаты гарадзкіх і раённых саветаў, яшчэ 8 дэпутатаў мае права прызначаць (але звычайна прызначае ня ўсіх) асабіста Аляксандар Лукашэнка. Ніводную кандыдатуру не адхілілі.
- Фракцый у Палаце прадстаўнікоў няма. Апазыцыя амаль не трапляе ў Нацыянальны сход. Так, у Палаце прадстаўнікоў шостага скліканьня толькі 2 са 110 дэпутатаў — не прыхільнікі Лукашэнкі: Ганна Канапацкая ад Аб’яднанай грамадзянскай партыі і беспартыйная Алена Анісім, старшыня Таварыства беларускай мовы. У Савеце Рэспублікі апазыцыі няма.
Як выглядаюць сярэднестатыстычныя беларускія дэпутат, дэпутатка і прэзыдэнт. Фота
- Нацыянальны сход дзейнічае з 1996 году — пасьля таго як Лукашэнка распусьціў Вярхоўны Савет XIII скліканьня. Выбары дэпутатаў Нацыянальнага сходу першага скліканьня не праводзіліся, Лукашэнка проста прызначыў туды ляяльных яму дэпутатаў Вярхоўнага Савету.
- Нацыянальны сход амаль не распрацоўвае законапраектаў (часьцей гэта робяць міністэрствы і ведамствы) і амаль ніколі не галасуе супраць. Рэкорд шостага скліканьня Палаты прадстаўнікоў — 10 галасоў (9%) супраць звужэньня паўнамоцтваў сваёй палаты.
- Краіны Заходняй Эўропы і ЗША не прызнавалі свабоднымі і дэмакратычнымі ніякія выбары і рэфэрэндумы ў Беларусі пасьля 1994 году. На ўсіх выбарах назіральнікі адзначалі шматлікія парушэньні, пасьля давалі рэкамэндацыі, але Лукашэнка прасіў яго «не павучаць».
- На выбары 17 лістапада выстаўлялі кандыдатаў прынамсі 7 апазыцыйных партыяў і шэраг рухаў. На ранейшых выбарах далёка ня ўсіх апазыцыянэраў рэгістравалі кандыдатамі або чальцамі выбарчых камісій.
- На пачатак датэрміновага галасаваньня з 560 зарэгістраваных засталося 516 кандыдатаў. 33 самі зьнялі свае кандыдатуры, яшчэ адносна 13 скасавалі рэгістрацыю за парушэньні (6 зь іх — ад апазыцыйнай «Эўрапейскай Беларусі»). Ніводнай безальтэрнатыўнай акругі няма
- Выбары каштавалі бюджэту каля 23 млн беларускіх рублёў. Лукашэнка кажа, што выбары «павінны прайсьці як сьвята», а Нацыянальны сход мае стаць «дыскусійнай пляцоўкай для дыялёгу дэпутатаў з рознымі поглядамі». Старшыню ЦВК Лідзію Ярмошыну «палохала цішыня» вакол выбараў, а 99% беларусаў лічаць, што ня могуць паўплываць на органы ўлады.
- Як сьцьвярджае ЦВК, яўка на выбары склала 77,22%. На трох мінулых выбарах у Палату называлася яўка каля 74%, а рэкорд быў у 2004 годзе, калі называлася яўка 89,84%.
- Паводле папярэдніх вынікаў, у Палату прадстаўнікоў прайшлі 66 мужчын і 44 жанчыны; 30 дзейных дэпутатаў, 2 чалавекі ва ўзросьце да 30 гадоў, ніводнага апазыцыянэра.
- Сярод вядомых беларусаў, якія трапляюць у Палату прадстаўнікоў, былая міністарка інфармацыі Лілія Ананіч, «Міс Беларусь-2018» Марыя Васілевіч, кіраўнік «Белай Русі» Генадзь Давыдзька, старшыня ЛДПБ Алег Гайдукевіч.
- Незалежныя беларускія назіральнікі фіксавалі парушэньні на датэрміновым галасаваньні і ў асноўны дзень выбараў (731 парушэньне і 622 скаргі, у тым ліку 341 — толькі за 17 лістапада), кожнага трэцяга незалежнага назіральніка выдалілі з участка. Асноўным парушэньнем называецца адсутнасьць адкрытага падліку бюлетэняў і забарона на капіяваньне выніковага пратаколу ўчастковай камісіі. Назіральнікі АБСЭ назвалі выбары неадпаведнымі важным міжнародным дэмакратычным стандартам. Місіі СНД і ШАС назвалі выбары «празрыстымі і дэмакратычнымі».
