Сьпярша маршы пэнсіянэраў пачыналіся на плошчы Незалежнасьці. Але пасьля жорсткага супраціву сілавікоў пратэстоўцы зьмянілі тактыку і сталі зьбірацца кожны раз у новым месцы гораду. Дзьве папярэднія акцыі прайшлі каля ўнівэрмагу «Беларусь» і Заходняга рынку.
4 студзеня прыкладна а палове на трэцюю дня каля гандлёвага цэнтру «Дана Мол», што побач са станцыяй мэтро «Ўсход» і Нацыянальнай бібліятэкай, стаў ланцуг пэнсіянэраў зь бел-чырвона-белымі сьцягамі. На акцыю сабралася некалькі дзясяткаў чалавек. Пастаяўшы непрацяглы час, людзі разышліся. Таксама ланцуг салідарнасьці зьбіраўся непадалёк, на Барысаўскім тракце. У ім удзельнічалі людзі рознага веку. Інфармацыі пра затрыманьні няма.
