Вера Гірыч была 1967 году нараджэньня, яна пачала працу ў кіеўскім бюро Радыё Свабода 1 лютага 2018 году. Да гэтага яна працавала на вядучых украінскіх тэлеканалах.
Гірыч загінула ў выніку ракетных абстрэлаў Кіева расейскімі войскамі 28 красавіка, калі ў горадзе зь візытам знаходзіўся генэральны сакратар ААН. У яе засталіся старыя бацькі, якімі яна апекавалася, і дарослы сын.
На гібель Веры Гірыч адрэагавалі прэзыдэнты Ўкраіны і ЗША, украінскія і амэрыканскія дыпляматы, грамадзкія дзеячы, калегі.
Прэзыдэнт Радыё Свабодная Эўропа/Радыё Свабода Джэймі Флай сказаў:
«Мы глыбока засмучаныя гібельлю супрацоўніцы нашай украінскай службы Веры Гірыч у Кіеве гэтай ноччу. Мы страцілі дарагую калегу, якую будуць памятаць за яе прафэсіяналізм і адданасьць нашай місіі. Мы шакаваныя і абураныя пазбаўленым сэнсу характарам яе гібелі дома, у краіне і горадзе, якія яна любіла. Памяць аб ёй будзе натхняць нашу працу ва Ўкраіне і за яе межамі на доўгія гады»
Рэдакцыя Радыё Свабода выказвае спачуваньне сям’і Веры Гірыч і будзе ўспамінаць яе як сьветлага і добрага чалавека, сапраўднага прафэсіянала.
