Міністар абароны Ізраілю Ёаў Галянт аддаў загад вайскоўцам Арміі абароны «быць напагатове» перад чаканай наземнай апэрацыяй у сэктары Газа супраць баевікоў ХАМАС, паведамляе The Times of Israel.
«Тыя, хто зараз глядзяць на Газу здалёк, убачаць яе знутры. Я вам гэта абяцаю», — сказаў Галант.
Калі менавіта пачнецца наземная апэрацыя, пакуль невядома. У яе, як чакаецца, будуць уцягнуты дзясяткі тысяч вайскоўцаў сухапутных войскаў, а таксама танкі і спэцназаўцы пад прыкрыцьцём авіяцыі і артылерыі.
Прэм’ер-міністар Ізраілю Біньямін Нэтаньягу напярэдадні сустрэўся з вайскоўцамі, якія знаходзяцца ў сэктары Газа. У Twitter ён апублікаваў ролік, падпісаны: «Разам з ваярамі. Гатовыя».
Армія абароны Ізраіля паведамляе, што за ноч былі нанесеныя ўдары па больш як ста абʼектах ХАМАС, у тым ліку па падземным тунэлі, складах зброі і апэратыўных камандных цэнтрах. У выніку апэрацыі паведамляецца аб забойстве аднаго са спэцназаўцаў ХАМАС і зьнішчэньні зброі ў мячэці ў раёне Джабаліі.
Ізраільскія вайскоўцы атакавалі таксама абʼекты інфраструктуры «Хэзбала» ў адказ на абстрэл ізраільскай тэрыторыі. Удары, у прыватнасьці, былі нанесеныя па пазыцыях назіраньня і апавяшчэньня.
Ізраільскія ўлады абʼявілі аб пачатку эвакуацыі жыхароў горада Кірʼят-Шмана на поўначы краіны. Эвакуацыя праводзіцца на фоне абстрэлаў з боку «Хэзбалы» і іншых груповак, паведамляе The Times of Israel. 19 кастрычніка, паводле зьвестак выданьня, у выніку ракетных абстрэлаў былі параненыя тры чалавекі. Усяго ў горадзе пражывае каля 22 тысяч чалавек, але шмат хто ўжо выехаў.
Вайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетнага ўдару з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
